Kancelari i Gjermanisë sulmon ashpër Izraelin

Kancelari gjerman Friedrich Merz kritikoi për herë të parë, hapur dhe drejtpërdrejt, sulmet e Izraelit në Rripin e Gazës.

“Rrezikimi i popullsisë civile në një masë të tillë, siç ka ndodhur gjithnjë e më shumë ditët e fundit, nuk mund të justifikohet më me luftën kundër Hamasit,” tha kancelari gjerman Friedrich Merz, duke komentuar vdekjen e fëmijëve në një shkollë, ndërsa shtoi se ai “nuk e kupton më qëllimin për të cilin ushtria izraelite po vepron aktualisht në Rripin e Gazës”.

Friedrich Merz e paralajmëroi qeverinë e Benjamin Netanyahut se miqtë e Izraelit nuk mund të tolerojnë gjithçka që bën Jerusalemi.

“Qeveria izraelite nuk duhet të bëjë diçka që as miqtë më të mëdhenj të Izraelit nuk mund ta tolerojnë në një moment të caktuar,” tha Merz në Berlin, në një diskutim publik në WDR.

Kancelari gjerman, tha gjithashtu, se Gjermania, më shumë se çdo vend tjetër në botë, duhet të përmbahet nga kritikat ndaj Izraelit.

“Gjermania, si asnjë vend tjetër, duhet të përmbahet nga kritikat e hapura ndaj Izraelit. Por kur tejkalohen kufij të caktuar, kur shkelet ligji ndërkombëtar, atëherë edhe kancelari gjermane duhet të flasë,” tha Merz.

Kancelari gjerman tha me këtë rast se do të flasë me kryeministrin izraelit këtë javë dhe do ta paralajmërojë atë të mos e teprojë me veprimet e tij kundër Gazës.

Ndryshe, dhjetëra njerëz u vranë ose u plagosën pas sulmit izraelit të mbrëmshëm në një shkollë që strehonte persona të zhvendosur në Gaza, dhe ndihma humanitare po arrin me ritëm të ngadaltë për popullsinë e Gazës pas një bllokade 11-javore izraelite.