Shërbimet sekrete holandeze: Hakerët rusë sulmuan rrjetet e NATO-s dhe disa vendeve evropiane
Një grup hakerash rusë, i panjohur më parë, është përgjegjës për sulmet e vitit të kaluar në rrjetet e policisë holandeze, NATO-s dhe disa vendeve evropiane, kanë bërë të ditur shërbimet e inteligjencës holandeze.
“Hakerët mbështeten nga shteti rus”
Grupi, i quajtur nga agjencitë e sigurisë “Laundry Bear”, ka shumë të ngjarë të mbështetet nga shteti rus, thanë shërbimet e inteligjencës holandeze dhe ato ushtarake të kundërzbulimit përmes një deklarate të përbashkët drejtuar parlamentit.
“Sulmet kibernetike kundër institucioneve holandeze janë pjesë e një kërcënimi më të madh ndërkombëtar kibernetik të paraqitur nga një grup hakerash,” thanë shërbimet në deklaratën mbi rezultatet e hetimit të tyre.
Grupi veproi pa u vënë re derisa u zbulua duke kryer një operacion hakerimi në shtator të vitit 2024, me të cilin fitoi me sukses akses në të dhëna konfidenciale mbi oficerët e policisë holandeze, thuhet në deklaratë. Agjencitë thanë se Laundry Bear kreu gjithashtu spiunazh kibernetik ndaj kompanive që prodhojnë teknologji të sofistikuar, ku Rusia e ka të vështirë të ketë qasje, duke pasur parasysh sanksionet perëndimore të vendosura për shkak të luftës në Ukrainë.
“Hetimi zbuloi gjithashtu se Laundry Bear është përgjegjëse për operacionet kibernetike kundër qeverive perëndimore dhe institucioneve të tjera duke filluar që nga viti 2024,” thekson deklarata. Grupi kërkoi të mblidhte informacione në lidhje me “prokurimin dhe prodhimin e pajisjeve ushtarake nga qeveritë perëndimore dhe dërgesat e armëve perëndimore në Ukrainë”.
