Izraeli dhe Irani e pranuan, Trump: Armëpushimi tani është në fuqi. Ju lutem mos e shkelni!
Izraeli dhe Irani e kanë pranuar armëpushimin të cilin e zyrtarizoi Presidenti i Shteteve të Bashkuara, Donald Trump, në orën 07:08 të mëngjesit të sotëm duke i dhënë fund luftës 12-ditore që e tronditi Lindjen e Mesme.
“ARMËPUSHIMI TANI ËSHTË NË FUQI. JU LUTEM MOS E SHKELNI!” u shpreh Presidenti Trump përmes rrjetin social Truth.
Pranimi i marrëveshjes nga të dyja palët erdhi pasi Teherani e kreu sulmin e fundit raketor ndaj Izraelit, si pasojë e të cilët humbën jetën katër njerëz në orët e hershme të mëngjesit të ditës së sotme, ndërkohë që Izraeli kreu bombardime në të gjithë Iranin para agimit duke lënë nëntë të vdekur.
Kryeministri i Izraelit, Benjamin Netanyahu, tha se Izraeli është pajtuar armëpushimin dypalësh me Iranin, në bashkërendim me Trumpin, pasi ka arritur të gjitha synimet ushtarake në operacionin 12-ditor kundër Iranit, përfshirë eliminimin e kërcënimit nga programet bërthamore dhe raketore balistike të Iranit.
“Izraeli do të përgjigjet me forcë ndaj çdo shkeljeje të armëpushimit”, tha Netanyahu.
Televizioni shtetëror i Iranit raportoi se armëpushimi hyri në fuqi në orën 7:30 të mëngjesit, por zyrtarët iranianë nuk kanë folur ende pas njoftimit të Trumpit për hyrjen e armëpushimit në fuqi.
Disa orë më parë, diplomati më i lartë i Iranit deklaroi se vendi ishte i gatshëm të ndalte sulmet ajrore.
Abbas Araqchi tha në orët e para të ditës së sotme se nëse Izraeli e ndal agresionin e tij të paligjshëm kundër popullit iranian jo më vonë se në orën 4 të mëngjesit, Irani nuk e ka ndër mend të vazhdojë me përgjigje ushtarake më pas.
“Operacionet ushtarake të Forcave tona të Armatosura të fuqishme për të ndëshkuar Izraelin për agresionin e tij vazhduan deri në minutën e fundit, në orën 4 të mëngjesit. Së bashku me të gjithë iranianët, i falënderoj Forcat tona të Armatosura të guximshme, të cilat mbeten të gatshme të mbrojnë vendin tonë të dashur deri në pikën e fundit të gjakut të tyre dhe që iu përgjigjën çdo sulmi të armikut deri në minutën e fundit,” u shpreh Araqchi përmes rrjetit social X.
