Rritja e çmimeve të qirave u përshpejtua në Maj 2025
Presioni në rritje në tregun e qirave është reflektuar edhe në nivelin e përgjithshëm të çmimeve. Në muajin maj 2025 mesatarja e qirave ishte 4.7 për qind më e lartë se në maj 2024, raporton INSTAT. Kjo ishte rritja më e lartë që nga dhjetori 2023.
Rritja e qirave është përforcuar pas pandemisë si rrjedhojë e tkurrjes së ofertës së qirave afatgjata, orientimit të tregut drejt turizmit, mungesës së ndërhyrjeve shtetërore për të rregulluar tregun e strehimit, dhe ndryshimeve demografike ku gjithnjë e më shumë të rinj nga rrethet transferohen në Tiranë.
Para 10 viteve në 2015-2016, ndryshimet vjetore në çmimet e qirave ishin të papërfillshme, me norma rritjeje nën 1 për qind ose edhe negative. Megjithatë, që nga fundi i vitit 2016 dhe veçanërisht gjatë vitit 2017, ritmi i rritjes u përshpejtua ndjeshëm, duke arritur mbi 4 për qind në disa muaj.
Periudha e pandemisë, në vitin 2020, shënoi një ngadalësim të fortë të tregut, me norma rritjeje afër zeros ose negative. Izolimet, pasiguria ekonomike dhe emigrimi i përkohshëm i shumë qytetarëve ndikuan ndjeshëm në kërkesën për qira.
Nga mesi i vitit 2021 filloi një rritje graduale, që shfaqet më e qartë në vitin 2022, me norma rritjeje që kapërcyen 2–3 për qind.
Megjithatë, zhvillimi më i theksuar ndodhi gjatë vitit 2023, kur ritmi i rritjes vjetore të çmimeve të qirasë arriti kulmin në rreth 4.9 për qind në muajin shkurt.
Kjo fazë pasqyron një rikthim të fortë të kërkesës në treg, ndoshta i ndikuar nga turizmi në rritje dhe zhvendosja e të huajve që punojnë në vend, veçanërisht në Tiranë.
Pas këtij kulmi, tendenca filloi të zbutet, sidoqoftë, nga muaji mars 2024 nisi një tjetër fazë rritjeje e fortë, duke kulmuar në maj 2025 me një normë vjetore prej 4.7 për qind, shumë pranë nivelit më të lartë të regjistruar dy vite më parë. Kjo tregon se presioni mbi tregun e qirave është rikthyer me intensitet.
Pas vitit 2022 u vu re një rritje e numrit të shtetasve të huaj sidomos ukrainas, rusë, italianë dhe nomadë që marrin me qira prona në Shqipëri, për shkak të çmimeve ende të ulëta të qirave në Kryeqytet në krahasim me pjesën tjetër të Europës.
Gjithashtu shumë pronarë i kthyen banesat në njësi për turistë, duke ulur ofertën për qira afatgjatë dhe duke rritur çmimet për banorët vendas.
Teksa ndërtimet e reja janë përqendruar në segmente luksoze, mungon oferta për banesa me qira të përballueshme për familjet me të ardhura mesatare ose të ulëta. Ky çekuilibër po shtyn çmimet lart, veçanërisht në zona urbane kryesisht në Tiranë./Monitor/
