Sot temperatura 43°C, Ministria e Mbrojtjes: Kujdes me zjarret!

Sot kur pritet që temperaturat në Shqipëri të arrijnë deri në 43°C, Ministria e Mbrojtjes ka ftuar qytetarët të tregojnë kujdes të shtuar, të mos ndezin zjarre në hapësira të hapura dhe të raportojnë çdo rast të dyshimtë.

“Sipas të dhënave të raportuara nga Agjencia Kombëtare e Mbrojtjes Civile, IGJEUM, dhe, Qendrën e Koordinimit të Emergjencave Civile të BE-së, ERCC, në datën 26 Korrik pritet rrezik maksimal për zjarre në të gjitha qarqet e vendit. Komiteti i Mbrojtjes Civile ka kërkuar nga të gjitha institucionet që të rrisin gatishmërinë dhe bashkëpunimin ndërinstitucional,” shprehet Ministria e Mbrojtjes në apelin e saj ndërsa i fton qytetarët:

“Të tregojnë kujdes të shtuar, të mos ndezin zjarre në hapësira të hapura dhe të raportojnë çdo rast të dyshimtë te autoritetet. Bashkëlidhur hartat referuese sipas nivelit të rrezikut për çdo qark.”

Ndryshe, Instituti i Gjeoshkencave ka parashikuar për sot ditë përvëluese me temperaturë deri në 43 °C, ndërsa sa i përket zjarreve në pyje, rrezik të “lartë” në të gjitha qarqet.