Paralajmërim për të nxehtin e madh, IKSHPK: Udhëzime për mbrojtje nga temperaturat e larta!

Instituti Kombëtar i Shëndetësisë Publike të Kosovës, IKSHPK, duke paralajmëruar për sot temperatura të larta që mund të ndikojë negativisht në shëndetin dhe mirëqenien e qytetarëve, veçanërisht të grupeve të cenueshme ka dhënë dhe udhëzime për mbrojtje nga të nxehtit.

“Vala e të nxehtit që po mbizotëron këto ditë mund të ndikojë negativisht në shëndetin dhe mirëqenien e qytetarëve, veçanërisht të grupeve të cenueshme. Periudhat e gjata me temperatura të larta gjatë ditës dhe natës krijojnë stres në trup dhe rrisin rrezikun e sëmundjeve apo vdekjeve nga ekspozimi ndaj nxehtësisë,” thekson IKSHPK duke saktësuar dhe veprimet që duhet të ndërmerren për t’u mbrojtur:

– Qëndroni larg të nxehtit: Shmangni daljet dhe aktivitetet e rënda gjatë orëve më të nxehta. Qëndroni në hije dhe kaloni 2-3 orë në një vend të freskët.

– Mbajeni trupin të freskët dhe të hidratuar: Përdorni veshje të lehta (pambuku), bëni dush të freskët, lagni lëkurën dhe pini ujë rregullisht (1 gotë/orë – 2-3 litra/ditë).

– Mbajeni shtëpinë të freskët: Ajroseni gjatë natës kur jashtë është më freskët. Ditën mbyllni dritaret dhe përdorni perde për të penguar rrezet e diellit,” thekson Instituti Kombëtar i Shëndetësisë Publike të Kosovës ndërsa kujdes të veçantë për grupet e cenueshme:

– Për të moshuarit mbi 65 vjeç: Kontaktoni rregullisht sidomos ata me sëmundje kronike, aftësi të kufizuar apo që jetojnë vetëm.

– Për fëmijët: Mos i lini kurrë në automjete të parkuara. Shmangni ekspozimin në diell gjatë orëve më të nxehta (10:00–17:00).

Ndryshe, Instituti Hidrometeorologjik i Kosovës, IHMK, njoftoi se dje temepratuar më e lartë ishte regjistruar në orën 15:00 në Klinë me 42.5 °C, pasuar nga Hani i Elezit 41.1 °C, Gjakova 40.7 °C, Suhareka 40.4 °C, Prizreni 40.3 °C, dhe, Rahoveci 40.2 °C.