Gorbaçov, Vuçiç, vodka dhe rakia

nga Andrija Lavrek

Për të vërtetuar plotësisht se nga të gjithë presidentët në botë, Aleksandar Vuçiç është më i mençuri dhe më dinaku (që fjala do jetë pikërisht për Aleksandar Vuçiçin, jam i sigurt, askush as nuk e vuri në dyshim), do të filloj nga Bani rus i Kulinit, nga Vladimiri i Madh.

Siç dihet, Vladimiri i Madh i pagëzoi rusët në vitin 988. Fjala është për rusët e Kievit (“ukrainas”), pasi që as Petersburgu dhe as Moska (nga fjala ruse moška, spanjisht moskito, pra, “Moska” është “Mushkonjë”) nuk kishin ekzistuar ende as në ëndrrat më të këqija. Vladimiri i Madh zgjodhi Krishterimin midis tre feve – Judaizmit, Islamit dhe Krishterimit.

Ai e hodhi poshtë Islamin, siç thotë shprehimisht “Ruski letopis”, sepse myslimanët ndalojnë përdorimin e pijeve alkoolike, dhe një rus nuk mund të jetojë pa të (të gjithë rusët janë njësoj, si Kievianët, Moskovitët dhe “të bardhët”). Në atë kohë, rusët pinin verë, lëng mishi, kvas dhe birrë, dhe në raki kaluan (gorilka ukrainase/gorivka, vodka ruse) vetëm në shekullin e XV-të. Dhe që atëherë e deri më sot, ata dehen masivisht.

Përmasa epike dehja i mori pikërisht në epokën sovjetike, dhe zgjati deri te Gorbaçovi dhe “perestrojka”. Gorbaçovi pa që pirja dëmtonte ekonominë e vendit, kështu që ai nuk e shfuqizoi plotësisht, por e kufizoi prodhimin dhe tregtimin e vodkës.

Kjo, është e qartë, se është dhe arsyeja e fshehur por kryesore, për dështimin e perestrojkës dhe shpërbërsies së BRSS-së: Rusët nuk ishin kundër një riorganizimi të vogël, por nëse dikush do t’i privonte nga vodka – Zoti na ruajt! Madje ka edhe një anekdotë nga ajo kohë (rusët barcoletën e quajnë “anekdotë”, por kjo nuk është barcoletë, kjo është një anekdotë e vërtetë):

Diku në Moskë, në një radhë shumë të gjatë për vodka, një burri i ikë truri dhe thotë:

– Epo, tani më ka ardhur në majë të hundës gjithçka! Do të shkoj në Kremlin për të vrarë Gorbaçovin!

Ai largohet dhe kthehet pas një ore. E pyesin se çfarë bëri, dhe ai thotë:

– Asgjë. Ka një radhë edhe më të gjatë me ata që presin të vrasin Gorbaçovin sesa këtu për vodkë!

Dihet mirë se amerikanët u përpoqën gjithashtu të vendosnin ndalimin e alokoolit në vitet 1920, dhe edhe kjo përfundoi në mënyrë të palavdishme. Kjo mund të funksionojë me disa suedezë, ndoshta edhe me gjermanët, por me amerikanët, rusët dhe serbët, në asnjë mënyrë.

Duke e ditur këtë, sundimtarët serbë nuk provuan kurrë diçka të tillë. Por ishte Vuçiç ai që shkoi një hap më tej. Disa vjet më parë, pamë një program televiziv, ku Vuçiç u thotë dy djemve (diku midis 5-10 vjeç): “Fëmijë, më së miri është të pini raki; nëse di diçka, atëherë e di këtë gjë!” Në këtë moment njëri prej djemëve, sa me fat që është nëna e tij! – iu mburrë se ai veç kishte filluar të pinte raki.

Dhe sot, në vitin 2025, pasi “revolucioni i ngjyrosur ka dështuar”, siç na thotë po ky Aleksandar Vuçiç, çfarë u mbetet udhëheqësve të opozitës dhe studentëve bllokues përveçse të dehen ndërsa presin arrestimin?

Aq më tepër që Vuçiç po shpall përsëri uljen e çmimeve të ushqimeve bazë për “të varfrit”, siç u shpreh ai vetë, dhe ku do të gjesh mjerim më të madh dhe varfri sesa studentët dhe udhëheqësit e opozitës? Dhe një nga nevojat kryesore të jetës për serbët është – rakia!

Dhe pikërisht këtu shihet mençuria dhe dinakëria e Aleksandar Vuçiçit. Trapi Gorbaçov donte të ulte konsumin e alkoolit në BRSS, e Vuçiçi i mençur i inkurajon me kuç e me maç, që të pinë.

E pse jo? Edhe ashtu projekti i tij i dytë i madh i jetës, ndërtimi maniakal në të gjithë Serbinë, po merret gjithnjë e më shumë në dorë të kinezëve dhe turqëve./Danas/