Sot hyjnë në fuqi, rregulla të reja në BE për ChatGPT, Grok, Gemini…

Rregulla të reja transparence për modelet e inteligjencës artificiale, AI, me qëllim të përgjithshëm si ChatGPT dhe Gemini hyjnë në fuqi sot në të gjithë Bashkimin Evropian, si pjesë e Ligjit historik për inteligjencën artificiale i cili u miratua vitin e kaluar.

Kërkesat kryesore për programues të sistemeve të IA-së
Sipas rregullave të reja, prorgramuesit duhet të zbulojnë se si funksionojnë modelet e tyre dhe cilat të dhëna janë përdorur për t’i trajnuar ato. Për modelet veçanërisht të përparuara, të cilat konsiderohen se paraqesin rreziqe të mundshme për publikun, duhet të dokumentohen edhe masat e sigurisë.

AI me qëllim të përgjithshëm i referohet sistemeve që mund të përdoren për një gamë të gjerë qëllimesh, të tilla si gjenerimi i tekstit, analiza e gjuhës ose shkrimi i kodit.

Mbrojtja dhe kritika e të drejtave të autorit

Ligji synon pjesërisht të mbrojë më mirë të drejtat e autorit. Programuesit tani duhet të raportojnë burimet e të dhënave të tyre të trajnimit dhe nëse kanë përdorur mbledhjen e automatizuar të të dhënave nga faqet e internetit. Ata gjithashtu duhet të rendisin hapat e ndërmarrë për të mbrojtur pronën intelektuale dhe për të vendosur pika kontakti me ata që zotërojnë këto të drejta.

Mirëpo, disa shoqata që përfaqësojnë autorët, artistët dhe botuesit e kanë kritikuar ligjin si jo mjaftueshëm gjithëpërfshirës. Në një deklaratë të përbashkët, iniciativa gjermane Urheberrecht, një grup mbrojtës i të drejtave të autorit, argumenton se rregullat mbeten joefektive pa kërkesën për emërtimin e grupeve të të dhënave ose domeneve specifike.

Zbatimi dhe ndëshkimet

Ndonëse individët mund të padisin ofruesit e shërbimeve të AI sipas ligjit të ri, Zyra Evropiane për Inteligjencën Artificiale do të fillojë ta zbatojë atë vetëm më vonë. Zyra do të monitorojë modelet e reja nga gushti 2026 dhe modelet e lëshuara para 2 gushtit 2025, duke filluar nga gushti 2027.

Shkeljet mund të rezultojnë me gjoba deri në 15 milionë euro ose 3 për qind të shitjeve vjetore globale.

Për të lehtësuar harmonizmin, Komisioni Evropian ka lëshuar gjithashtu udhëzime vullnetare dhe një kod sjelljeje.

Google, programuesi i modelit Gemini, tha se do ta nënshkruajë kodin, megjithëse ka paralajmëruar se rregullorja mund të pengojë inovacionin.