Minimi i sovranitetit të Kosovës, Kurti: Përpjekjet e Serbisë, kërcënim serioz

Përpjekjet e Serbisë për ta minuar sovranitetin dhe integritetin territorial të shtetit vazhdojnë të paraqesin kërcënim ndaj sigurisë tonë kombëtare, tha Kryeministri në detyrë, Albin Kurti, në edicionin e tetë të Konferencës së Ambasadorëve në Prishtinë, duke ju drejtuar 53 zërave të fuqishëm nëpër botë që t’i shtyjnë përpara interesat më të rëndësishme të Kosovës.

“Lufta propagandistike e Serbisë, në bashkëpunim të ngushtë me Federatën Ruse po egërsohet nga dita në ditë, duke shpërndarë në mënyrë sistematike në çdo skaj të botës mesazhe të rrejshme,” tha Albin Kurti duke kërkuar nga përfaqësuesit diplomatikë të Kosovës që të punojnë në koordinim të ngushtë me Ministrinë e Punëve të Jashtme dhe Diasporës, për të shtyrë përpara interesat e vendit në arenën ndërkombëtare.

“Kjo shpërndarje e gjerë e përfaqësive përbën njëkohësisht edhe avantazh edhe sfidë. Avantazhi është se i mundëson shtetit tonë që të ketë 53 zëra të fuqishëm nëpër botë për t’i shtyrë përpara interesat më të rëndësishme të Kosovës dhe qytetarëve të saj. Sfida kryesore është se si të gjejmë një mënyrë që këta zëra tuaj të mos funksionojnë të pa ndërlidhur me njëri-tjetrin, por në harmoni të plotë si një kor i vetëm me ministrin këtu në Prishtinë në rolin e dirigjentit,” tha Kryeministri në detyrë, Albin Kurti, duke përfunduar:

“Në këtë projekt të unifikuar duhet të bashkëpunoni sa më ngushtë jo vetëm me ministrin por edhe me njëri-tjetrin. Urat e bashkëpunimit duhet të ndërtohen vazhdimisht gjatë gjithë vitit.”