BDI: Sërish atentat mbi Marrëveshjen e Ohrit
Bashkimi Demokratik për Inegrim ka reaguar kundër deklaratës së djeshme të Kryetarit të Kumanovës, Maksim Dimitrievskit, që bie ndesh me parimin e shumicës së Badenterit, që sipas këtij subjekti politik është vazhdim i një fushate të orkestruar nga qeveria aktuale dhe partnerët e saj për të rrënuar themelet e Marrëveshjes së Ohrit.
BDI thekson përmes një njoftimi, se deklaratat e djeshme e Dimitrievskit kundër shumicës së Badenterit s’është tjetër veçse vazhdim i një fushate të orkestruar nga kjo qeveri dhe partnerët e saj për të rrënuar themelet e ‘Marrëveshjes së Ohrit’ dhe për të kthyer shtetin mbrapa, në padrejtësi dhe përjashtim.
“Që nga dita e parë e mandatit, qeveria ka goditur shtyllat e barazisë: Shfuqizoi balancuesin dhe minoi përfaqësimin e drejtë të shqiptarëve dhe komuniteteve të tjera në institucionet shtetërore; Zhvlerësoi Marrëveshjen e Ohrit duke i besuar implementimin e saj Ivan Stoilkoviçit, një figurë me bindje të njohura antishqiptare dhe putiniste; Fshiu në mënyrë kundërkushtetuese dhe kundërligjore diasporën nga përllogaritja, duke cenuar përfaqësimin në këshillat komunalë në zonat me shumicë shqiptare; Zvogëloi shqiptarët në përllogaritjet zyrtare dhe heshti para diskriminimit të hapur; Zhvlerësoi Inspektoratin e gjuhëve duke ia hequr statusin e personit juridik, duke minimizuar rolin e tij dhe duke e barazuar me një sektor të zakonshëm në Ministrinë e Drejtësisë; Shndërroi Agjencinë për zbatimin e gjuhëve në një institucion inekzistent, pa asnjë funksion real, përveç faktit që Stoilkoviçi i mori hapësirat fizike,” theksohet në njoftim.
BDI vë thekson se tashmë Dimitrievski hap front të ri kundër Badenterit, mekanizmit kushtetues që garanton barazi dhe stabilitet në vend.
Ky subjekt politik kujton se nuk duhet harruar se Dimitrievski është i njëjti politikan që ua ndaloi përfaqësuesve të VLEN-it përdorimin e flamurit shqiptar dhe që sot tenton të relativizojë Marrëveshjen e Ohrit, duke e quajtur të përmbushur dhe të tejkaluar.
Ndaj, sipas BDI-së, kjo nuk është rastësi, është vazhdim i programit të VMRO-së, e cila para zgjedhjeve paralajmëroi hapur masa kundër multietnicitetit dhe Marrëveshjes së Ohrit.
