Gjykatës Kushtetuese, Presidentja e Kosovës: Për një Nënkryetar Parlamenti, nuk bllokohet shteti
Pas dorëzimit të komenteve në Gjykatën Kushtetuese lidhur me procesin e konstituimit të Parlamentit të Kosovës, Presidentja Vjosa Osmani tha se për pozitën e Nënkryetarit të Parlamentit po bllokohet shteti.
“Po synohet që për një nënkryetar, të bllokohet shteti në tërësi sepse një shtet pa institucione është shtet i dështuar,” tha Vjosa Osmani duke shtuar se bllokimi i konstituimit për shkak të moszgjedhjes së një nënkryetari, do ta cenonte në mënyrë serioze jo vetëm funksionalitetin institucional, por edhe vlerat dhe themelet mbi të cilat është ndërtuar Republika.
“Për ne ai pozicion i cili i takon komunitetit serb, mbetet për ta dhe askund s’do ta zë atë vend. Ai vend do të mbetet i zbrazët, thjesht do të plotësohet në një seancë të radhës pa bllokuar procesin e konstituimit,” tha Presidentja e Kosovës.
“Prandaj në kushtet ku bllokohet konstituimi i Kuvendit për një nënkryetar të vetëm përkundër faktit që Kryesia ka kuorum të mjaftueshëm dhe ka kryetar, dhe kur deputetët kanë kryer betimin, në ato momente pamundësohet përfaqësimi legjitim i qytetarëve në institucionin më të lartë përfaqësues edhe ushtrimi i sovranitetit,” tha Presidentja Osmani duke theksuar qartë se me të drejtat e komuniteteve nuk mund të abuzohet në një mënyrë që të shkelet edhe vet qëllimi i tyre.
“Është vlerësimi i yni që ushtrimi i kësaj të drejte, nëpërmjet së cilës po pretendohet të bllokohet konstituimi i Kuvendit të Kosovës, cenon të drejtat e të gjithë deputetëve duke ua mohuar ushtrimin e funksionit të tyre në një Kuvend të konstituuar dhe cenon të drejtat e të gjithë qytetarëve pa dallim etnie.”
Me këtë rast Presidentja e Kosovës rikujtoi se nuk është hera e parë që Lista Srpska është larguar nga institucionet, por kjo nuk e ka bllokuar shtetin.
“Sepse shteti duhet të ecë përpara. Ne kemi kërkuar nga Kushtetuesja që të mos lejojë që kushdo të ketë të drejtën e vetos mbi proceset jetike të shtetit. Veto mbi republikën nuk ka qenë asnjëherë qëllim i hartuesve e themeluesve të Kushtetutës. Duke ia dhënë një veto të tillë një partie që përfaqëson një komunitet, Republika do të zhvleftësohej në një copë letre në vend se të ishte në veprim të mbrojtjes së interesit të qytetarëve. Është në duart e kësaj Gjykate ta mbrojë shtetin,” tha Presidentja e Kosovës, Vjosa Osmani, duke siguruar ashtu sikurse e përcakton Kushtetuesja, se roli i Presidentit është të garantojë sigurinë dhe funksionimin institucional.
