Studentët e diplomuar në vitin 2017, 57% për juridik, ekonomik dhe shkenca sociale

Teksa tregu i punës kërkon punonjës në fason dhe call center, universitetet shqiptare, gati 60 për qind të diplomave i japin për ekonomistë, juristë dhe punonjës socialë.

Sipas të dhënave të INSTAT në vitin 2017, janë diplomuar në arsimin e lartë 35.173 studentë, ose 11,0 % më shumë se në vitin 2016.

Ndër të diplomuarit e këtij viti 64,1 % janë gra dhe 35,9 % janë burra. Të diplomuarit në programet Bachelor përbëjnë 58,1 % të studentëve të diplomuar gjithsej.

Fusha “biznes administrim dhe ligj”, shënon numrin më të lartë të të diplomuarve, me 29,6 %, ndjekur nga fusha “shëndet dhe mirëqenie” me 13,6 %, dhe “shkenca sociale, gazetari dhe informacion” me 12,2 %.

Në vitin 2017, të diplomuarit sipas fushave të studimit, mbajnë përqindje të ndryshme për burrat dhe gratë ndër të diplomuarit gjithsej. Fushat ku janë diplomuar më shumë gratë janë “arsim” me 80,5 %, ndjekur nga “shëndet dhe mirëqenie” me 76,9 % dhe “shkenca sociale, gazetari dhe informacion” me 75,0 %.

Bien të diplomuarit në arsimin e mesëm

Në vitin 2017 në arsimin e mesëm, u diplomuan 36.436 nxënës, duke shënuar një rënie prej 5,6 % krahasuar me 2016.

Raporti bruto i diplomimit (numri i të diplomuarve pavarësisht moshës në një nivel ose program të caktuar, të shprehur si përqindje e popullsisë në moshën e diplomimit teorik, për atë nivel apo program) për arsimin e mesëm është 80,1 %. Në arsimin e mesëm, u diplomuan 49,4 % djem dhe 50,6 % vajza.

Fushat në të cilat janë diplomuar më shumë burrat janë “shërbime” me 72,0 %, “inxhinieri, prodhim dhe ndërtim” me 60,2 %, dhe “bujqësi, pyje, peshkim dhe veterinari” me 57,7 %.

Ndërsa më 2017 në arsimin 9- vjeçar u diplomuan 36.546 nxënës, ose 96,4 % e nxënësve të klasës së nëntë të vitit shkollor 2016-2017, duke shënuar një rritje prej 1,4 pikë përqindje krahasuar me vitin paraardhës. Në këtë nivel arsimor, u diplomuan 52,7 % djem dhe 47,3 % vajza./Monitor/