Kurtit, Prattipati: Veprimet që dobësojnë stabilitetin, sfidë serioze për partneritetin tonë

E ngarkuara me punë në Ambasadën e Shteteve të Bashkuara në Prishtinë, Anu Prattipati, është shprehur e zhgënjyer më deklaratat e fundit të kryeministrit në detyrë Albin Kurti të bëra në mbledhjen e Këshillit të Përgjithshëm të Lëvizjes Vetëvendosje.

Në fjalimin e tij në këtë mbledhje Kurti hodhi akuza të forta ndaj Gjykatës Kushtetuese duke e quajtur “hije politike të opozitës” ndaj Vetëvendosjes.

Prattipati ka vlerësuar se deklaratat e Kurtit kanë rritur paqëndrueshmërinë dhe pasigurinë në Kosovë. 

“Jemi të zhgënjyer nga veprimet dhe deklaratat e fundit të kryeministrit në detyrë Kurti, të cilat kanë rritur paqëndrueshmërinë dhe pasigurinë në Kosovë. Këto veprime minojnë procesin politik, dobësojnë institucionet e Kosovës dhe përkeqësojnë tensionet ndëretnike,” tha Prattipati në një përgjigje për Kohën duke shtuar: 

“Ne jemi duke e shqyrtuar me kujdes përgjigjen tonë, por më lejoni të jem e qartë, çdo veprim që dobëson stabilitetin politik dhe ekonomik është një sfidë serioze për partneritetin tonë.”

Në mbledhjen e 59-të të Këshillit të Përgjithshëm të Vetëvendosjes, të mbajtur të dielën Kurti tha se “gjykata më e lartë në vend po funksionon si hije politike e opozitës ndaj Vetëvendosjes”. 

Akuzat janë bërë pas vendimit të Kushtetueses që ka vendosur masë të përkohshme përmes së cilës ua ka ndaluar deputetëve të ndërmarrin veprime si dhe ka ndaluar zhvillimin e ndonjë procedure për formimin e Qeverisë së re të Kosovës. 

Masa është në fuqi deri në fund të shtatorit. 

Albin Kurti tha se me këtë vendim gjykata i ka lënë 120 deputetë të vegjetojnë për 24 ditë. Faj për vonesën në formimin e institucioneve, sipas tij, ka edhe Kushtetuesja, me dinamikën e ngadalshme të punës, sipas tij.

“Sepse 5 nga 7 gjyqtarët e Gjykatës Kushtetuese janë zgjedhur në vitin e largët 2018 kur në pushtet ishte koalicioni i PAN-it me Listën Serbe. E pas vitit 2018, ne i fitojmë zgjedhjet për herë të parë në vitin 2019. Pastaj fitojmë zgjedhjet në herën e dytë në vitin 2021, e i fitojmë edhe sivjet për herë të tretë, por ja që ata ngelën të njëjtit aty në gjykatë, thua se është viti 2018,” tha Kurti.

Gjykata Kushtetuese i ka quajtur të pamatura deklarimet.

“Pavarësia e Gjykatës Kushtetuese nuk është privilegj i gjyqtarëve të saj, por është themel i shtetit të së drejtës. Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj. Çdo përpjekje për të ushtruar presion mbi gjyqtarët kushtetues përbën cenim të parimit themelor të ndarjes së pushteteve dhe minon besimin e qytetarëve në sundimin e ligjit dhe në vetë demokracinë,” thuhet në komunikatë./Koha/