Takimi Kurti-O’Malley, gatishmëri për thellim partneriteti

Duke vlerësuar lart bashkëpunimin e vazhdueshëm me ekipin e OKB-së në Kosovë, si partner të besueshëm në forcimin e qeverisjes dhe zhvillimin e qëndrueshëm, Kryeministri në detyrë Albin Kurti, në takim me Koordinatorin e ri për Zhvillim të Kombeve të Bashkuara në Kosovë, Stephen O’Malley, theksuan gatishmërinë për thellimin e partneritetit.

“Gjatë takimit u theksuan disa prej bashkëpunimeve më të suksesshme në luftën kundër korrupsionit, edukimin e hershëm, trashëgiminë kulturore e banimin social. U ritheksua gatishmëria e qeverisë për të thelluar partneritetin me UNKT në drejtim të: zhvillimit të kapitalit njerëzor përmes arsimit gjithëpërfshirës, shëndetësisë cilësore, mbrojtjes sociale, sundimit të ligjit e qeverisjes së mirë,” thekson Qeveria e Kosovës përmes një njoftimi për takimin ku Albin Kurti ka shprehur bindjen e avancimit të partneritetit ndërsa përfundoi:

“Udhëheqja e O’Malley do ta avancojë partneritetin ekzistues në një nivel edhe më të lartë gjatë ciklit të ri të planifikimit 2026–2030. Duke u bazuar në parimet e përbashkëta të gjithëpërfshirjes, barazisë gjinore dhe të drejtave të njeriut.”