Raporti me akuzat e Dick Marty, James Rubin: Kurrë s’doli asgjë nga ajo!

Pas marrjes në pyetje nga tre ekipet e Mbrojtjes dje, Ish-Nd/Sekretari amerikan i Shtetit, James Rubin, ka vazhduar sot dëshminë në Gjykatën Speciale në rastin Thaçi dhe të tjerët para prokurorisë dhe trupit gjykues.

Në fillim të dëshmisë së tij sot, James Rubin tha se nuk ka marrë pjesë çdo herë në takimet e udhëheqësve të UÇK-së, megjithatë tha se mund të ketë qenë pranë siç tha ai, sallës ku mbaheshin mbledhjet.

“Përgjithësisht kam pasur njohur për diskutimet lidhur me UÇK-në. Takime të gjata ka pasur, marrëveshje në mes të udhëheqësve të UÇK-s. Nuk jam i sigurt nëse kam qenë në atë zonë, por nuk flisja shqip. Ata mund të kenë biseduar gjëra që nuk i kam kuptuar, por nuk më kanë ndaluar të isha në atë dhomë ku mbaheshin mbledhjet apo takime,” tha ish-diplomati amerikan.

Zëdhënësi i Departamentit Amerikan të Shtetit gjatë kohës së luftës në Kosovë, James Rubin, tha sot para trupit gjykues se nuk i kujtohet nëse Jakup Krasniqi dhe Kadri Veseli ishin pjesë e delegacionit shqiptar në Rambouillet të Francës në vitin 1999.

“Nuk më kujtohen të gjithë emrat, sepse kjo ka ndodhur para 25 vjetësh,” tha ai ndërsa sqaroi se nuk ka informacion për dallimet brenda Ushtrisë Çlirimtare të Kosovës, kur është pyetur për një dokument në të cilin thuhej se Adem Demaçi e përshkruante Hashim Thaçin si zëdhënës.

Ish-Diplomati amerikan James Rubin, tha se një raport i vitit 1998 i OKB-së, nuk e përshkroi mirë situatën në Kosovë dhe ishte skeptik pasi, sipas tij, nuk ka qenë edhe aq i besueshëm.

“Kam lexuar një raport të  OKB-së për Kosovën, por kam qenë shumë skeptik për atë raport, sepse organet e OKB-së nuk e kanë përshkruar shumë mirë situatën shumë shpesh. Jo domosdoshmërisht ka qenë i besueshëm,” tha James Rubin.

Në atë raport, siç u citua e u lexua nga prokurori i Speciales, pretendohej se njerëz, pjesë e UÇK-së, rrëmbyen civilë dhe policë serbë.

Rubin: Nuk arritëm t’i vërtetonim akuzat për UÇK-në

I pyetur nga Prokurori rreth pretendimeve se Ushtria Çlirimtare e Kosovës ishte përfshirë në veprimtari kriminale dhe vrasje, Rubin tha se në përgjigjen e tij se Shtetet e Bashkuara kishin shqyrtuar këto akuza, por nuk kishin arritur t’i vërtetonin

“Ka patur pretendime dhe akuza për një vit, ne shikuam ato nuk arritëm t’i vërtetonim. Mendoj që po ata ishin një forcë qe duhej të merreshin parasysh dhe në konsideratë në terren dhe ne donim të krijonim një Kosovë më afatgjate, të kishim shkëmbime dhe të punonim me z. Thaçi,” James Rubin.

Prokurori i çështjes e pyeti me këtë rast nëse është e saktë që në vitet 1998 dhe 1999 mediat ndërkombëtare dhe organizatat tjera kishin publikuar raporte me pretendime të besueshme për krimet e kryera nga pjesëtarë të UÇK-së ndërsa James Rubin tha se nuk ekzistojnë prova apo informacione që mbështesin pretendimet se lidershipi i UÇK-së ka qenë i përfshirë në urdhra për vrasje apo krime të organizuara.

Akuzat e tilla, sipas tij, janë të pabazuara dhe nuk qëndrojnë pa fakte konkrete.

“Nuk ka asnjë informacion apo provë që të mbështesë pretendimet se udhëheqësit e UÇK-së kanë dhënë urdhra për vrasje apo janë përfshirë në krime të organizuara. Këto janë akuza të paprovuara. UÇK-ja vepronte në kushte represioni nga forcat serbe dhe nuk kishte një strukturë të mirëfilltë ushtarake,” tha ai duke shtuar se qëllimi i bashkësisë ndërkombëtare ka qenë të ndihmojë këtë forcë që të transformohet në një organizatë demokratike, proces i cili, sipas tij, është duke ndodhur tashmë me ndihmën e NATO-s dhe Kombeve të Bashkuara.

Në lidhje me akuzat për trafikim të drogës, Ish-Nd/Sekretari amerikan i Shtetit tha se nuk informacione të pavarura.

“Nuk kam asnjë konfirmim të pavarur për përfshirje të UÇK-së në trafikim droge, pavarësisht pyetjeve të vazhdueshme mbi këtë çështje!”

Ish-Diplomati amerikan, për Gjykatën Speciale: Kjo nuk është drejtësi

Ish-Diplomati amerikan James Rubin, tha para trupit gjykues se fakti që të akuzuarit kanë qenë në paraburgim për më shumë se 5 vjet, dhe fakti që ata janë dorëzuar vullnetarisht dhe fakti që janë mbajtur kaq gjatë më shqetëson mendoj se lidhet me politikën.

“Mendoj që jam munduar pa fund që të jem i disponueshëm për këtë gjykatë, kam shpenzuar qindra orë përgatitje, dhe ndjesia ime ishte se gjithë njohuritë ishin të pranishme në dokumente. Pikëpamjet e Prokurorisë nuk është se do të ndihmoheshin nga kontributi im.

Nëse keni nevojë për pyetje kam qenë këtu dje dhe sot. Fakti që të akuzuarit kanë qenë në paraburgim për më shumë se 5 vjet, dhe fakti që ata janë dorëzuar vullnetarisht dhe fakti që janë mbajtur kaq gjatë më shqetëson mendoj se lidhet me politikën. Më shqetëson fakti që dikush të jetë i paraburgosur për kaq gjatë, këta persona janë dhënë vullnetarisht, dhe kanë qenë bashkëpunues me Gjykatën.

Në rastin e të akuzuarve nuk e kuptoj pse është dashur të jenë në burg për 5 vjet, nuk e shoh si shtet të së drejtës, Albright nuk e ka pasur këtë drejtësi në mendje kur e ka incizuar Tribunalin e Hagës. Mua kjo më është dukur si fajësim politik për shkak se Hashim Thaçi ka qenë udhëheqës i UÇK-së, Duke qenë se kam parë nga afër liderët e UÇK-së dhe asnjë person tjetër nuk e ka pasur këtë mundësi, duke pasur ide të mirë të funksionit, për 3 ditë kam parë si janë sjellë ata, kush ishte përgjegjës, komandant, mbështetës. Duke pasur këtë njohuri mendoj se kjo ka qenë e gabuar, unë nuk jam jurist, kjo nuk është drejtësi,” tha Rubin.

Akuzat e Martyt, Rubin: Kurrë nuk doli diçka prej tyre!

Duke u përgjigjur në pyetjet nga Prokuroria dhe avokati i Ish-Presidentit, Luka Mishetiç, me ç’rast u përmend edhe raporti i Dick Martyt, në seancë u transmetua një video e James Rubin e shumë viteve më parë, në një tryezë të rrumbullakët ku flitej për akuzat ndaj UÇK-së dhe raportin në fjalë.

Ishte prokuroria që kundërshtoi relevancën e referimit të akuzave të Martyt, ku akuzohej UÇK-ja për trafikim organesh, por mbrojtja e Thaçit insistoi.

Mishetiq tha se Gjykata Speciale është ngritur saktësisht për ato akuza, dhe pyeti Rubinin se a e din çfarë ndodhi në fund të fundit me akuzat e Martyt, ai u përgjigj:

“Kurrë s’doli asgjë nga ajo!”

Duke fol për diskutimet në administratën amerikane të Bill Clintonit për armatosjen e UÇK-së, Ish-zyrtari i lartë i SHBA-së, tha se nuk kanë mundur t’iu thoshin luftëtarëve që nuk ju japim armë, sepse ju nuk jeni të organizuar”.

“Po bënim një gjykim sa i përket argumentit për armatosjen apo jo të UÇK-së. Dhe, ne kemi thënë se kjo nuk është ide e mirë, sipas nesh, sepse nuk ekziston një strukturë e mirëfilltë politike, ose nuk ka kontroll efektiv. Bëmë gjykimin tonë më të mirë, kemi bërë një vlerësim, duke marrë parasysh strukturën organizative të UÇK-së, duke marrë parasysh aspektin e kontrollit dhe komandës, që ne besonim që UÇK-ja nuk e kishte. Nuk kishte kontroll dhe komandë efektive në UÇK,” tha Rubin ndërsa sqaroi edhe njëherë përshtypjet e tij për Hashim Thaçin në periudhën e Konferencës së Rambujesë. Sipas Rubinit, Thaçi ishte personi kyç me të cilin ai duhej të punonte, në mënyrë që Marrëveshja të pranohej nga UÇK-ja.