Sulmet e Edi Ramës ndaj Drejtësisë, kreu i ILD: E papranueshme në çdo pikëpamje!
U bë kohë që sistemi gjyqësor është nën një trysni antikushtetuese, tha kreu i Inspektoriatit të Lartë të Drejtësisë, Artur Metani, pas zhvillimeve të fundit dhe sulmeve të Kryeministri Edi Rama ndaj gjyqtarëve e prokurorëve duke i konsideruar të papranueshme në çdo pikëpamje.
“U bë kohë që sistemi gjyqësor është nën një trysni, për mua antikushtetuese, për të ushtruar detyrën ose jo, në një formë të caktuar. Nga të gjithë. U bë kohë që fyerjet për magjistratët janë pjesë më e konsiderueshme e artikulimit kur vjen puna tek kritikat për pushtetin gjyqësor. Natyrisht, të papranueshme këto në çdo pikëpamje. Kjo i vë magjistratët në provë të vështirë. Por, testi i pavarësisë, i ndarjes se pushteteve dhe i shtetit te se drejtës, nuk është vetëm retorikë,” tha Artur Metani gjat gjatë një takimi të organizuar nga Inspektori i Lartë i Drejtësisë, në bashkëpunim me projektin Matra, të qeverisë së Mbretërisë së Holandës, ku u diskutua mbi çështjet e pavarësisë dhe përgjegjshmërisë së gjyqësorit.
Ndërkohë për sjelljet e gjyqësorit ndaj këtyre sulmeve, kreu i Inspektoriatit të Lartë të Drejtësisë këshilloi për vetëpërmbajtje:
“Ndryshe nga pushtetet apo institucionet e tjera, magjistratët dhe institucionet e pavarura të drejtësisë e kanë një lloj kufizimi, që vjen me detyrën për t’u treguar të përmbajtur, edhe kur sulmohen pa të drejtë. Mes zërave të fortë publikë, kjo i bën që të perceptohen si të dobët, por nuk është aspak ky rasti. Vetëpërmbajtja nuk duhet ngatërruar me dobësinë. Pavarësisht deklaratave të aktorëve të ndryshëm publikë, magjistratët nuk duhet të harrojnë se reagimet publike nuk janë pjesë e funksionit të tyre. Por, vetëpërmbajtja po! Vetëpërmbajtja nuk është dobësi e asnjë lloj natyre, por respekt për lirinë e shprehjes në demokraci, është largësi kushtetuese nga natyra politike e pushteteve të tjera”.
Por, Artur Metani tha se nuk duhet harruar për asnjë moment besimi i publikut ndaj gjyqësorit, pavarësisht kushteve në të cilat punon, mbingarkesë dosjesh, mungesë organike dhe presion prej sulmeve të herëpasherëshme.
“Duke mos harruar në asnjë moment të ditës sonë të punës, kushtet në të cilat punojnë magjistratët, ngarkesën e madhe të çështjeve gjyqësore, numrin e pamjaftueshëm të magjistratëve në sistem, rritjen e përdoruesve të sistemit gjyqësor, pritshmëritë e drejta dhe të padrejta nga sistemi gjyqësor, përsëri mendoj se besimi i publikut tek gjyqësori është vlera më e çmuar e drejtësisë, por dhe mbrojtja më e mirë e tij,” tha kreu i Inspektoriatit të Lartë të Drejtësisë, Artur Metani, duke këshilluar në fund për qëndrimin larg të magjistratëve nga deontologjia politike, me qëllim që të mos diktojë sjelljen e tyre ndërsa përfundoi:
“Deontologjia politike nuk duhet të diktojë sjelljen e magjistratëve. Në këtë rast, besoj se thelbi i shtetit ligjor dhe i vlerave evropiane është pikërisht mënyra sesi sillemi, edhe kur nuk biem dakord me vendimet e njëri-tjetrit.”
