Takim me Presidentin Trump, Osmani: Partneriteti me SHBA, aty rreh zemra e lirisë sonë
Një takim i planifikuar si protokollar me Presidentin e SHBA, Donald Trump u shndërrua në një bisedë të gjatë dhe shumë përmbajtësore, tha Presidentja e Kosovës, Vjosa Osmani, duke e falënderuar Presidentin Trump për interesimin e veçantë që tregoi rreth rolit të pazëvendësueshëm të Amerikës në Kosovë dhe në rajonin tonë, si dhe për angazhimin e tij të palodhshëm për paqe!
“Miqësia dhe aleanca me Shtetet e Bashkuara mbetet boshti i pathyeshëm. Kosova do të jetë gjithmonë në anën e demokracisë, lirisë dhe partneritetit me SHBA-të, sepse pikërisht aty rreh zemra e lirisë sonë,” u shpreh Presidentja e Kosovës, Vjosa Osmani, përmes rrjetit social Facebook pas takimit me Presidentin amerikan Donald Trump në New York.
Ndryshe, Presidentja e Kosovës, Vjosa Osmani po qëndron në New York ku po zhvillon punimet Asambleja e Përgjithshme e Kombeve të Bashkuara ndërkohë Presidentja Osmani po zhvillon takim eme liderët më të njohur botërorë.
Në pritjen e organizuar nga Presidenti Trump më 23 shtator, Presidentja Osmani u takua edhe me Sekretarin amerikan të Shtetit, Marco Rubio.
Ndërkohë në Shtetet e Bashkuara po qëndron edhe Kryeministri në detyrë i Kosovës, Albin Kurti, dhe ministrja në detyrë e Punë të Jashtme dhe Diasporës, Donika Gërvalla.
