Kërcënim me bombë, mbyllet Oktoberfest në Munich
Një kërcënim me bombë është raportuar në Oktoberfest në Munich. Festivali do të mbetet i mbyllur deri të paktën në orën 5 pasdite sot. Kërcënimi thuhet se lidhet me një operacion të madh policor në një shtëpi në veri të Munichut.
Pas një zjarri dhe shpërthimi në një shtëpi në Munich, policia po heton lidhjet e mundshme me Oktoberfestin, raporton DW.
“Lidhjet e mundshme me vende të tjera në Munich po hetohen, përfshirë Theresienwiesen, vendin ku mbahet Oktoberfesti,” tha policia përmes rrjetit social X duke përfunduar:
“Prandaj, hapja e ambienteve të festivalit po shtyhet.”
Kryebashkiaku Dieter Reiter konfirmoi se ambientet e festivalit do të mbeten të mbyllura deri të paktën në orën 5 pasdite, raportuan mediat gjermane. Sipas gazetës Süddeutsche Zeitung, kishte një kërcënim të konfirmuar me shpërthim kundër Oktoberfestit.
“Nuk mund të marrim rrezikun e hapjes së Oktoberfestit,” u shpreh Kryetari i Bashkisë Munich.
Shpërthim në mëngjes
Mbyllja e Oktoberfest lidhet me një shpërthim që ndodhi këtë mëngjes në lagjen Lerchenau.
“Ka një letër nga autori i krimit nga ky mëngjes,” tha kryebashkiaku Reiter.
Sipas policisë, raporton DW, një zjarr shpërtheu në një shtëpi në veri të Munichut këtë mëngjes, i ndjekur nga shpërthime. Në shtëpi u gjetën edhe pajisje shpërthyese të improvizuara.
