Albin Kurti: Askush s’e zë karrigen e serbëve, dëm që nuk po funksionon Parlamenti

Kryeministri në detyrë i Kosovës, Albin Kurti, ka deklaruar se mosfunksionimi i Parlamentit përbën një humbje kohe dhe dëm për vendin, duke theksuar se Kosova nuk ka kohë për të humbur dhe se institucionet duhet të rifillojnë punën sa më parë.

Procesi për zgjedhjen e Kryetarit dhe katër Nënkryetarëve të Parlamentit tashmë është përmbyllur, por ka mbetur i pazgjedhur nënkryetari nga komuniteti serb.

“Konsideroj që është humbje kohe dhe dëm që nuk po funksionon Kuvendi i Kosovës. Kuvendi i Republikës e ka zgjedhë kryetarin Dimal Bashën, i ka zgjedhë katër nënkryetarët Albulena Haxhiun, Vlora Çitakun, Kujtim Shalën dhe Emilja Rexhepin askush nuk është duke e zënë karrigen e zbrazët për nënkryetarin nga radhët e komunitetit serb. Është dashur të vazhdoj puna e Kuvendit sepse shteti i Kosovës nuk ka kohë për të humbur,” tha Albin Kurti pas inaugurimit të një çerdheje në Shtime duke u shprehur i prerë se votimi për Emilja Rexhepin është përfundimtar dhe nuk mund të anulohet, ndërsa mbetet vetëm një vend bosh për përfaqësuesin serb në Kryesinë e Parlamentit.

“Emilja Rexhepi është Nënkryetare e Kuvendit, dhe votimi për të nuk mund të anulohet. Prandaj kemi ngelur vetëm te nënkryetari i fundit nga komuniteti serb. Por mos harroni, nuk janë serbë vetëm ata të Listës Serbe, serb është edhe Nenad Rashiç,” tha Kurti duke rikujtuar se kandidati i Listës Srpska ka marrë vetëm 10 vota, ndërsa Nenad Rashiç ka marrë 56, i bindur se me pak mbështetje nga ish-opozita, ky ngërç do të ishte tejkaluar.

“Vetëm pesë vota t’ia jepnin këta 52 që janë të opozitës, sot nuk ishim duke i bërë këto pyetje dhe këto përgjigje,” tha Kryeministri në detyrë i Kosovës, Albin Kurti.

Ndryshe, më 30 shtator, Gjykata Kushtetuese ka publikuar njoftimin për vendimin për seancën konstituive pas ankesës që e kishte marrë nga Lista Serbe, konkretisht lidhur me votimin ndaras të kandidatëve për nënkryetarë të Kuvendit nga radhët e pakicave.

Në fund të gushtit, kryeparlamentari Dimal Basha e ka shpallur të konstituuar legjislaturën e nëntë, edhe pse dështoi votimi për një nënkryetar nga komuniteti serb.

Gjykata Kushtetuese është shprehur se seanca konstituive nuk ka përfunduar atë ditë e në arsyetim ka dhënë moszgjedhjen e nënkryetarit serb.

Në vendim, Gjykata nuk e ka konsideruar në asnjë pikë jokushtetuese ndarjen e votimit për nënkryetarët nga komunitetet.

Në vendimin e saj, Gjykata Kushtetuese ka urdhëruar të gjithë deputetët që gjatë procedurës së zgjedhjes së Nënkryetarit të Parlamentit nga radhët e deputetëve të komunitetit serb, të ushtrojnë funksionin e tyre në interesin më të mirë të Kosovës dhe në pajtim me Kushtetutën.

Gjykata Kushtetuese nuk e ka publikuar ende aktgjykimin e plotë.