Pas pezullimit të Dekretit, kreu i KQZ: Më 9 nëntor zgjedhjet në 5 bashki, përveç Tiranës
Pas pezullimit të zgjedhjeve të pjesshme lokale në Tiranë nga Gjykata Kushtetuese, kreu i Komisionit Qendror të Zgjedhjeve, Ilirjan Celibashi, tha se më 9 nëntor do të mbahen zgjedhjet në 5 bashki, përveç Tiranës
“Vijon normalisht procesi i përgatitjeve për zgjedhjet në 5 bashkitë e tjera. Çdo veprim i KQZ i çdo natyre apo angazhimi tjetër që lidhjet me zgjedhjet në Tiranë është pezulluar ditën e djeshme. Pra në datën 9 nëntor është e sigurtë që do të zhvillohen zgjedhjet në 5 bashkitë e tjera, Vlorë, Berat, Tepelenë, Cërrik dhe Mat.
Në momentin që Gjykata Kushtetuese pezullon atë pjesë të dekretit, është sikur ai dekret të mos ekzistojë përkohësisht për atë pjesë që ka urdhëruar Gjykata Kushtetuese. Do të shkelnim Kushtetutën dhe Kodin zgjedhor nëse KQZ do vijonte me procesin përgatitor për zgjedhjet në Tiranë,” tha Celibashi ndërsa i pyetur për skenarët e mundshëm në rast se Kushtetuesja më 31 tetor vendos shpalljen të vlefshëm të Dekretit të Presidentit të Republikës edhe për Tiranën, kreui i KQZ rga se kjo mbetet për t’u parë.
“Se çdo të ndodhë nëse Gjykata Kushtetuese merr një vendim apo një tjetër këtë nuk dua ta them se ndryshe do isha një komentator. Si kreu i KQZ vlen të them: Gjykata Kushtetuese ka caktuar datën 31 për të vendosur mbi këtë çështje, në çdo lloj versioni qoftë KQZ qoftë Këshilli i Ministrave apo Presidenti, do të shohin nëse do të ketë vend apo jo për të ndërmarrë ndonjë veprim të caktuar. Nuk preferoj të flas ç’duhet të bëhej në një situatë hipotetike.”
Ndryshe, dje Gjykata Kushtetuese vendosi të pezulloj e Dekretin e Presidentit të Republikës për zhvillimin e zgjedhjeve të pjesshme në Bashkinë e Tiranës.
“Pezullimi i efekteve juridike të dekretit të Presidentit të Republikës nr. 350, datë 01.10.2025, për pjesën që cakton datën e zgjedhjeve vendore në Bashkinë Tiranë, deri në marrjen e vendimit përfundimtar nga Gjykata Kushtetuese.”
Vendimi erdhi pas kërkesës së paraqitur nga Erion Veliaj, i cili kundërshton si shkarkimin nga detyra, ashtu edhe dekretimin e datës së zgjedhjeve të reja.
Kërkesa e Veliajt kishte si objekt shfuqizimin e vendimit të Këshillit të Ministrave për shkarkimin e tij nga detyra si Kryetar i Bashkisë Tiranë, si dhe anulimin e dekretit të Presidentit për caktimin e zgjedhjeve të reja. Ai argumenton se këto akte janë në kundërshtim me nenin 115, pika 2 dhe 3 të Kushtetutës së Shqipërisë.
