Konstituohet Parlamenti i Kosovës, Nenad Rashiç zgjidhet Nënkryetar! Pritet formimi i Qeverisë
Me 71 vota për, 9 kundër dhe 24 abstenime, Nenad Rashiç është zgjedhur Nënkryetar i Parlamentit nga radhët e komunitetit serb. Për Rashiçin kanë votuar deputetët e Lëvizjes Vetëvendosjes dhe disa deputetë të Lidhjes Demokratike të Kosovës. Deputetët e Partisë Demokratike të Kosovës kanë abstenuar.
Me votimin e sotëm është konstituar Parlamenti i Kosovës.
Pas votimeve për nëntë kandidatët nga Lista Srpska për postin e Nënkryetarit të Parlamentit nga radhët e komunitetit serb, ku asnjëri prej tyre nuk mori besimin e deputetëve të Parlamentit të Kosovës, Kryetari i Parlamentit, Dimal Basha, tha se nuk ka nevojë të hidhet shorti, pasi ka mbetur vetëm një kandidat për votim nga komuniteti serb, Nenad Rashiç.
Deputeti serb, Nenad Rashiç, është futur si kandidat për Nënkryetar të Parlamentit pa propozim direkt nga përfaqësuesi i komitetit serb. Lista Srpska ka refuzuar ta propozojë si kandidat serb pasi ka shfrytëzuar emrat e deputetëve të grupit të vet. Kryeparlamentari Dimal Basha tha se sipas procedurave dhe rregullores Nenad Rashiç do të votohet.
Kështu, me konstituimin e Parlamentit sot u hap dhe rruga për formimin e qeverisë, ku Presidentja pritet ti jep partisë fituese të zgjedhjeve të 9 shkurtit mandatin për krijimin e Qeverisë së re.
Nëse koalicioni fitues i udhëhequr nga Lëvizja Vetëvendosje, bashkë me Lëvizjen Guxo dhe Alternativën,nuk arrinë të siguroj të paktën 61 vota në Parlamentin me 120 deputetë, për të krijuar qeverinë, Presidentja e Kosovës brenda dhjetë ditësh do të ftojë partitë për konsultime dhe të vendosë të mandatuarin që ka shanset më të mëdha për të formuar Qeverinë.
I mandatuari ka më pas 15 ditë të tjera kohë për të dorëzuar përbërjen e re të kabintetit qeveritar në Parlament.
Nëse as pas përpjekjes së dytë Qeveria nuk mund të formohet, Presidentja e Kosovës, Vjosa Osmani, duhet të shpallë zgjedhje të reja, që duhet të mbahen brenda 40 ditësh.
Ndryshe Gjykata Kushtetuese e Republikës së Kosovës shpalli aktgjykimin e plotë me të cilin ka konstatuar se Seanca Konstituive e Parlamentit të Kosovës, e filluar më 15 prill 2025, nuk ka përfunduar si rezultat i moszgjedhjes së nënkryetarit të Kuvendit nga radhët e komunitetit serb.
Në vendimin e publikuar, Gjykata thekson se Parlamenti nuk është konstituuar në pajtim me nenin 66 dhe nenin 67 të Kushtetutës së Republikës së Kosovës, të cilat përcaktojnë zgjedhjen dhe mandatin e Kryetarit dhe Nënkryetarëve të Kuvendit.
Gjykata ka urdhëruar që Seanca Konstituive të përfundojë brenda 12 ditëve nga hyrja në fuqi e këtij aktgjykimi, në përputhje me afatin kushtetues dhe me aktgjykimet e mëhershme në rastet KO193/25 dhe KO196/25.
Po ashtu, Gjykata Kushtetuese ka kërkuar nga të gjithë deputetët e Parlamentit që gjatë procesit të zgjedhjes së nënkryetarit nga komuniteti serb të ushtrojnë funksionin e tyre kushtetues “në interesin më të mirë të Republikës së Kosovës” dhe në përputhje me Kushtetutën dhe Rregulloren e Parlamentit.
