Nëntori 3 në Aeroportin e Vlorës
nga Agim Popoci
Shqiptarët janë rritur duke parë sakrificat për aktin e shpalljes së pavarësisë tek Nëntori 2, ku ju doli para syve një kosovar trim me emrin Isa Boletini!
Por, ky trim nuk ishte rastësisht me veshje kombëtare, tirqi dhe plis, kështu u rrit dhe u krijua në sy të shqiptarëve modeli i një kosovari, pa ju thënë se në atë godinë ku Ismail Qemali në Vlorë ngriti flamurin ishin firmëtarë edhe intelektualë nga Kosova si Rexhep Mitrovica, Bedri Pejani ose Sali Gjuka!
Edhe kur i hoqën tirqit dhe i vunë kollaren na u shfaq një njeri që flet me mendjen e Enver Hoxhës dhe e quanin Rexhep Qosja, pas të cilit do vijnë ca kosovarë që prodhonin aranxhata, byrek, qofte e akullore, por intelektual, jo se jo!
Në momentin që guxuan të shkelin në këtë tokë ca shqiptarë të Kosovës për të bërë biznes i bënë pis më shumë se lumin e Lanës, deri sa u munduan ti fusin që të gjithë në gropën e Hajdin Sejdisë, madje aty i gjetën vendin edhe modelit të vetëm bankar që i mbijetoi kohës së piramidave, Dardania Bank!
Në vizita turistike i pranuan që të gjithë, edhe shqiptarin më të pasur që i thurnin lavde se ka bërë kambizëm për Xhaxhin Enver, Behgjet Pacollin, por, jo për të bërë edhe biznes!
Përpjekjet e të gjithë atyre që nuk ishin pa “tirqi dhe plis” për investime në bregdetin shqiptar nuk i pranuan dot, dhe, në momentin kur Behgjet Pacollli gjykoi se ishin pjekur kushtet dhe mund t’ia fillonte me një medie, e zhytën më keq se në Gropën e Hajdin Sjedisë, që ishte dhe mbeti sinonim i biznesit kosovar ndonëse ai rezultoi si pronar i vërtet, dhe, të gjithë iu turrën për ta blerë!
Behgjet Pacolli gjithçka mund të ishte në Tiranë, por jo dhe pronar i një medie të suksesshme si TV Alsat, dhe përkundër faktit që si fis e kishin ndjekur Nëntorin 2, u pa se nuk e kishin kuptuar pse Rexhep Mitrovicën, Bedri Pejanin ose Sali Gjukën nuk duhet ti shikonte asnjë shqiptar në ato çaste emocionale, ku duhet të shfaqet se s’bënë vetëm një njeri, në dukje, katunar kosove!
Madje, nuk i bëri përshtypje as fakti se për njeriun me tirqi dhe plis kishte vend në këtë akt historik të qëndisur në Nëntorin 2, por jo dhe për firmëtarin, hafizin e njohur Dr.Myrteza Ali Struga, i cili shërbeu në Tiranë si mjek dhe farmacist ku dhe vdiq vitin 1937, por, kjo ishte e kot për komunistët, sepse ishte nga Struga! Pa harruar Nuri Sojliun nga Struga, dhe, Zyhdi Ohri nga Ohri!
Drejt Nëntorit 3, duke shkelur në një fushë të minuar biznesi, Behgjet Pacolli filloi të prezantohej në opinionin shqiptar si njeriu që kishte bashkëpunuar dhe korruptuar Presidentin e Rusisë, Boris Jelcin, dhe nuk dihet pse, ai nuk e kuptoi se këtu ishte i padëshirueshëm edhe kur e liroi kosovaren, Shqipe Hebibi, që ishte marrë peng në Afganistan! Mediat që edhe sot në tërësi kontrollohen nga Sigurimi i Shtetit, nuk patën mëshirë as për Anetta Flangian nga Irlanda e Veriut dhe diplomatin nga Filipinet, Angelito Nayan, të cilët së bashku me Shqipen ishin në Afganistan për të mbikëqyrur zgjedhjet e 9 tetorit 2004; Por, filluan të flasin për pasurinë e Behgjet Pacollit, duke i bërë me gisht talebanëve gjahun që ata kishin në Kabul dhe po u shkiste nga dora!
Shumë shpejtë, Behgjet Pacolli e hoqi qafe TV Alsatin, këtë gurë të rëndë në qafë të vetë që vetëm e bëri pis, si me betejën e humbur për ta administruar ashtu dhe “ndihmën” e strukturave paramilitare që të futet në pronën e tij, të cilën e kishte paguar 7 milionë euro.
Pandehur, sipas rrëfimit të mediave të Tiranës, rezultoi se mashtruesi ishte mashtruar, por blerësi i radhës së këtij televizioni mbarëkombëtar e ndihmoi vetëm t’i bëjë dush vetes për këtë përvojë të pistë, por jo dhe ti shpëtoi dushit të ftohtë të medias që nuk ia hoqën dot llagapin e mashtruesit dhe bashkëpunëtorit të Rusisë!
Fjalët e bukura të Presidentit të Shoqatës Dante Alighieri, ish-ministrit të Bashkëpunimit Ndërkombëtar të Italisë, dhe drejtuesit të Sant Egidios, profesor Andrea Riccardi, ishin të kota edhe pse rrëfente kohën e viteve ’80-të kur ai dhe Pacolli vizitonin Tiranën dhe qëndronin në Hotel Dajt, sepse “mashtruesi Behgjet Pacolli” kishte lëshuar rrënjë të thella në mendjen e shqiptarëve!
Në Shqipëri nuk u prit me ndonjë habi të madhe kur Gjykata Kushtetuese e shkarkoi nga posti i Presidentit të Kosovës, as atëherë kur si ish-presidenti u fut në bagazhin e makinës së Presidentit të Kosovës, Hashim Thaçi, pasi kishte takuar Edi Ramën në Kukës, sepse kjo ishte figura për Behgjet Pacollin në sytë e çdo qytetari, arsye kjo që nuk u vlerësua as kur ndihmoi me 1 milion euro të pastrehët e mbetur nga tërmeti shkatërrimtar i vitit 2019!
Shumica e mediave e trajtuan si qokë për Edi Ramën dhe jo si humanizëm, por, kjo nuk e pengoi biznesmenin Behgjet Pacolli që të vazhdoj të kërkoj mënyrën për të investuar; Dhe, e gjeti vendin dhe mënyrën ndonëse më të kontestuarën të mundshme, pa e respektuar faktin pse rrugës për në këtë vend ngeci karroca e Dylit; Sepse, vetë e kishte ndarë mendjen, do të ndërtoj Aeroportin e Vlorës!
Këtu nisi dhe Nëntori 3, me një shqiptar të Kosovës pa tirqi dhe plis, por me një shpurë bashkëpunëtorësh gjytyryma, që e ndjekën këmba këmbës nga dita e parë që shkeli në tokën shqiptare, dhe, me dorën e komunistëve i shkaktuan vetëm dëm dhe dhimbje!
Koncesionin ndoshta nuk ia kishte shpjeguar njeri, por biznesmenit që iu kishte pranuar rrëfimi se i kishin marrë Fabrikën e Tullave në Skenderaj me vlerë prej 2 milionë euro, dhe aksionet e Hotel Grand me vlerë prej 7 milionë euro, u gjykua se ishte e lehtë t’i futej dora në xhep, ndonëse ishte vetëpranuar në Tiranë se ka korruptuar Jelcinin dhe nuk donin t’ia dinin për pafajësinë e tij në këtë rast!
Shpërthyen në media rrëfime të ndryshme spakiste se si ka mashtruar Behgjet Pacolli me turkun famëkeq për të ndërtuar Aeroportin e Vlorës, nuk munguan as superlativat për ndershmërinë e partnerit të tij në këtë biznes, “rastësisht” shok i Zv.Kryeministres Belinda Balluku dhe të kudondodhurit Taulant Balla, Valon Ademi, por, e gjitha kjo është e parëndësishme pavarësisht fjalëve të mëdha që nxjerrin nga goja avokatët e Pacollit!
Pse ishin dhe janë të nderuar Miladin Popoviçi dhe Dushan Mugosha në Tiranë, dhe nga mëngjesi deri në darkë përbaltet figura e patriotëve të mëdhenj Rexhep Mitrovica e Xhafer Deva, kjo duhej ti interesonte Behgjet Pacolli para se të vinte këmbën në këtë moçal shqiptar që vazhdon dhe kutërbon gjak!
Pse ishte dhe është i nderuar biznesmeni Samir Mane edhe kur bashkëpunon me bashkëpunëtorin më të ngushtë të kriminelit Slobodan Milosheviç, Miroslav Mishkoviç, kjo mund të ishte e parëndësishëm për një katunar të Nartës, por jo për vetë Behxhet Pacollin kur ky njeri i bleu dhe i shiti QTU-në, të njëjtit njeri, Samir Manes!
Pse figura e tij bëhet pis edhe kur investon 100 milionë euro për Aeroportin e Vlorës, Behgjet Pacolli duhet t’ia drejtoj gishtin vetes dhe askujt tjetër! Nëse i ka shkuar në mëndje Pacollit se mund të bëhet Samir Mane në Shqipëri vetëm pse ka para, ndoshta edhe më shumë se ai, gabohet rëndë!
Nëse pronari i Viva Fresh, Xhevdet Rexhepi, mund të blejë rrjetin e supermarketeve Spar të Sami Manes, dhe nuk e konteston njeri, kjo nuk do të thotë se kemi të bëjmë më një blerje qelibar, por për blerjen e një prone të mikut të Kryeministri Edi Rama! Kaq e thjeshtë është!
Ose, futja e Shkëlqim Devollit me Birrën Peja pa akcizë duke shkatërruar industrinë shqiptare të birrës! Nëse Behgjet Pacollit nuk i ka interesuar futja në tregun e birrës së një biznesmeni nga Peja, të paktën duhej të ishte kurioz pse Bedri Pejani u shkelë me dy këmbë në Nëtorin 2, aty ku ishte përfaqësues i Plavës, Gucisë, Gjakovës dhe Pejës, dhe u arrestua nga Sigurimi i Shtetit në vitin 1945 për t’ju dorëzuar autoriteteve jugosllave!
Dhe, nëse bashkëpunëtorët e tij në Shqipëri, gjytyruma të dorës së parë, mund ta kenë këshilluar të përqendrohet vetëm te biznesi pa u marrë me të kaluarën, Behgjet Pacolli duhet të ishte kurioz pse i hiqet akciza birrës dhe jo patateve, ku me një akcizë të tmerrshme prej 0,5 euro është bllokuar në Shqipëri tregtimi i Patates së Pestovës, brend kosovar ky i njohur edhe në tregun evropian, ndërkohë tregu shqiptar përmbytet me patate nga Egjipti!
Nëse vazhdojmë me renditjen e Pse-ve të tjera, Behgjet Pacolli vetëvetiu do të mbërrij te partneri i tij i biznesit, Valon Ademi, Aeroporti i Vlorës, dhe, Nëntori 3, ku nuk dihet vetëm se karrocën e kujt do ta thejë Edi Rama!
Për Drejtësinë, sot, për këtë rast është vonë sepse edhe vetë Behgjet Pacolli është zhytur në llum!
Thjeshtë, nuk e ka respektuar atë që thotë themeluesi i sistemit Scrum, Jeff Sutherland; Njeriu që shpiku njërin ndër sistemet më të suksesshme me një ekip ndërfunksional që krijon një listë të prioriteteve për të punuar me tre role specifike, Pronarin e Produktit, Zhvilluesin dhe Mjeshtrin, ka vetëm një mesazh që ky sistem të funksionoj:
Pa mbeturina. Mos u bëjë mbeturinë, dhe as mos lejo një sjellje të tillë!
