Të hënën, Berisha: Dita e fillimit të Parlamentit para Kryeministrisë!

Dita e hënë do të jetë e fillimit të parlamentit para kryeministrisë të qytetarëve dhe parlamentarëve, tha Kryetari i Partisë Demokratike, Sali Berisha, ndërsa paralajmëroi dhe një protestë kombëtare!

“PD ndërmerr tani një fillim të ri, një analizë të plotë të gjendjes në vend, të situatës, të zgjedhjeve dhe ecën në bindjen më të thellë se diktatura autoritare e Edi Ramës, narkoshteti i tij, ose ndaj kësaj narkodiktature ka vetëm një rrugë, protestë, protestë dhe vetëm protestë,” tha Sali Berisha duke saktësuar se Partia Demokratike tashmë është hedhur në një betejë të gjithanshme me regjimin.

“Do të jenë deputetë dhe qytetarë. Natyrisht kjo është një kohë që PD është e detyruar të punojë njëkohësisht në shumë plane.
Ne do fillojmë tani takimet dhe analizat në çdo qelizë tonën.
Deputetët do të jenë edhe në platformë, edhe në komisione, edhe në parlament, do jenë edhe në takime me qytetarët.
Pra, cila do jetë skedula? Do bëhet dhe do të kombinohen me një fjalë.
Unë nuk mund të them se të gjithë deputetët do jenë aty, në rast se deputetët kanë takime të caktuara me elektoratin, përparësi absolute do kenë takimet me elektoratin dhe nuk mund t’u devijojnë.
Pra, ne tani jemi hedhur në një betejë të gjithanshme me regjimin,” tha lideri i opozitës duke bërë të ditur se do të kërkohet dorëheqja e menjëhershme e ministres së Brendshme, Albana Koçiu, dhe, ministrit të Mbrojtjes, Pirro Vengut.

“Sigurisht që, opozita do kërkojë, por dorëheqjen Pirro Vengut ia ka kërkuar edhe vetë Edi Rama.
Por Pirro Vengu nuk ia fishkëllon Edi Ramës, nuk e pyesin aty më.
Natyrisht ne do kërkojmë…
Do kërkojmë edhe dorëheqjen e menjëhershme të kësaj ministreshës, e cila është me probleme madhore dhe ne do kërkojmë largimin e saj.
Natyrisht nuk kam prova se kjo është e përfshirë në skenarin e ekzekutimit të Danit në vendin më të sigurt, se aty janë profesionistë të tjerë që hyjnë në ato organizime, por mënyra se si reagon kjo dhe si sillet kjo, e bën përgjegjëse për të gjitha këto dështime që ndodhin.”

Në fund, Kryetari i Partisë Demokratike, Sali Berisha, paralajmëroi protestë kombëtare ndërkohë do të përcaktohet skenari dhe koha e mbajtjes.

“Protesta kombëtare do përcaktohet skenari. Ajo do thirret në momentin e duhur.
Fillimi është ky me këtë parlament-protestë para kryeministrisë.
Dhe pastaj do punohet për thirrjen e një proteste të përgjithshme, skenari i të cilës do përcaktohet.”