Gjenerali Clark: Hashim Thaçi nuk është përgjegjës për aktet individuale të dhunës ose të hakmarrjes!

UÇK nuk ishte terroriste pasi pjesëtarët e saj luftuan për lirinë e tyre, tha Gjenerali amerikan në pension, Wesley Clark, në mbyllje të dëshmisë së tij para Gjykatës Speciale ku përsëriti se Hashim Thaçi nuk mban përgjegjësi për aktet e dhunës apo hakmarrjes që kanë ndodhur në Kosovë.

Gjenerali Clark: UÇK-ja nuk ka kryer spastrim etnik

Gjenerali Clark i mbeti besnik deklaratave të mëparshme se dhunën në verën dhe vjeshtën e vitit 1999 në Kosovë e shihte si një konflikt shumë personal mes fqinjëve, për të cilën udhëheqësit e UÇK-së nuk kishin përgjegjësi.

I pyet për një deklaratë në gazetën Shekulli në vitin 1999, ku kishte thënë se nuk kishte prova se UÇK-ja ka kryer spastrim etnik të serbëve, Clark tha:

“Unë nuk kam prova e as dëshmi që UÇK-ja ishte prapa kësaj, por kam indikacione që dëshmojnë të kundërtën,” tha Clark duke iu referuar pretendimeve të asaj kohe për dëbimin e rreth 170.000 serbëve.

Më pas prokurori Halling e lexoi një përmbledhje të komandantit të KFOR-it, Klaus Reinhardt, (1999-2000), i cili kishte folur në një konferencë për media me Hashim Thaçin, ku kishte shprehur shqetësim për gjendjen në Luginën e Preshevës dhe e kishte dënuar përdorimin e dhunës atje.

Gjenerali Reinhardt tha se “Thaçi e akuzoi palën serbe që kishte filluar dëbimin e shqiptarëve dhe pretendoi se ata ishin detyruar të iknin nëpër bjeshkë me gjësendet e fundit të tyre dhe nuk e tha asnjë fjalë për t’u distancuar nga UÇPMB-ja dhe nuk foli për sigurinë. Ai e bëri të kundërtën duke folur rrejshëm dhe duke bërë propagandë”.

“I thashë që keqpërdori besimin tim dhe i thashë që më ka zhgënjyer shumë dhe se nuk do të dalë më para kamerave më te. Gjenerali Clark po ashtu më tha se ishte i inatosur, sepse Thaçi i kishte premtuar diçka krejt tjetër”.

I pyetur nëse i kujtohet kjo ngjarje e përshkruar nga Reinhardt, Clark tha: “Po, më kujtohet,” por, i pyetur nëse është përshkrim i saktë, Clark shtoi:

“Nuk kam qenë atje dhe nuk e di çfarë ka ndodhur. Por, e di që ishte një situatë ku po bëhej kalimi i UÇK-së nga një organizatë ushtarake dhe rezistence në një person që kërkonte të siguronte të ardhmen politike për veten dhe Kosovën.”

“Unë kam lexuar që ka pasur dhunë ndaj shqiptarëve në Luginën e Preshevës,” tha Clark.

Sa për dijeni, UÇPMB, apo Ushtria Çlirimtare për Preshevë, Medvegjë dhe Bujanoc, ishte një grup i armatosur shqiptar që veproi në Luginën e Preshevës, Preshevë, Medvegjë dhe Bujanoc, gjatë viteve 2000–2001.

Ajo u shpërbë pas marrëveshjes së Konçulit në vitin 2001, ku pjesëtarët e saj u çarmatuan nën mbikëqyrjen e KFOR-it dhe NATO-s.

Prokurori Halling i bëri pyetje Gjeneralit Clarkut edhe për deklaratat e tij para Senatit amerikan më 1999 dhe 2000 lidhur me vendosjen e trupave paqeruajtëse të NATO-s në Kosovë dhe shqetësimet e tij të shprehura në atë kohë se Serbia mund të tentonte të rikthehej në Kosovë.

Clark sqaroi se nuk mendonte se Serbia do të kthehej në Kosovë, por se si Gjeneral ishte puna e tij të vlerësonte rreziqet dhe rrethanat e asaj kohe.

“Sepse ende nuk kishte një marrëveshje. Në fakt, nuk pati marrëveshje derisa Kosova u pavarësua më 2008!”

Për cilësimet që ia bënin ndërkombëtarët Ushtrisë Çlirimtare të Kosovës në fillimet e saj, prokurori Halling i kërkoi Gjeneralit Clark të tregojë nëse është e vërtetë që veprimet e para të UÇK-së cilësoheshin si terroriste nga bashkësia ndërkombëtare.

“Ka pasur diskutime lidhur me këtë pikë. Më kujtohet që ambasadori Robert Gelbard e kishte quajtur terroriste familjen Jashari. Por, ai u qortua për këtë dhe deklarata e tij u tërhoq dhe u korrigjua.”

Me këtë rast Prokurori Halling e lexoi një deklaratë që Gjenerali Clark e kishte bërë më 1998, ku kishte thënë: “E dënojmë dhunën kundër personave që kanë shprehur orientimin e tyre politik në mënyrë jo të dhunshme, po ashtu dënojmë metodat terroriste që përdoren për të arritur synime të caktuara”.

Kur prokurori i tha se “pra edhe ju vetë i keni lidhur veprimet e asaj kohe që po ndodhin në Kosovë me veprime terroriste”, Clark u përgjigj duke shpjeguar se “metoda terroriste kam dënuar unë”.

Gjenerali Clark e mohoi se kishte thënë se “ishte e rëndësishme të mbahej njëfarë lloj distance nga UÇK-ja gjatë bombardimeve”, kur prokurori citoi një deklaratë të tij nga një intervistë.

I pyetur nëse ai nuk donte të kishte komunikim me UÇK-në asokohe, Clark tha: “Jo, nuk është e saktë”.

“Për këtë arsye fola me Thaçin. Në fakt, i kërkova Thaçit të na ndihmonte. Ishim në një pikë kritike të historisë, vlerave, etikës dhe demokracisë në atë kohë. Dua të shpjegoj se në një pikë kur njerëzit luftojnë kundër shtypjes, ata kalojnë nga të qenët terroristë, në luftëtarë lirie, dhe në një pikë të caktuar, opinioni botëror dhe konsensusi botëror vjen në përfundim se njerëzit të drejtë t’i bëjnë ballë trysnisë së luftës dhe kjo është e shkruar edhe në deklaratën e pavarësisë së SHBA-së,” sqaroi Clark duke shtuar:

“Nga viti 1974 Kosova duhej të ishte shtet i ndarë administrativ, por [lideri i atëhershëm serb Sllobodan] Millosheviqi ua mohoi këtë, prandaj një grup i caktuar njerëz që quheshin terroristë u bënë mbrojtje kolektive e popullit të vet”.

Gjenerali Clark: S’mund të konfirmoj nëse UÇK-ja u armatos nga ndonjë shtet i NATO-s

Gjenerali Clark tha se nuk mund të konfirmojë nëse ndonjë organ apo entitet qeveritar i ndonjë vendi anëtar të NATO-s i kishte dhënë armë UÇK-së pas nënshkrimit të marrëveshjes së Rambujesë në fillim të vitit 1999, ndërkohë i pyetur nga Prokurori Halling nëse nuk mund ta konfirmojë për shkak të konfidencialitetit, Clark ishte i prerë:

“Thjesht nuk e di!”

Prokurori më pas e lexoi një raport informimi të ministrit të atëhershëm të Jashtëm britanik, Robin Cook, lidhur me operacionet e NATO-s, në të cilin ai thotë se “ne kemi marrë disa raporte nga UÇK-ja në dy javët e fundit dhe na ndihmon ta kemi perspektiven e asaj çka po ndodh, por nuk synojmë t’i furnizojmë ata me armë”. Lidhur me këtë Gjenerali Clark sqaroi:

“Jam i sigurt ka pasur deklarata nga dikush që ka thënë se UÇK-ja ka trokitur në derë për të kërkuar ndihmë, kjo është tërësisht ndryshe nga të pasurit një sistem të komandës dhe kontrollit, të unifikuar, i cili do të mbështeste NATO-n.”

Me këtë rast Gjenerali Clark përsëriti se UÇK-ja nuk kishte komandë kontrolli!

Prokurori ia kujtoi atij deklaratën se e kishte takuar Hashim Thaçin në prill 1999 për të kërkuar ndihmën e tij në identifikimin e objektivave për bombardimet e NATO-s. I pyetur nëse i kujtohej se ku ishte mbajtur takimi, Clark tha:

“Jam i sigurt që në selinë time!”

Më pas, Halling i kërkoi Clarkut të tregojë se në atë kohë cili mendonte se ishte roli i Thaçit, Clark tha:

“Ai ishte si oficer ndërlidhës. E kuptova se ai po kërkonte para dhe mbështetje nga diaspora shqiptare,” tha Gjenerali Clark por nuk e dinte nëse ai apo Thaçi e kishte bërë kërkesën për takim.

Prokurori i tha se ju u takuat me Thaçin sepse ishte ndër personat më të lartë në UÇK, dhe shtoi nëse Thaçi kishte pasur kompetencë politike që ishte e ndryshme nga kompetenca e ushtarëve.

“Duket se është kështu,” tha Wesley Clark.

Gjenerali amerikan në pension tha se UÇK-ja ishte një organizatë rezistence dhe NATO-ja kërkonte që ajo të çarmatosej dhe Serbia të largohej.

Prokuroria po ashtu e pyeti nëse ishte e vërtetë që komandantët e zonave kishin deklaruar që ushtria të ishte objekt i autoritetit civil dhe Clark u përgjigj me “po”.

Mbyllja e dëshmisë së Gjeneralit amerikan në pension, Wesley Clark, ishte po aq solemne si edhe fillimi, ku foli për disa minuta me mesazhin e popujve të shtypur që lutfojnë për liri, ku përfshinte edhe popullin e Kosovës, për të cilin bindja e tij ishte shumë e qartë.

“E kam ndjekur këtë gjykim dhe i qëndroj bindjes së mëparshme që Hashim Thaçi nuk është përgjegjës për atë çfarë ka ndodhur në Kosovë. Ai nuk mban përgjegjësi për aktet individuale të dhunës ose të hakmarrjes,” tha Gjenerali Clark duke vlerësuar se UÇK-ja nuk ishte terroriste pasi pjesëtarët e saj luftuan për lirinë e tyre.

“Ata nuk janë terroristë, pavarësisht se kur shkova të takoja gjeneralët serbë ata më thanë që ata janë terroristë. Janë njerëz që luftonin kundër një regjimi të padrejtë, të jashtëligjshëm, që meritonte të largohej dhe të zëvendësohej,” tha Gjenerali amerikan në pension, Welsley Clark, duke përfunduar:

“Këtu kemi persona që luftuan për lirinë e tyre. Ligjet, procedurat e shoqërive moderne duhet të kuptojnë edhe nevojat e personave që luftojnë për lirinë e tyre dhe dinjitetin e tyre!”

Ndryshe, në ditën e parë të dëshmisë së tij Gjenerali amerikan në pension, Wesley Clark, në mbrojtje të ish-presidentit të Kosovës, Hashim Thaçi dhe të tjerëve, në Gjykatën Speciale të Kosovës në Hagë, tha se nuk besonte se Thaçi ishte udhëheqës ushtarak i Ushtrisë Çlirimtare të Kosovës.

Gjenerali Clark, i cili e udhëhoqi fushatën ajrore të NATO-s kundër forcave ushtarake serbe në vitin 1999, tha se nuk besonte që Thaçi komandonte personat që kryen akte të dhunës pas çlirimit të Kosovës.

Ndërsa i pyetur nëse ka qenë e mundur që UÇK-ja të ketë pasur zinxhir komandues funksional me hierarki të plotë e NATO-ja dhe Shtetet e Bashkuara të mos e kenë ditur, Gjenerali Clark ishte i prerë: Jo!

Ai tha se nuk e di nëse Thaçi ka luftuar dhe nuk ishte në dijeni për Shtabin e Përgjithshëm të UÇK-së.

Gjenerali amerikan në pension, Wesley Clark, është dëshmitari i fundit i thirrur nga mbrojtja e Hashim Thaçit.