Veseli: Nuk ka ndarje, Kosova nuk ka asgjë për të dhënë. Janë pretendime të vjetra të Serbisë

“Kosova nuk ka asgjë për të dhënë. Nuk do të ketë ndarje të Kosovës. Ky është një nga pretendimet e vjetra të Serbisë, ” Kështu i vendosi pikat mbi “i” kryetari i Parlamentit të Kosovës dhe lideri i Partisë Demokratike, Kadri Veseli pas debateve që shkakuan deklarata e pakuptimta të Presidentit të Kosovës, Hashim Thaçi mbi shkëmbimin e territoreve me Serbinë.

“Kosova do të shkojë në dialog, në mënyrë që finalja e tij ta prodhojë një marrëveshje ndërkombëtarisht obliguese – e cila sjell njohjen e Kosovës, ulësen në OKB dhe përshpejtimin e rrugës së integrimeve euroatlantike,” thekson Veseli ë një koment të publikuar sot në “Koha Ditore”,  duke shtuar kjo është agjendë e jona e përbashkët me SHBA-në dhe BE-në.

“Nuk do të ketë ndarje të Kosovës. As nuk do të diskutohet kjo çështje. Ndarja e Kosovës është një nga pretendimet e vjetra të Serbisë, të cilat kanë marrë fund njëherë e përgjithmonë në vitin 1999. Kosova nuk ka asgjë për të dhënë,” thekson Kadri Veseli duek përfunduar:

“Kosova do të hyjë në OKB, NATO dhe në BE me kufijtë e saj të pavarësisë.”

Ky është shkrimi i plotë i Kadri Veselit:

Debati publik i ditëve të fundit për dialogun e Kosovës me Serbinë ka dalë jashtë kornizave të një debati që u ndihmon publikut, institucioneve dhe avancimit të proceseve të shtetit.

Me temat e ngritura prej këtij debati, dhe me mënyrën se si ato po trajtohen, është krijuar një klimë e panevojshme tensioni, frike e pasigurie tek qytetarët tanë.

Në të njëjtën kohë, Serbia, e interesuar në vazhdimësi për jostablitet në Kosovë, me propagandën e saj politiko-mediale, duke përdorur teknikat e reja të fake news, vazhdon t’u kontribuojë kësaj klime dhe tendencave për të prodhuar tensione.

Efekti i synuar, gjithmonë i njëjtë: Të krijohet perceptimi ndërkombëtar për Kosovën si një vend jostabil e problematik, që nga dita në ditë pritet të shpërthejë dhe shpërbëhet!

Kur ndalesh e lexon opinionet plot alarm, që hidhen nëpër portale e media të tjera sociale, të krijohet përshtypja se jemi në prag të një kataklizme globale, epiqendra e së cilës ndodhet në Kosovë.

Por le të ndalemi e të rikujtojmë të gjithë se si nisi e tërë kjo.

Kur propozuam tryezë partish, me qëllimin që në mënyrë demokratike t’i bisedojmë të gjitha çështjet serioze të dialogut, dhe jo vetëm, e pastaj, përmes konsensusit dhe në mënyrë institucionale e të argumentuar t’u japim zgjidhjen më të mirë këtyre çështjeve – kjo iniciativë nuk u përmbush, shkaku i mosbashkëpunimit partiak, i motivuar krejtësisht nga agjendat e ngushta partiake e aspak shtetërore.

Në një fazë tjetër, propozuam që konsensusi të ndërtohet në institucionin më të lartë të shtetit, në Kuvendin e Kosovës. Ofruam për diskutim edhe platformën me shkrim dhe arritje të konsensusit të përbashkët, por edhe kjo gjë nuk u mor parasysh.

Partitë politike opozitare në Kuvend nuk pranuan të jenë pjesë e përgjegjësisë shtetërore, pjesë e dialogut, i cili adreson interesat e shtetit, e jo të partive politike. Fatkeqësisht, sindroma e vjetër e bajraktarizmit primitiv po shfaq shenjat e tij në krejt këtë situatë.

Sigurisht që përgjegjësinë kryesore për këtë e bart LDK-ja, e cila, në njërën anë, poshtë e lart, vetëpromovohet si parti institucionaliste, derisa, në anën tjetër, praktikisht vepron kundër frymës institucionale. Respektimi i kësaj fryme sot, më shumë se kurrë në këta dhjetë vjet, është domosdoshmëri dhe obligim i të gjithë përfaqësuesve politikë në vend.

Në këtë situatë të krijuar nuk duhet habitur pse në mungesë të veprimit institucional, që prodhon konsensus e vendimmarrje shtetërore, debati është zhvendosur në virtualitetin e mediave sociale, e si rezultat ky debat e ka humbur krejtësisht seriozitetin, për të përfunduar në një qarkullim të lirë pa doganë të teorive të konspiracionit dhe tërheqje vijash të reja në hartën politike të Kosovës e rajonit, sipas preferencave subjektive.

Por në fund të fundit, meqë jetojmë në një shtet demokratik, duhet ta pranojmë si të mirëqenë faktin se mendimet e njerëzve janë të lira. Gjithmonë do të jenë të tilla në shoqërinë tonë.

Por vendimet e shtetit të pavarur dhe sovran të Kosovës janë te qarta.

Në asnjë rrethanë, ndarja e Kosovës nuk do të jetë temë e dialogut.

Kosova do të shkojë në dialog, në mënyrë që finalja e tij ta prodhojë një marrëveshje ndërkombëtarisht obliguese – e cila sjell njohjen e Kosovës, ulësen në OKB dhe përshpejtimin e rrugës së integrimeve euroatlantike.

Kjo është agjendë e jona e përbashkët me SHBA-në dhe BE-në.

Nuk do të ketë ndarje të Kosovës. As nuk do të diskutohet kjo çështje.

Ndarja e Kosovës është një nga pretendimet e vjetra të Serbisë, të cilat kanë marrë fund njëherë e përgjithmonë në vitin 1999.

Kosova nuk ka asgjë për të dhënë.

Kosova është shtet i pavarur dhe sovran, dhe integriteti territorial i saj është i pacenueshëm.

Kosova do të hyjë në OKB, NATO dhe në BE me kufijtë e saj të pavarësisë