Parlamenti i Kosovës nuk voton as Qeverinë e Glauk Konjufcës

Me 56 vota për 53 kundër dhe 4 abstenim, Parlamenti i Kosovës nuk miratoi as qeverinë e re të propozuar nga i mandatuari i dytë, Glauk Konjufca.

Kështu, me bllokimin e opozitës për krijimin e një shumice qeverisëse, u hap dhe rruga për zgjedhje të reja parlamentare.

Ndryshe, para këtij votimi, Glauk Konjufca si mandatar i dytë për krijimin e qeverisë së re nga Lëvizja Vetëvendosje, tha para deputetëve të Parlamentit të Kosovës se për herë të parë në jetën e vetë parlamentare Parlamenti i Republikës nuk arriti ta legjitimojë me votë qeverinë e shtetit.

“Votimit të 26 tetorit i parapriu një krizë 6 mujore e cila ishte rezultat i pamundësisë për ta zgjedhur kryetarin e Kuvendit. Viti 2025 do të mbahet në mend si një vit shumica e të cilit humb në përpjekje për themelimin e institucioneve tona kushtetuese, Kuvendit e Qeverisë,” tha Glauk Konjufca ndërsa rediti arritjet e Kosovës janë të mëdha.

“Po hyjmë ne vitin e pestë me rritje ekonomike mbi 4 për qind e disiplina fiskale, po shkon duke u konsoliduar. Borxhi i jashtëm ndodhet në pikën e tij historikisht më të ulët, kurse mbledhja e brendshme e tatimeve bashke me qarkullimin e bizneseve ka shënuar rritje enorme,” tha Konjufca ndërsa foli për luftimin e bandave në veri që tha se janë luftuar me sukses strukturat e Serbisë të lidhura me krimin e organizuar e kontrabandën, kurse buxheti për mbrojtje tha se është katërfishuar.

“Në planin ndërkombëtar u mundësua lëvizja pa viza ë zonën shengen e erdhën po ashtu tri njohje ndërkombëtare, shumë të rëndësishme në Republikën e Kosovës. Këto janë bërë falë punës së mirë të qeverisë Kurti.”

Tani është faza e mandatarit të dytë për krijimin e qeverisë, tha Glauk Konjufca duke shtuar se pa një qeveri të re, vendi e ka të sigurt vetëm një gjë, thellimin e krizës aktuale.

“Përmes themelimit të kësaj qeverie, sot  ne synojmë disa gjëra bazike për shtetin tonë. Së pari synojmë ta kursejmë Kosovën nga dy palë zgjedhje eventuale. Do të ishte arrogancë ta qonim vendin tonë drejt e në zgjedhje. Patëm zgjedhje në shkurt të këtij viti, dy raunde zgjedhjesh lokale në tetor e nëntor, tash nëse shkojmë në zgjedhje edhe në dhjetor, kush na garanton që do t’i shmangim ato edhe në mars.

Nuk ka kurrfarë garancie, e nëse kjo ndodhë institucionet duhet ët jenë gjithmonë të përgatitura, ama për qytetarët tanë rraskapitëse, për KQZ-në një sfidë të cilën kurrë nuk e kanë provuar, kurse për taksat e popullit edhe 8 milion të tjera të harxhuara pa arsye,” tha Glauk Konjufca në fjalën e tij si mandatar i dytë.

Nëse dështon edhe kjo përpjekje, tha Konjufca, atëherë pashmangshëm shkohet në zgjedhje, por tha se secili duhet ta dijë se çka bartë mbi supe, e këto janë përgjegjësi të ndryshme.

“Disa çështje që qeveria jonë do t’i trajtojë me urgjencë  janë: Buxheti i shtetit për vitin 2026, miratimi i Planit të Rritjes së BE-së, disa marrëveshje të rëndësishme ndërkombëtare, ekzekutimi i pagave të punëtorëve të RTK-së si dhe miratimi i buxhetit për komunat Prishtinë, Gjilan e Zubin Potok.

Dua të ua risjellë në mendje po ashtu që unë po kërkoj nga ju diçka që ne vetë e kemi pas bërë në vitin 2020. Të gjithëve na kujtohet se si LVV e pati votuar buxhetin e qeverisë Hoti më 29 dhjetor të vitit 2020. Neve nuk na u pat dukur ai buxhet i personit, Avdullah Hoti, por i shtetit të Kosovës. Edhe ne mund të mos e kishim votuar atë buxhet, ama do të bëheshim përgjegjës për një krizë nga e cila rrezikoheshin drejtpërdrejt të gjitha pagat e sektorit publik. Ne atëherë e bëmë dallimin mes asaj që ishte interes publik dhe betejë  politike e përditshme,” tha Glauk Konjufca, dhe më pas prezantoi emrat e kabinetit të ri qeveritar.

Qeveria Konjufca I

Kryeministër, Glauk Konjufca

Zëvendëskryeministër i parë dhe ministër i Punëve të Jashtme dhe Diasporës, Albin Kurti

Zëvendëskryeministre e dytë dhe ministre e Drejtësisë, Donika Gërvalla

Zëvendëskryeministër i tretë për Çështje të Pakicave dhe Bashkëpunim, Fikrim Damka

Ministër i Financave dhe Ekonomisë, Hekuran Murati

Ministër për Familje dhe Mirëqenie Sociale, Andin Hoti

Ministër i Mbrojtjes, Ejup Maqedonci

Ministër i Punëve të Brendshme, Xhelal Sveçla

Ministër i Administratës Publike dhe Digjitalizimit, Lulëzon Jagxhiu

Ministër i Shëndetësisë, Arben Vitia

Ministër i Arsimit dhe Shkencës, Avni Zogiani

Ministër i Kulturës dhe Turizmit, Fatmir Spahiu

Ministër i Sportit dhe Rinisë, Blerim Gashani

Ministër i Administrimit të Pushtetit Lokal, Rasim Demiri

Ministre e Mjedisit dhe Planifikimit Hapësinor, Fitore Pacolli

Ministër i Bujqësisë, Pylltarisë dhe Zhvillimit Rural, Armend Muja

Ministër i Infrastrukturës dhe Transportit, Besnik Bislimi

Ministre e Tregtisë, Industrisë dhe Integrimeve Evropiane, Mimoza Kusari

Ministre e Energjisë dhe Minierave, Artane Rizvanolli

Ministër për Komunitete dhe Kthim, Nenad Rashiq

Ministër për Zhvillim Rajonal, Sejnur Veshall.