“Balluku” në Gjykatën Kushtetuese, sot vendoset për ankimimin e Edi Ramës
Kolegji Penal në Gjykatën Kushtetuese sot do të shqyrtoj ankimimin e Kryeministrit Edi Rama për pezullimin nga detyra të ministres dhe zv/kryeministres, Belinda Balluku, me vendim të GJKKO, pas aferave korruptive që implikojnë Ballukun në tunelin e Llogarasë dhe të Unazës së Madhe.
Nëse sot Kolegji vendos kalimin e çështjes për shqyrtim, Gjykata Kushtetuese pritet të shprehet fillimisht për shuarjen e efekteve të pezullimit, në pritje të një vendimi përfundimtar për çështjen, ashtu siç e ka kërkuar Kryeministri Edi Rama, dhe, Belinda Balluku të rikthehet në detyrë “që ta shpëtoj Shqipërinë”.
Shqyrtimi i kërkesës u shty për më 2 dhjetor, ndërsa shkak u bë largimi nga gjykata Holta Zaçajt, e cila ishte pjesë e Kolegjit që do të trajtonte në dhomë këshillimi çështjen, dhe gjyqtarja që e zëvendësoi Marsida Xhaferllari, kërkoi kohë që të njihej me aktet.
Ndryshe, Këshilli i Ministrave ankimoi vendimin e Gjykatës së Posaçme për pezullimin nga detyra të zv/kryeministres dhe ministres të Infrastrukturës dhe Energjisë, pasi sipas Edi Ramës ndërhyn drejtpërdrejtë në kompetenca e tre organeve të shtetit, kryeministrit; Presidentit dhe Kuvendit.
“Pezullimi sjell pasoja të rënda të interesit shtetëror e shoqëror duke krijuar vakuum institucional pasi pamundëson propozimin e projekteve me rëndësi kombëtare për integrimin në Bashkimin Evropian, rreth 800 projekte për tu miratuar deri në fund të 2027 nga ministria që udhëhiqet nga ministri, i cili është pezulluar nëpërmjet vendimit të GJKKO-së,” thekson në arsyetim Këshilli i Ministrave i cili drejtohet nga Edi Rama, dhe i cili edhe 12 vjet pas qeverisjes nuk e ka kuptuar se jo pa Belindën por edhe pa Kryeministrin Rama ky vend jo vetëm që do të funskionojë, por do të funskionoj shumë më mirë.
Gjykata e Posaçme pezulloi nga detyra zv/kryeministren dhe ministren e Infrastrukturës dhe Energjisë, duke i ndaluar gjithashtu të drejtën për të dalë jashtë vendit.
Belinda Balluku është marrë e pandehur për procedurat në tenderin e tunelit të Llogorasë dhe është nën hetim për tenderin e lotit 4 të Unazës së Madhe. Në të dy këto raste dyshohet se fituesi është paracaktuar. Prokuroria e Posaçme ka bërë të ditur se po heton dhe një sërë procedurash të tjera prokurimi.
