Betohen Kryetarët e ri të komunave në Veri të Kosovës

Erden Atiq në Mitrovicë të Veriut, Ilir Peci në Zveçan, Lulzim Hetemi në Leposaviç dhe Izmir Zeqiri në Zubin Potok sot dorëzuan detyrën e kryetarëve të rinj që vijnë nga Lista Srpska, pas betimin në sallat e kuvendeve komunale në të cilat ishin vendosur simbolet shtetërore të Kosovës.

Betimi i Kryetarit të ri të Mitrovicës së Veriut

Në Mitrovicën e Veriut, pas betimit të Milan Radojeviçit si Kryetar i ri i Mitrovicës, dhe firmosjes në seancën inauguruese në dokumentet me simbolet e Republikës së Kosovës, zyrtarisht ka marrë detyrën nga Erden Atiq, duke deklaruar se do të punojë për interesin e qytetit të Mitrovicës së Veriut.

Gjithësesi, seanca inauguruese në Mitrovicë të Veriut nuk ka kaluar krejt e qetë. Anëtari serb Marko Jakshiq ka pretenduar se në sallë ka pasur policë civilë e se është ndier i frikësuar. Por, kjo është hedhur poshtë menjëherë nga anëtarët e LVV-së e PDK-së në sallë. 

Asamblistja e Vetëvendosjes, Aida Ferati-Doli, ka thënë se ishte e qartë se në atë sallë nuk kishte policë e se nuk ka pasur arsye për frikë. 

“Secili prej nesh këtu që kemi në këto ulëse e kemi marrë besimin për atë çka përfaqësojmë kështu që edhe pyetja që është bërë, a frikësoheni a nuk frikësoheni, nuk kemi nevojë për pyetje të tilla. Ne jemi  për të konsistuar Kuvendin Komunal të Mitrovicës së Veriut. Sa i përket policisë unë nuk po shoh e nuk po vërej që ka polic në këtë sallë. Nuk ka nevojë që parafolësi të ndihet i kërcënuar. Jemi këtu për tu betuar në seancën konstitutive të Kuvendit Komunal të Mitrovicës së Veriut”, tha ajo.

E, asamblisti i PDK-së, Emir Azemi, i ka kërkuar Jakshiqit që të mos ta politizojë situatën dhe se aty janë për ta bërë betimin.

“Ne jemi në shtëpinë tonë, në shtetin tonë nuk kemi nevojë me pasë frikë. Nuk ke nevojë me u frikësu nga tjetër kush, nuk e dimë kush është polic, por ne këtu jemi të barabartë nuk ka nevojë me politizu këtë mbledhje solemne ta mbajmë jemi ardhur këtu që të betohemi në mbledhje solemne edhe nuk ka nevojë me u politizu asgjë.” 

Asamblisti serb Marko Jakshiq, duke pretenduar se po ndihet i frikësuar ka kërkuar që nga salla të largohen policët, megjithëse aty nuk janë parë të tillë e nuk ka lëvizur kush. 

“Në këtë moment, si kryesues, ndihem i rrezikuar dhe i pasigurt, sepse në këtë sallë, përveç nesh dhe gazetarëve, po qëndrojnë edhe pjesëtarë të policisë. I kam pyetur kolegët shqiptarë nëse kanë frikë nga ne, nga serbët, dhe ata kanë thënë se jo. Do t’ju lutesha që, nëse është e mundur, që të mund të vazhdoj punën dhe të them atë që dua të them, t’i kërkoni policisë të dalë nga kjo sallë. Sepse, besomëni, ndiej sikur një shtet policor po ushtron presion mbi ne, po na kontrollon, po na frikëson, dhe ne nuk jemi të lirë ta kryejmë punën tonë. Nuk ndihem i sigurt, sepse kam parë disa pjesëtarë të policisë me civil brenda sallës. Prandaj, nëse është e mundur, ju lutem t’i kërkoni të dalin nga salla — do të ishte mirë,” tha njëri nga kriminelët serb të këtij qyteti që për 45 vjet ndërsej bashkëkombasit e vetë të vrasin shqiptarë.

Zveçani me Kryetar të ri serb

 Përpara na presin sfida, por duhet të ruhet paqja e siguria në komunë, tha Kryetari i ri i Komunës Zveçan, Dragisha Miloviç, pasi u betua ndërsa falënderoi të gjithë qytetarët për besimin e dhënë.

“Periudha para nesh nuk do të jetë e lehtë, do të jetë me sfida. Të ruajmë së paku paqen dhe sigurinë në hapësirën e komunës. Çdo familje që banon në Zveçan të ndihet e sigurt,” tha Dragisha Miloviç duke u zotuar se do të bashkëpunoj me të gjitha institucionet në Prishtinë

“Do të bashkëpunoj edhe me përfaqësuesit e misioneve me KFOR, me EULEX, me OSBE, me të gjitha institucionet në Prishtinë, MAPL dhe juve mediave. Duhet të kuptojmë që qeverisja lokale duhet të jetë e fokusuar të qytetarët. Kushdo që vjen këtu të mirëpritet, për të mirë të qytetarëve tanë,” tha Kryetari i ri i Komunës Zveçan, Dragisha Miloviç.

Betimi i Kryetarit të ri në Zubin Potok

Sot mund të thuhet se Izmir Zeqiri drejtoi njërën ndër komunat më problematike në Kosovë, por duke filluar prej sot Kryetar i ri i Komunës Zubin Potok është Milosh Peroviç. 

Pas betimit, Peroviç tha se do ta ushtroj detyrën e tij me ndershmëri dhe besnikëri që t’i siguroj Komunës së Zubin Potokut kushte më të mira. 

“Unë si kryetar Milosh Peroviç deklaroj së do të kryej detyrat e mia dhe ushtroj kompetencat e mia me nder dhe besnikëri në mënyrë që të krijoj kushte për jetë në Komunën e Zubin Potokut te sigurt dhe të qetë. Si kryetar falënderoj të gjithë,” tha Kryetari i ri i Komunës Zubin Potok, Miloshe Peroviç, duke u zotuar:

“Na presin plane të vazhdueshme të komunës!”

Leposaviçi i konflikteve, shpresëdhënës

Lulzim Hetemi kishte një detyrë të vështirë në menaxhimin e një situate në komunën e Leposaviçit që njihet më shumë për kriminelë serbë dhe barrikada se sa për një jetë normale, por me betimin e Kryetarit të ri të Komunës Leposaviç, Zoran Tadiç, në një ambient ndryshe, shpresat janë për rikthimin e një jete normale.

Edhe në sallën e Kuvendit Komunal të Leposaviqit, ashtu si në kuvendet tjera të komunave me shumicë serbe, ishte flamuri i Kosovës dhe fotografia e Presidentes Vjosa Osmani.

Përreth e para Komunës së Leposaviqit kishte forca të Policisë së Kosovës, automjete të KFOR-it, EULEX-it dhe OSBE-së, por ligjshmëria në sallën e Kuvendit Komunal ishte në nivelin e përcaktuar nga ministria e Administrimit të Pushtetit Lokal.

Ndryshe, seancat inauguruese në katër komunat veriore të Kosovës filluan sot nga ora 11:00, duke shënuar dhe fillimin e mandatit të kryetarëve të rinj në Mitrovicën e Veriut, Leposaviç, Zveçan dhe Zubin Potok.

Ministri në detyrë i Administrimit të Pushtetit Lokal, MAPL, Elbert Krasniqi, ka parlajmëruar pasoja nëse ceremonitë inauguruese nuk zhvillohen në përputhje të plotë me standardet e përcaktuara me ligj, duke përfshirë përdorimin korrekt të elementeve shtetërore të Kosovës dhe dy-gjuhësisë zyrtare.

“Në çdo rast kur konstatohet mosrespektim i këtyre procedurave, MAPL do t’i shpallë të paligjshme dhe jolegjitime seancat përkatëse, sipas legjislacionit në fuqi të Republikës së Kosovës,” tha Elbert Krasniqi duke pbërë të ditur se në seanca inauguruese ka ekipe për monitorim nga ministria e Administrimit të Pushtetit Lokal, të cilat do të jenë të pranishme fizikisht në të gjitha mbledhjet për të siguruar respektimin e procedurave kushtetuese dhe ligjore.