Situatë kritike në lumin Vjosë, përmbytje të banesave dhe tokës bujqësore në disa qarqe

Situata hidrike në qarkun Fier paraqitet problematike si pasojë e rritjes së prurjeve të lumenjve, ndërsa në Durrës ku mbi 4 mijë banesa dhe biznese janë shkatërruar plotësisht përshkak të përmbytjeve, familjet e kanë kaluar natën në ujë dhe akuzojnë qeverinë që i ka braktisur duke i lënë në mëshirë të fatit.

Ndërkohë përmbytje të banesave dhe tokës bujqësore raportohet edhe në disa qarqe si Shkodër, Lezhë, Durrës, Fushë Krujë, Lushnje, Divjakë, si dhe vështirësi të shtuara për shkak të reshjeve të bor në Kukës, Elbasan, Pogrdaec dhe Korçë.

Sipas informacionit zyrtar akset rrugore në të gjithë qarkun Fier janë aktualisht të aksesueshme normalisht, ndërsa furnizimi me energji elektrike dhe ujë të pijshëm vijon pa ndërprerje, megjithëse me kufizime në disa zona. Hidrovorët janë në gadishmëri pune për të përballuar situatën.

Nivelet e lumenjve Seman dhe Shkumbin janë në tendencë rritjeje, ndërsa situata më kritike paraqitet në lumin Vjosë. Në Urën e Mifolit, prurjet kanë kaluar pikat e matjes dhe aktualisht niveli i ujit ka arritur pikën kritike përgjatë argjinaturës, buzë më buzë.

Si pasojë, në fshatrat Kashisht, Adë, Kafaraj, Cerven dhe Ferras janë përmbytur rreth 200 hektarë tokë bujqësore brenda argjinaturave. Po ashtu, raportohet prani e lartë uji në 27 banesa në zonën Ferras–Cerven, të cilat ndodhen brenda argjinaturës mbrojtëse.

Prurjet e larta të lumit Vjosë kanë ndikuar edhe në Stacionin e Pompimit të Kafarajt, në Njësinë Administrative Frakull, nga ku realizohet furnizimi me ujë i qytetit të Fierit. Si masë paraprake, disa nga pompat në puset pranë lumit janë stakuar, ndërsa furnizimi po kryhet me kapacitet të reduktuar nga puse të tjera më të largëta. Kjo ka sjellë reduktim të furnizimit me ujë për qytetin e Fierit, i cili po realizohet sipas grafikut.

Të dhënat e marra nga pika e matjes në Urën e Memaliajt tregojnë për përkeqësim të situatës në orët në vijim, çka ka shtuar gatishmërinë e strukturave përgjegjëse.

Problematika nga reshjet e dendura të shiut që vijojnë prej disa ditësh, ka edhe në Lushnje e Divjakë, ku vetëm me daljen e Lumit Seman nga shtrati janë përmbytur 130 hektarë tokë bujqësore brenda argjinaturës në fshatrat Ngurrëz, Imshtë. Ndërkohë lumi Shkumbin pothuajse gati të dalë nga shtrati me disa hektarë nën ujë.

Të përmbytura janë 150 hektarë tokë e mbjellë në njësinë administrative Grabjan Divjakë dhe në njësinë administrative Dushk Lushnje.

Hidrovori i Tërbufit, Karavastasë dhe Divjakës punojnë me kapacitet të plotë, ndërsa reshjet vazhdojnë ende me intensitet mesatar.

Situata problematike në Fushë Krujë raportohet pas reshjeve të dendura gjatë 24 orëve të fundit ku niveli i lumit Ishëm është rritur sërish gjatë natës. Niveli i ujit nëpër arat e përmbytura tashmë rreth 72 orësh të rritet. Mijëra ha tokë bujqësore të mbjella me kultura të ndryshme janë nën ujë, në disa fshatra të ultësirës të rrethit Krujë si: Bilaj, Merqin, Mallkuc, Miliskaj, Gramëz etj.

Gjendja vijon të përkeqësohet dhe niveli i ujit vijon të rritet pasi asnjë nga kanalet kulluese nuk e kryen funksionin, pasi kanë mbi tre dekada pa pastruar.

Banorët shprehen se askush nuk ka shkuar t’i shohë. Rreth 20 familje janë të izoluara nga uji, kryesisht në fshatin Murqinë, ku dy lagjet fundore të këtij fshati janë totalisht të rrethuara nga uji.

Rruga që lidh këto lagje me pjesën tjetër të vendit është e mbuluar me mbi 50 cm ujë, ndërsa niveli i ujit vijon të rritet.

Pas dy ditëve me reshje të dendura shiu në qarkun e Kukësit, kanë nisur reshjet e dëborës, me intensitet të ulët deri mesatar, kryesisht në zonat e thella malore. Shiu i ka lënë vend borës, e cila ka sjellë edhe rënie të ndjeshme të temperaturave.

Në qytetin e Kukësit, bora nuk ka shkaktuar probleme serioze në qarkullim. Ndërkohë, reshjet e borës janë mesatare në zonat e thella malore, si Valbona dhe Shishtaveci, ku trashësia e saj ka kaluar rreth 10 centimetra.

Raportohet se të gjitha akset rrugore nacionale janë të qarkullueshme duke përfshirë dhe aksin Morinë–Kukës–Tuneli i Kalimashit i Rrugës së Kombit mbetet i hapur dhe i qarkullueshëm.

Deri më tani nuk raportohen probleme në qarkullim apo në furnizim, por drejtuesit e mjeteve këshillohen të udhëtojnë me goma dimërore dhe të jenë të pajisur me zinxhirë, veçanërisht në akset malore.

Pas pasojave të shkaktuara nga reshjet e shiut në infrastrukturë, i gjithë qarku i Kukësit furnizohet me energji elektrike, përveç njësive administrative Bicaj dhe Ujmisht në Bashkinë Kukës, ku ende vijon puna për rikthimin e energjisë.

Ndërkohë reshjet e shiut dhe borës gjatë natës dhe orëve të para të mëngjesit kanë sjellë përkeqësim të situatës në disa zona të qarkut Korçë, duke shkaktuar problematika në qarkullim, rritje të niveleve të lumenjve dhe rrëshqitje dherash.

Në Bashkinë Kolonjë, reshjet e borës kanë nisur që prej orës 03:30 me intervale. Qarkullimi në akset Ersekë–Leskovik dhe Ersekë–Korçë vijon normalisht, ndërsa borëpastrueset janë në terren.

Në zonën e njohur si Gropat e Gëlqeres, rreth 5 kilometra nga Erseka në aksin Ersekë–Leskovik, është konstatuar rrëshqitje e pjesshme e rrugës. Në zonë është vendosur sinjalistikë dhe shërbime policore, ndërsa drejtuesit e mjeteve këshillohen të lëvizin me kujdes. Ndërkohë, Hidrovori i Tushemishtit vijon punën me tre pompa, pasi njëra është jashtë funksionit. Niveli i ujit mbetet i lartë, por situata është nën kontroll.

Situatë më problematike paraqitet në Bashkinë Maliq, ku lumi Devoll ka dalë nga shtrati në disa pika të argjinaturës në zonën e Sheqerasit. Në Dunavec niveli i ujit është në maksimum, por pa dalje nga shtrati. Aksi Maliq–Lozhan, në zonën e Senishtit, ka qenë i bllokuar gjatë natës, por është pastruar; megjithatë, mbetet problematik për shkak të batisjeve dhe rrezikut për trupin e rrugës.

Rrëshqitje dherash raportohen edhe në Mesmal, me bllokim të rrugës, ndërsa në Lozhan të Lartë ka rënie gurësh dhe është aktivizuar rrëshqitja në zonën e Kakaçit. Rezervuarët janë nën monitorim të vazhdueshëm dhe në Leminot është hapur lëshuesi katastrofik pasi u arrit kuota maksimale. Në këtë bashki kanë nisur edhe reshje bore me trashësi rreth 2 centimetra.

Në Bashkinë Korçë, rruga për në Denas vijon të mbetet problematike si pasojë e situatës së mëparshme, megjithatë niveli i ujit ka rënë ndjeshëm dhe aktualisht nuk paraqet rrezik për banesat.

Në Bashkinë Devoll, situata më e rënduar raportohet në njësinë administrative Proger, përfshirë fshatrat Proger, Maqurisht, Cangonj dhe Shyec, për shkak të rritjes së prurjeve të ujit.

Probleme të shumta janë evidentuar edhe në Bashkinë Pogradec. Në njësinë administrative Dardhas, rruga që lidh fshatin është e pakalueshme, ndërsa mungon energjia elektrike në të gjitha fshatrat e njësisë. Rrëshqitje rruge është raportuar në zonën e Grunjazit. Po ashtu, probleme janë shënuar në lumenjtë Rëmenj dhe Verdovë, veçanërisht në zonën e unazës së qytetit, ku qarkullimi është kufizuar në një kalim. Në njësinë administrative Çërravë, lumi i fshatit ka fryrje të konsiderueshme, por deri tani nuk raportohen dëme. Rrëshqitje dhe bllokime rrugësh ka edhe në aksin Qukës–Qafë Plloçë dhe në disa fshatra të njësisë administrative Proptisht, ku po punohet për hapjen e tyre. Reshjet e shiut në këtë zonë po shndërrohen gradualisht në reshje bore.

Sipas Autoritetit Rrugor Shqiptar, në akset Korçë–Ersekë dhe Ersekë–Leskovik kanë nisur reshje bore dhe po punohet për pastrim dhe kriposje. Në aksin Maliq–Kufi i Gramshit ka reshje shiu, shoqëruar me rënie gurësh dhe inertesh, ndërsa po kryhen punime për pastrimin e rrugës. Aksi Korçë–Voskopojë është pastruar dhe kriposur dhe qarkullimi vijon normalisht. Në segmentin Boboshticë–Dardhë ka reshje bore dhe mjetet janë në terren për pastrim dhe kriposje, ndërsa në akset Bilisht–Miras dhe Zemblak–Goricë reshjet e shiut janë me intensitet të ulët dhe nuk raportohen problematika.