Ryshfet për leje armësh, aksion i Prokurorisë në Prishtinë

Prokuroria Themelore në Prishtinë konfirmoi se katër persona janë shoqëruar në komisariatin e policisë dhe po intervistohen nga prokurori nën dyshime për keqpërdorim të pozitës apo autoritetit zyrtar dhe pranim të ryshfetit në sektorin privat.

Zëdhënësja e kësaj prokurorie, Kaltrina Shala, tha për RFE se dy nga të shoqëruarit janë persona zyrtarë që dyshohen për keqpërdorim të pozitës apo autoritetit zyrtar.

Aksioni, sipas saj, është duke u zhvilluar në disa lokacione.

Media e specializuar për raportime në fushën e drejtësisë, Betimi për Drejtësi, tha se aksioni po zhvillohet lidhur me dallaveret në lëshimin e lejeve për armë.

Dy zyrtarët e shoqëruar në komisariatin e policisë, raporton Betimi për Drejtësi, janë zyrtarë në Ministrinë e Punëve të Brendshme dhe dy të tjerë të një kompanie private.

Ndryshe, MPB është organ mbikëqyrës për procesin e lëshimit të lejeve për armë në Kosovë. Ligji për armë në Kosovë parashikon se kush dhe nën çfarë kushtesh mund të pajiset me armë zjarri. Përveç personave fizikë, leje për armë ka edhe për kompani private.

Ligjet në Kosovë po ashtu parashikojnë dënim me burgim dhe gjoba për këdo që posedon armë pa leje./RFE/