Normandy Index 2025: Kosova lider për siguri strategjike në Ballkan

Ministria e Mbrojtjes e Kosovës ka bërë të ditur se sipas Normandy Index 2025, të përgatitur nga Shërbimi Kërkimor i Parlamentit Evropian, EPRS, Kosova është renditur e 13-ta në botë për nivelin më të ulët të kërcënimeve strategjike ndaj paqes dhe demokracisë, dhe në vendin e parë në Ballkanin Perëndimor për Siguri Strategjike.

Ky indeks vlerëson një sërë fushash kyçe duke përfshirë stabilitetin politik dhe institucional, sundimin e ligjit dhe funksionimin demokratik, reziliencën ndaj dezinformimit dhe ndikimeve të huaja, rrezikun e konflikteve dhe sigurinë kombëtare, si dhe kërcënimet hibride dhe presionet gjeopolitike.

Sipas këtij vlerësimi, Kosova pozicionohet në mesin e 10 për qind të vendeve më të sigurta në botë, duke reflektuar progres të qëndrueshëm në forcimin e institucioneve demokratike dhe sigurisë kombëtare.

Ky vlerësim i rëndësishëm ndërkombëtar, sipas Ministrisë së Mbrojtjes së Kosovës, konfirmon stabilitetin, progresin dhe orientimin e qartë euroatlantik të Republikës së Kosovës.