Presidenti i SHBA, Donald Trump, fton Vjosa Osmanin në Bordin e Paqes!
Presidentja e Kosovës, Vjosa Osmani, ka bërë të ditur sot se ka marrë ftesë nga Presidenti i SHBA-së, Donald Trump, për ta përfaqësuar Kosovën në Bordin e Paqes për Gazën, si anëtare themeluese.
“Jam thellësisht e nderuar nga ftesa personale e Presidentit Trump për të përfaqësuar Republikën e Kosovës në Bordin e Paqes, si anëtare themeluese, krah për krah me SHBA-të në misionin për një botë më të sigurt,” shprehet Vjosa Osmani përmes rrjetit social Facebook duke theksuar se lidershipi i guximshëm nuk flet thjesht për paqe, ai e ndërton atë, ndërsa përfundon:
“Pikërisht këtë po e bën Presidenti Trump nëpërmjet kësaj iniciative historike. Ashtu si Amerika që solli paqe në Kosovë, sot Kosova qëndron si aleat i palëkundur i saj për ta çuar paqen më tej.
Historia i mban mend ata që bëjnë hapa të guximshëm në ndërtimin e paqes – dhe ne jemi gati.”
Ndryshe, ftesë për këtë Bord ka marrë ditë më parë edhe Kryeministri i Shqipërisë, Edi Rama, i cili e paraqiti ftesën si një domosdoshmëri për rindërtimin e Gazës, ndryshe s’do kishte më Palestinë!
