Berisha: Ta votojmë marrëveshjen pa emrin që nxin! Trump nuk do që t’ia dëgjojë emrin Ramaduros

Kryetari i Partisë Demokratike, Sali Berisha, tha sot në seancën plenare për ratifikimin e Marrëveshjes së pranimit të Shqipërisë, në Bordin e Paqes, se opozita mbështet plotësisht iniciativën e presidentit amerikan Donald Trump për paqen dhe sigurinë ndërkombëtare, duke theksuar se SHBA janë faktori kryesor që ka përcaktuar lirinë e shqiptarëve, veçanërisht me çlirimin dhe pavarësinë e Kosovës.

“Në qëndrimin tonë pa ekuivok në mbështetje të këtyre politikave pasi SHBA janë aksionari më kryesor i paqes dhe sigurisë në botë.
Ne mbështesim plotësisht këtë iniciativë të presidentit Donald Trump edhe për faktin se në dallim nga shumë kombe të tjera, askush nuk e ka përcaktuar më shumë lirinë e shqiptarëve se sa SHBA, veçanërisht në dekadat e fundit me çlirimin e Kosovës, pavarësinë e saj dhe mbështetjen e saj,” tha Sali Berisha ndërsa seancën e sotme parlamentare e cilësoi si jashtë çdo standardi kushtetues, duke akuzuar mazhorancën për përpjekje që të personalizojë një akt të rëndësishëm ndërkombëtar për interesa politike personale.

Duke akuzuar Kryeministrin Rama për lidhje me afera korruptive, tendera abuzivë dhe lidhje kriminale, ai e konsideroj si përpjekje për ta përdorur marrëveshjen ndërkombëtare si “mburojë personale” një akt të papranueshëm.

Në fund, Berisha bëri thirrje që marrëveshja të votohet pa emrin e kryeministrit, duke deklaruar se presidenti Trump nuk dëshiron të dëgjojë emra që janë të diskredituar ndërkombëtarisht.

Fjala e plotë:

Të nderuar qytetare dhe qytetarë që ndiqni këtë seancë, e cila del jashtë të gjitha kritereve të seancave që thërret një parlament, por mazhoranca e krimit nuk ka ligj, nuk ka Kushtetutë, nuk ka rregullore.
Por pavarësisht nga kjo, ne jemi këtu për të dëshmuar mbështetjen tonë të plotë dhe të palëkundshme në politikat e sigurisë të SHBA.
Në qëndrimin tonë pa ekuivok në mbështetje të këtyre politikave pasi SHBA janë aksionari më kryesor i paqes dhe sigurisë në botë.
Ne mbështesim plotësisht këtë iniciativë të presidentit Donald Trump edhe për faktin se në dallim nga shumë kombe të tjera, askush nuk e ka përcaktuar më shumë lirinë e shqiptarëve se sa SHBA, veçanërisht në dekadat e fundit me çlirimin e Kosovës, pavarësinë e saj dhe mbështetjen e saj.
Në këtë kohë, për sa kohë SHBA qëndrojnë në zotimet e tyre për Aleancën e Atlantikut të Veriut, ne qëndrojmë në çdo problem sigurie pa mëdyshje në anën e SHBA.
Kjo, përveç tyre, dua të them këtu se Bordi i Paqes ngrihet për një nga aktet më të jashtëzakonshme, ndërprerjen e luftës në Gaza dhe këtu presidenti i SHBA ka një meritë historike, jashtëzakonisht të rëndësishme.
Bordi, që nuk e thotë kjo se ia ka marrë Belinda mendtë edhe asaj, është i mbështetur në dokumentin e OKB.
Pra, nuk e nxjerrin këta.
Bordi ka mbështetje në rezolutën e Këshillit të Sigurimit dhe është një hap tjetër drejt konsolidimit të paqes në atë rajon.

Thënë të gjitha këto, seanca merr një karakter të paimagjinueshëm vetëm e vetëm për shkak të përpjekjes primitive të një njeriu që tani po i vjen fundi që ta personalizojë këtë dhe çdo gjë tjetër si mburojë, pasi ajo që i rri në krah, po e merr me vete.
Po e merr me vete dhe jo pa të drejtë.
Jo.
Sepse ajo si një shërbëtore e bindur ka zbatuar çdo urdhër të tij.
Sepse nuk është ajo që e mori Palloshin me vete në Ankara, është ai që mori Lubinë në Ankara dhe u bë pazari 50 milionësh.
Është ai që i dërgonte urdhra se si Unaza e ndarë në 14 tendera, 13 kilometra, të shpërndahej, të vidhej, të shumëfishohej, t’u jepej medieve të tij.
Është ai, i cili figuron në të gjitha analet ndërkombëtare si bashkëpunëtor i kryekartelit të botës, që është Sinaloa e Meksikës.
Është ai, i cili figuron kreu i organizatës kriminale me lidhjet më të fuqishme me kartelet e drogës, kartelet shqiptare të drogës në Shqipëri dhe Amerikën Latine, dhe që ka urdhëruar takimin në Aruba.
Është ai, i cili e ka shndërruar agjencinë shtetërore të Mirlindës në turpin e shekullit.
Në agjencinë më mafioze të planetit, që mund të ndodhë në organizatat e mafies të marrin peng, por që ndërmarrja shtetërore, agjencia shteërore të organizojë pengmarrje… pse i ngre duart ti ashtu? Kujton se e mbron ti ashtu?
Do t’u them një gjë këtu, mos u bëni ashtu sikundër nuk jeni sepse mbështesni të keqen e madhe.
Po çfarë do të thotë ajo? Kam respekt maksimal për Mirlindën, ndërkohë dy pengmarrje për baxhanakun.
Shkoni dhe merrni pak dëshmitë e Gerond Meçes. Janë të tmerrshme.
U them unë ju, ato të duket Lubia lule.
Po i jep zemër tani. Shiheni, shiheni.
Po, po të duket lule ç’janë ato.
Shkoni dhe merrini ato.
Atëherë, ky njeri që ka shndërruar në kopsht privat AKSHI-n dhe ka respektin më të madh për Mirlindën, për Mirlindën se aty merren pengje që tenderat t’i fitojë baxhanaku, ky njeri personalizon në marrëveshje, personalizon një ftesë e cila nënkupton në mënyrë absolute republikën e Shqipërisë.
Pa diskutim.
Çfarë do të thoni ju nesër kur të dëgjoni Lubinë në bankën e të akuzuarve të thotë se të gjitha m’i ka urdhër Palloshi?
Çfarë do thoni? Më thoni pak? A do skuqeni nga votimi që keni bërë?
Çfarë do thoni kur të dalin Ergys Agasi, kur të dalin videot e Ergys Agasit, çfarë do thoni pastaj ju?
Se edhe ju keni ndërgjegje, keni familje, keni njerëz, keni të afërm, keni zgjedhës.
Çfarë do u thoni ju atyre?
Çfarë do u thoni zgjedhësve tuaj që personalizoni një akt ndërkombëtar të rëndësishëm me emrin të nxirë të një njeriu, i cili… po, po, lëvize kokën ti, por ta them se e ke gabim, shumë shpejt do pendohesh për atë kokë që lëviz, vazhdo se mirë e ke, se edhe kjo i thoshte Skënderbeu, po ia ktheu Skënderbuçi pastaj. E pa kjo që foli këtu para jush që i ka ditët e numëruara, jo nga unë, por nga Lubia i ka ditët e numëruara.
Kjo është e vërteta.

Ndaj dhe pse e bëni kështu ju?
Hajde urdhëro, ta votojmë siç duhet, por pa emrin që nxin.
A e morët vesh ju që vetë presidenti tha se në atë listë janë dy- tre emra që nuk dua t’ua dëgjoj kurrë emrin.
Po, e tha, shkoni dhe merreni.
Për kë e kishte fjalën?
Po sigurisht që ai nuk do të dëgjojë Lukashenkos, ai nuk mund t’ia dëgjojë Ramaduros?
A e kuptoni se çfarë ka bërë ky?
A e kuptoni që në një samit ndërkombëtar ku i lejoi vetes të tallet me të vetëm për t’iu servilos Makronit?
A e kuptoni ju se nuk mund të tallesh kurrë në një samit ndërkombëtar me asnjë burrë shteti aty të vendeve të lira?
Kurse ky xhokatar dilte prej atje dhe ua thoshte edhe medieve.
U bë interesant ky, Palloshi i Belindës…