Shtatë vjet nga tërmeti shkatërrimtar, PD: Bashkia Tiranë përjashton qytetarët nga e drejta e kompensimit

Ndonëse kanë kaluar shtatë vite nga tërmeti shkatërrimtar, Partia Demokratike përmes zëdhënëses së Antikorrupsionit në PD, Genta Vangjeli, denoncon raste kur ende sot shumë qytetarë nuk kanë gjetur zgjidhje për pronat e tyre.

“Një rast konkret denoncimi vjen nga një banore e Tiranës, në Njësinë Administrative nr. 6, Kombinat. Denoncuesja është pronare legjitime e një apartamenti prej 45 m², në godinën nr. 164, pronësi e vërtetuar me certifikatë të rregullt pronësie. Pasi godina u shpall e pabanueshme pas tërmetit, qytetarja u njoftua nga Bashkia Tiranë, se ishte skualifikuar nga përfitimi i nënprogramit të grantit të rikonstruksionit,” thekson Genta Vangjeli duke publikuar dhe ankimimin e denoncueses.

“Por përgjigjja e Bashkisë ka qenë se ajo nuk përfiton për shkak të ‘mosplotësimit të kushteve dhe kritereve’, sipas akteve ligjore dhe nënligjore të rindërtimit.

Pyetja që ngrihet është:

Çfarë duhet të bëjë kjo qytetare për të përfituar nga granti i rindërtimit të banesave të reja në Njësinë Administrative nr. 6? A duhet të humbasë edhe vitet e jetës duke u endur pas dyerve të bashkisë dhe gjykatave?,” thekson zëdhënësja e Antikorrupsionit në PD, Genta Vangjeli, sot kur kanë kaluar 7 vite, janë shpenzuar miliona euro dhe dhjetëra familje vijojnë të mbeten pa zgjidhje, ndërsa përfundon:

“Shumë qytetarë ndjehen të braktisur nga shteti dhe të mashtruar nga propaganda zyrtare. Institucionet duhet të japin zgjidhje konkrete, jo justifikime burokratike. Propaganda nuk ndërton shtëpi.”