Çfarë do të ndodhte në Vlorë nëse Sali Berisha do t‘ia jepte Sazanin dhe Zvërnecin dikujt?

nga Prof.Dr.Enver Bytyçi

Sazani dhe Zvërneci tashmë duket se do të jenë pronë e Ivanka Trump dhe Jared Kushner. Kryeministri i Shqipërisë, Edi Rama, ua ka premtuar atyre këtë perlë të bregdetit shqiptar në këmbim të mbrojtjes dhe amnistisë së tij për krimet e rënda që ai ka bërë në dekada qeverisjeje në vendin e tij. Në këmbim të faljes ose legjitimimit të bashkëpunimit të tij me grupet mafioze dhe kriminale. Në këmbim të pushtetit, me të cilin ai shton pasurinë në Surrelin e tij nga njëra anë, por shton edhe varfërinë dhe diskriminimin e qytetarëve shqiptarë, në anën tjetër. Në këmbim të grabitjes së pronave dhe tokave të shqiptarëve, sikur ato të ishin të Kristaqit apo dajë Spiros.

Dhe megjithë këto krime monstruoze të tij askush nuk reagon. Qytetarët e Vlorës flasin nën zë për dhunën dhe grabitjet e Edi Ramës në gjithë vijën bregdetare, por vetëm kaq. Pasuria që atyre ua grabit Edi Rama shkon në miliarda euro, por askush nuk do ta besojë këtë e aq më pak të reagojë.

Çfarë do të kishte ndodhur nëse këto grabitje që bën Edi Rama në Vlorë e kudo nëpër Shqipëri, t’i kishte bërë Sali Berisha në kohën e qeverisjes së tij? Pse Edi Ramën e tolerojnë jo vetëm Vlonjatët, himariotët, sarandiotët, gjirokastritët, por edhe shkodranë, lezhjanët, tropojasit e kelmendasit? Madje edhe opozita! E ndërkohë asnjëri prej këtyre nuk toleron as një të mijtën e gabimeve që mund të ketë bërë Sali Berisha?!

Nëse duam t’i japim përgjigje kësaj pyetjeje, atëherë duhet të themi se strukturën mendore tonën, pra të shqiptarëve, e ka imponuar sistemi politik i dhunës dhe urrejtjes ndaj dikujt që nuk është i ngjajshëm me dhunuesin e egër të këtij vendi. Shkurt, ne shqiptarët nuk durojmë një dhunues të moderuar që shfaq shenja humanizmi në qeverisje. Ne jemi mësuar me kulturën e dhunës së shfrenuar të pushtetarëve dhe jemi trajnuar për të bërë rolin e servilit, si dikur para kreut të fisit, ose beut apo pashait! Ne i bëjmë vend dhunës politike, sepse vetëm përmes dhunës politike vjen në shprehje edhe dhuna ekonomike mbi pronën, pasuritë tona dhe gjithçka kemi e që na kanë lënë trashëgim të parët tanë.

Shteti, qeveria, pra kryeministri, këtu te ne ushtron dhunë dhe grabit zgjedhjet, pastaj me dhunë na grabit ne dhe ushqen kompanitë e koorporatës së tij. Më tej akoma kur i duhen këto kompani ai i urdhëron ato që të sponsorizojnë ftesa e takime ndërkombëtare me lobim. Dhe të gjitha në funksion të pushtetit e jo të Shqipërisë.

Ai politikan që mendon qoftë dhe pesë minuta për Shqipërinë bëhet i papranueshëm. Madje non-grata jo vetëm në Uashington, por edhe për njerëzit që jetojnë në këtë vend, për të cilin shpesh herë thuhet se “është i mallkuar”! I mallkuar për çfaë? Për atë se vetë populli dogji Shqipërinë për dy a tri piramida financiare dhe hesht e rri indiferent para një katastrofe kombëtare. Katastrofa jonë e sotme, si kurrë më parë e ka emrin shpopullim, emigrim, ikje. E gjitha me skenar që të shfryhet revolta e qytetarëve. Katastrofa e sotme e ka emrin zhbërje. E gjitha për të mpirë rezistencën e shqiptarëve.

Sa ishuj ka Greqia? A ka guuxuar ndonjë qeveri greke që ndonjë prej tyre t’ia jepte dikujt, kushdo të ishte ai? Nuk ka guxuar dhe nuk guxon, sepse grekët e shkojnë “në satër” atë politikan që shet atdheun në këmbim të pushtetit të tij. Ndërsa vlonjatët në radhë të parë dhe shqiptarët pas tyre janë rreshtuar në anën e grabitqarëve. Pa e ditur se do të paguajnë taksë për të viizituar atdheun që ua kanë lënë të parët. Pa e ditur se ky kryeministri i sotëm i Shqipërisë nuk ka asnjë lloj empatie për ta. Dhe duke besuar te ai që ata e quajnë “tonin”!

Edhe njëherë e shtroj pyetjen: – Çfarë do të kishte ndodhur nëse Sali Berisha do ia jepte Sazanin dhe Zvërnecin Jovanka Trump e Jared Kushner? Do ishte harruar kryengritja që ata bënë në vitin 1997. Dhe për këtë mjafton të kujtojmë se çfarë revoltash bënë ata edhe kur qeveria Berisha donte të ndërtonte në Vlorë një termocentral! Sot heshtin! Sot rrinë e vështrojnë se si Edi Rama i grabit ata në ditën për diell. Në fakt janë në gjendjen e “gomarit në ëndërr”!