Trafiku i qenieve njerëzore, Operacioni i Interpolit: Mbi 3.700 të arrestuar!
Një operacion global kundër trafikimit të qenieve njerëzore ka çuar në arrestimin e më shumë se 3,700 të dyshuarve dhe ka siguruar mbrojtje për më shumë se 4.400 viktima të mundshme, tha sot Interpoli, i cili koordinoi operacionin. Operacioni, i quajtur Liberterra III, u zhvillua nga 10 deri më 21 nëntor 2025, në 119 vende, dhe përfshiu më shumë se 14.000 oficerë të zbatimit të ligjit, tha në një deklaratë organizata ndërkombëtare e policisë kriminale me seli në Lyon.
Mijëra arrestime dhe qindra hetime të reja
Sipas raporteve të para të shteteve pjesëmarrëse, janë ndaluar 3.744 të dyshuar, nga të cilët më shumë se 1.800 për krime që lidhen me trafikimin e qenieve njerëzore dhe kontrabandën e migrantëve. Janë hapur më shumë se 720 hetime të reja, shumë prej të cilave janë ende në vazhdim.
“Këto grupe kriminale janë shumë rezitente dhe janë përshtatur shpejt, kështu që zbatimi i ligjit duhet të bëjë të njëjtën gjë,” tha në një konferencë për shtyp Drejtori i Krimit të Organizuar dhe në Zhvillim i Interpolit, David Caunter.
Më shumë se 4400 viktima të mbrojtura
Operacioni mundësoi mbrojtjen e 4,414 viktimave të mundshme të trafikimit dhe zbulimin e 12,992 migrantëve në një situatë të parregullt. Rastet që përfshijnë viktima nga Amerika e Jugut dhe Azia në Afrikë tregojnë një ndryshim në dinamikën e trafikimit, i cili devijon nga modelet e mëparshme në të cilat viktimat ishin kryesisht nga Afrika dhe dërgoheshin jashtë vendit.
Ndërsa shfrytëzimi seksual mbetet krimi më i raportuar, Interpoli paralajmëron për një rritje të punës së detyruar dhe krimit, duke përfshirë rastet e skllavërisë në familje dhe trafikimit të organeve. Midis viktimave të identifikuara janë fëmijë që punojnë në një fabrikë qelqi në Belize, një vajzë e re e shitur një burri 73-vjeçar në El Salvador dhe një djalë tetëvjeçar i rrëmbyer në Mozambik me qëllim trafikimin e organeve.
Rrjetet kriminale globale u shkatërruan
Një burrë i njohur me nofkën El Gordo u arrestua në Kosta Rika, i dyshuar për detyrimin e të miturve për të regjistruar përmbajtje seksuale. Në Brazil, u shkatërrua një rrjet transnacional kontrabandistësh migrantësh të lidhur me Pakistanin, Afganistanin, Meksikën dhe SHBA-në, ndërsa në Peru, u zbulua një grup që transferonte ilegalisht migrantë venezuelas në Kili.
Në Azi, u kryen operacione kundër qendrave të dyshuara për mashtrim në internet, përfshirë mbylljen e një kompleksi në Myanmar që strehonte rreth 450 persona.
