Arrestohen tre zyrtarë të Komunës së Prishtinës

Tre zyrtarë të Komunës së Prishtinës janë arrestuar nën dyshimin për ryshfet, ndërsa njëri prej tyre është kapur në flagrancë. Kjo është konfirmuar nga kryeprokurori i Prokurorisë Themelore në Prishtinë, Zejnullah Gashi.

Kryeprokurori i Prokurorisë Themelore në Prishtinë, Zejnullah Gashi, tha se njëri prej tyre është kapur në flagrancë pas lëshimit të masave të fshehta.

“Ende nuk është lëshuar vendimi për ndalim 48-orësh,” tha Zejnullah Gashi duke saktësuar se të dyshuarit janë duke u intervistuar dhe se po vlerësohet mundësia e arrestimeve të tjera.

Aksioni, tha Gashi, është ndërmarrë pas hetimeve të fshehta të zhvilluara së fundmi.

Ndërkohë, Prokuroria Themelore në Prishtinë, njofton se në bashkëpunim të ngushtë me Policinë e Kosovës dhe në koordinim të plotë me Gjykatën Themelore në Prishtinë, me masa të veçanta hetimore ka zhvilluar një aksion ndaj zyrtarëve të Komunës së Prishtinës, nën dyshimin e veprës penale ‘’Keqpërdorimi i pozitës apo autoritetit zyrtar’’ nga neni 414 të KPRK-së, dhe veprën penale ‘’Marrja e ryshfetit’’ në bazë të nenit 421 të Kodit Penal të Republikes së Kosovës.

“Gjatë zbatimit të masave të veçanta hetimore, janë shoqëruar tre persona, ndër të cilët zyrtari i komunës, A.G., është arrestuar në flagrancë për veprën penale ‘’Marrje e ryshfetit’’ sipas nenit 421 të KPRK-së, me qëllim qe të ndihmojë të dëmtuarin të realizoj një pagesë për punët të cilat i kishte kryer sipas kontratës me komunën”, thuhet në njoftim.

Prokuroria Themelore në Prishtinë inkurajon të gjithë qytetarët të raportojnë për të gjitha veprat penale të natyrës së korrupsionit.