Gjykata e Tiranës liron 19 protestuesit, avokatja Grimci: Prokuroria nuk solli asnjë provë, arrestimet të paligjshme

Gjykata e Tiranës ka lënë të lirë 19 protestuesit e arrestuar pas protestës së 24 janarit.
Gjatë seancës së masës së sigurisë, prokuroria kërkoi “arrest me burg” për 5 persona, se kishin marrë pjesë në protestë, për 5 të tjerë u kërkua “arrest shtëpie” dhe për 9 të tjerë u kërkua “detyrim me paraqitje”.
Në fund të seancës, Gjykata e Tiranës caktoi masën “detyrim paraqitje”, duke lënë të lirë të 19 personat e arrestuar në mënyrë të paligjshme nga policia.

Për avokaten Eda Grimci nuk kishte asnjë provë speficike që faktonte veprimet penale, për asnjërën prej tyre.
“Pasi u njohëm me dosjet, pamë që nuk kishte asnjë provë ndaj tyre. Bëhej fjalë për prova të marra nga pamje filmike, që nuk kishin lidhje me të arrestuarit. Por edhe kjo ishte vetëm për 5 raste, për 14 raste të tjera nuk kishte as pamje filmike, as foto, por kishte vetëm një raport shërbimi ku në një rast firmosin 4 oficerë policie dhe në një rast 7 vetë dhe këto konsideroheshin si provë,” tha avokatja Edi Grimci në deklaratën para gjykatës duke përfunduar:

“Por këto nuk mund të konsiderohen të tilla, pasi në një vendim të Gjykatës së të Drejtave të Njeriut kundër Shqipërisë, ka saktësuar se masat nuk duhet të tejkalojë faktin dhe në asnjë rast nuk mund të konsiderohet e ligjshme, dhe nuk mund të kërkohet ‘arrest me burg’ kur nuk ka asnjë provë që fakton veprimin konkret. Bëhej fjalë për dyshime.”

Gjatë seancës, u raportua një incident në hollin e Gjykatës Penale, ndërsa gjyqtarët ishin të tërhequr për të diskutuar vendimin. Avokatët e të arrestuarve për protestën e 24 janarit pretenduan se u provokuan nga një person, duke krijuar tension në ambientet e gjykatës.

“Unë e kolegu po prisnim vendimin e gjykatës. Aty afrohet dikush. Nuk e dimë kush është por nisi të shante. Thoshte pse u ofroni mbrojtje këtyre kriminelëve që kanë goditur shtetin. Duhet ti mbysni.

Unë I thashë kush je ti e çfarë kërkon këtu E ai tha unë ju godas në lule të ballit. Kjo ndodhi në prezencë të forcave të rendit. Mbetet për tu verifikuar se kush është ky person,” tha Eda  Grimçi ndërkohë mësohet se personi që u shoqërua për shkak këtij kërcënimi rezulton të jetë i ati i një të riu me mbiemrin Korita, që kishte çështje në gjykatën e Tiranës.

Pasi kontaktoi për Sekretaren për të marrë një dokument të të birit, kjo i komunikoi të priste pasi ishte duke u marrë me shkresat e masave që mbaheshin sot. Qytetari doli në derë dhe iu drejtua disa efektivëve të policësë me fjalët:

“Hë mo shefa, ata *** ju djegin ju gjuajnë me gurë e i lironi, ne na lini këtu të presim!”