Michel kritikon Rutten: Mos u sill më si agjent amerikan dhe bashko NATO-n
Sekretari i Përgjithshëm i NATO-s, Mark Rutte, duhet të ndalojë së qeni një “agjent amerikan” dhe të bashkojë aleancën ushtarake të rrënuar e cila po përballet me “retorikë armiqësore” dhe “kërcënim” nga Shtetet e Bashkuara, tha sot për Euronews, Ish-Presidenti i Këshillit Evropian, Charles Michel.
Charles Michel, i cili drejtoi Këshillin Evropian për pesë vjet deri në vitin 2024, tha sot në emisionin e mëngjesit “Europe Today” se Mark Rutte po e zhgënjen dhe se po humbet besimin tek ai, raporton Euronews.
“Diplomacia lajkatare e Rutte nuk do të funksionojë”
“Dua të jem i qartë, Mark Rutte është një zhgënjim dhe unë po e humbas besimin,” tha Michel duke shtuar:
“Nuk pres që Mark Rutte të jetë një agjent amerikan. Pres që Mark të punojë për unitet brenda NATO-s!”
Mark Rutte, i cili e ka quajtur Presidentin e SHBA-së Donald Trump “babain” e Aleancës së NATO-s, ka fituar reputacionin si dikush që e njeh Trumpin. Ai gjithashtu i ka dhënë Trumpit një mundësi për t’u tërhequr nga kërcënimet e tij të fundit për të filluar një luftë tregtare me vendet evropiane për shkak të Groenlandës.
Michel tha për Euronews se diplomacia lajkatare e Rutte nuk do të funksionojë dhe mund të çojë në dështim të plotë.
“Pres që Rutte të jetë një zë i fortë brenda NATO-s”
“Po përballemi me frikësim, po përballemi me kërcënime. Ajo që po ndodh me Groenlandën nuk është e pranueshme dhe pres që Mark Rutte të jetë një zë i fortë në mbrojtje të unitetit brenda NATO-s,” tha Michel duke theksuar se BE është një “partner shumë besnik” i SHBA-së dhe “nuk e meriton” “sjelljen” e fundit të Trump, duke iu referuar kërcënimeve të presidentit amerikan për Groenlandën, përpjekjeve të tij për të “legjitimuar” Presidentin rus Vladimir Putin dhe sanksioneve kundër ish-zyrtarëve të BE-së.
Administrata amerikane vendosi së fundmi sanksione ndaj Thierry Breton, një ish-Komisioner francez Evropian i cili ishte përgjegjës për hartimin e rregulloreve dixhitale të BE-së.
“Është e mundur që Ukraina të anëtarësohet me BE-në deri në vitin 2027”
Michel duke iu referuar gjithashtu negociatave për një marrëveshje të ardhshme paqeje për Ukrainën, tha se udhëheqës të tillë si Presidenti francez Macron dhe Kryeministrja italiane Meloni kanë “të drejtë” që kërkojnë një takim të drejtpërdrejtë me Putinin.
“Ne duhet të jemi në tryezën e negociatave, dhe sot nuk jemi. Është shumë e trishtueshme, madje paksa tronditëse”, tha ai. “Kush po mbron interesat evropiane në tryezë? Jo Shtetet e Bashkuara, jo Rusia.”
Ai propozoi pasardhësin e tij, António Costa, si një të dërguar të mundshëm për negociatat, duke deklaruar se ai ka “legjitimitetin” për të folur në emër të 27 udhëheqësve të BE-së.
Kur u pyet për qëllimin e Presidentit ukrainas Volodymyr Zelenskyy që vendi i tij të bashkohet me BE-në deri në vitin 2027 si pjesë e një plani paqeje, ai me bindje të plotë u shpreh:
“Është absolutisht e drejtë dhe është e mundur,” tha Ish-Presidenti i Këshillit Evropian, Charles Michel, duke bërë thirrje që Kievi të integrohet në bllokun evropian sa më shpejt të jetë e mundur.
