Afera e thjeshtrës së Edi Ramës, PD: Ergys Agasi do ndërtojë kompleksin te Eco Parku!
Partia Demokratike përmes zëdhënëses për Antikorrupsion në PD, Genta Vnagjeli, ka dneoncuar sot një tjetër projekt ku lidhet emri i Edi Ramës, Ergys Agasit, investitorëve arab të portit të Durrësit, dhe Spitallës, zona e Eco Parkut të famshëm.
“Në datën 26 prill 2023 është lidhur marrëveshja e bashkëpunimit midis Manchester City Football Club ltd (MCFC), Eagle Hills Properties LLC, Ministrisë së Arsimit dhe Sportit, Bashkisë së Durrësit, nëpërmjet së cilës do të krijohej një partneritet futbolli, një shkollë futbolli për lojtarët dhe një Akademi Elitë.
Madje në qershor të vitit 2023 është përgatitur edhe projekt-ideja arkitekturore e kampusit të akademisë së fondacionit ‘Dyrrah City Football Academy’ nga studio ‘Marco Casamonti and Partners’,” tha Genta Vnagjeli dhe vetëm një muaj më vonë, më 28 korrik 2023 është miratuar urdhri i MAS për krijimin e fondacionit me emërtimin ‘Dyrrah City Football Academy’, me qëllimin kryesor çeljen dhe menaxhimin e një akademie elitare të futbollit në qytetin e Durrësit.
“Me Vendimin e Këshillit të Ministrave nr. 580, datë 11 tetor 2023, Edi Rama vendos që pronat shtetërore me sipërfaqe totale mbi 200 mijë m2 në zonën kadastrale nr. 8517, Bashkia Durrës, në Spitallë, të përdoren për ndërtimin dhe zhvillimin e kompleksit të Akademisë së Futbollit Durrës,” dhe fjala është pikërisht për të njëjten zonë kadastrale 8517, ku ndodhet edhe Eco Parku famëkeq, aty ku u shpenzuan 19 milionë euro për mbylljen e vend-depozitimit të mbetjeve – një çështje nën hetim por pa asnjë vendimmarrje konkrete.
“Më 29 tetor 2023, janë nënshkruar edhe dy marrëveshje konsulence për infrastrukturën, menaxhimin dhe programet futbollistike, me afat deri më 30 Qershor 2028, ndërmjet fondacionit, Durrës Marina, City Football Services Limited dhe Manchester City Football Club Limited.
Më 2 shkurt 2024, fondacioni shpall ftesën për propozim për zgjedhjen e klubit që do të financojë ndërtimin e kompleksit, me vlerë 10 milionë euro, me afat ndërtimi 24 muaj. Në këmbim, klubi fitues do të përfitonte të drejta mbi lojtarët e akademisë për 120 muaj.
Dy muaj më pas, më 24 prill 2024, fondacioni shpall fitues propozimin e vetëm të paraqitur, nga ‘Futboll Club Dinamo City’ sh.a., një klub i krijuar në vitin 2021,” sqaron Partia Demokratike dhe çuditërisht, pak ditë para shpalljes së fituesit, në dokumente shfaqet Ergys Agasi i cili bëhet pjesë e pronësisë së këtij klubi. Ekzakt më 31 mars 2024, Agasi blen 30% të aksioneve kundrejt vlerës 220 mijë euro.
“Pra: Më 2 shkurt shpallet ftesa për propozim. Më 31 mars, Agasi bëhet ortak zyrtar në pronësi. Më 24 prill, klubi ku pronar u bë edhe Agasi, shpallet fitues. Një përputhje që tregon shumë.
Në përfundim, mbi 200 mijë m2 tokë që ndodhet në Spitallë, aty ku ndodhet dhe Eco Park, Edi Rama ia lë në dorë fondacionit, që ky t’ia lërë në dorë Ergys Agasit ndoshta për të kamufluar aferën e Eco Parkut atje ku u shpenzuan 19 milionë euro për mbylljen e venddepozitimit,” thekson zëdhënëses për Antikorrupsion në PD, Genta Vnagjeli, ndërsa ka pyetje për organet e hetimit:
“Pse nuk hetohet procedura për investimin strategjik të Portit të Durrësit? Ku jemi me kallëzimin për Eco Park-un, ku përfshihet vetë Edi Rama? Ku jemi me aferat e AKSHI-t që lidhen sërish me Kryeministrin? Pse po zvarriten hetimet për kaq shumë kohë? Pse Edi Rama ende nuk është thirrur në SPAK? Qytetarët kërkojnë veprime konkrete, jo heshtje dhe zvarritje.
Mjaft me pritje. Drejtësia nuk mund të jetë selektive.”
