Kosovë, KQZ shpall rezultatet përfundimtare të zgjedhjeve të 28 dhjetorit

Pas një drame të gjatë me numërimin dhe rinumërimin e votave, Komisioni Qendror i Zgjedhjeve, KQZ, shpalli sot rezultatet përfundimtare të zgjedhjeve për Parlamentin e Kosovës, të mbajtura më 28 dhjetor 2025.

Shpalljen e rezultateve, KQZ e ndau në tre votime! Në votimin e parë u përfshinë të gjitha partitë, në votimin e dytë u votua vetëm për shpalljen e rezultateve për Listën Srpska me 3 vota për dhe dy kundër, dhe, për Kosovah Demokratik Türk Partisi, KDTP, për të cilën u ankuan se nuk u respektua kuota gjinore, kjo u miratua nga 9 anëtarë. 

Fillimisht kreu i KQZ-së, Kreshnik Radoniqi, prezantoi rezultatet sipas subjekteve politike dhe numrin e ulëseve të fituara në Parlament.

“Rezultaet e zgjedhjeve parlamentare të 28 dhjetorit 2025, është si në vijim: Lëvizja Vetëvendosje 51.10%, Partia Demokratike e Kosovës 20.19%, Lidhja Demokratike e Kosovës 13.24%, Aleanca për Ardhmërinë e Kosovës 5.50%, Lista Srpska 4.49%, Nisma Socialdemokrate 1.59%, Kosovah Demokratik Türk Partisi 0.57%, Za Slobodu Pravdu i Opstanak 0.51%, Koalicija Vakat 0.42%, Nova Demokratska Stranka 0.41%, Inicijativa E Re Demokratike e Kosovës 0.21%, Socijal Demokratska Unija 0.27%, Partia Liberale Egjiptiane 0.24%, P-S-A 0.22%, P-A-I P-D-A-K L-P-P 0.21%, Jedinstvena Goranska Partija 0.16%, Lëvizja Përparimtare e Romëve të Kosovës 0.12%, Partia Rome e Bashkuar e Kosovës 0.10%. Partia Rome e Bashkuar e Kosovës 0.10%, Partia Balli Kombëtar Demokrat Shqiptar 0.10%, Fjala 0.09%, Inisitiativa Qytetare për Kosovë 0.08%, Kosovski Savez 0.06%, Nexhmedin Sejdillar 0.03%, Kosovaki Nevi Romani Partia 0.02%,” tha kreu i KQZ-së duke vijuar me ulëset që kanë fituar subjektet dhe dhe kandidatët e tyre:

“Atëherë, Lëvizja Vetëvendosje me 57 ulëse të fituara, PDK ka fitura 22 ulse, LDK ka fituar 15 ulse, AAK 6 ulse.”

Nga ulëset e rezervuara për minoritetin serb, nëntë ulëse i ka fituar Lista Srpska, dhe, një ulëse Partia për Liri, Drejtësi dhe Mbijetesë.

Emrat e deputetëve

Lëvizja Vetëvendosje: Albin Kurti, Glauk Konjufca, Albulena Haxhiu, Hekuran Murati, Donika Gërvalla – Scharz, Xhelal Sveçla, Hajrullah Çeko, Avni Dehari, Mimoza Kusari – Lila, Ejup Maqedonci, Shqipe Mehmeti – Selimi, Andin Hoti, Arben Vitia, Saranda Bogujevci, Edona Llalloshi, Alban Bajrami, Mefail Bajqinovci, Nezir Kraki, Armend Muja, Adriana Matoshi, Rufki Suma, Jeta Statovci, Ardian Gola, Haxhi Avdyli, Blerim Gashi, Adelina Grainca, Albena Reshitaj, Fatos Geci, Agim Bahtiri, Fitore Pacolli – Dalipi, Artane Rizvanolli – Berisha, Taulant Kelmendi, Dimal Basha, Labinotë Demi – Murtezi, Arbëreshë Kryeziu – Hyseni, Arbër Rexhaj, Arjeta Fejzaj, Hysen Durmishi, Artan Abrashi, Arbërie Nagavci, Enver Haliti, Liza Gashi, Adnan Rrustemi, Valon Ramadani, Jeton Raka, Drita Pajaziti, Fatmire Kollqaku, Rozeta Hajdari, Arsim Ademi, Salih Zyba, Fitim Haziri, Fjolla Ujkani, Ilir Kërçeli, Sylejmani Meholli, Vigan Qorolli, Naim Bardiqi dhe Valon Hoti.

Partia Demokratike të Kosovës: Bedri Hamza, Arian Tahiri, Përparim Gruda, Uran Ismaili, Sala Jashari, Vlora Çitaku, Arben Mustafa, Enver Hoxhaj, Rrahman Rama, Nait Hasani, Eman Rrahmani, Ganimete Musliu, Elmi Reçica, Artan Behrami, Kujtim Gashi, Xhavit Haliti, Besa Kabashi – Ramaj, Mërgim Lushtaku, Ferat Shala, Arbnore Salihu, Blerta Deliu – Kodra, Ariana Musliu- Shoshi.

Lidhja Demokratike e Kosovës: Lumir Abdixhiku, Hykmete Bajrami, Ukë Rugova, Avdullah Hoti, Doarsa Kica- Xhelili, Kujtim Shala, Anton Quni, Armend Zemaj, Lutfi Haziri, Jehona Lushaku- Sadriu, Janina Ymeri, Besian Mustafa, Adelina Thaçi – Meta, Fadil Hadërgjonaj dhe Ermal Sadiku.

Aleanca për Ardhmërinë e Kosovës: Ramush Haradinaj, Daut Haradinaj, Besnik Tahiri, Bekë Berisha, Albana Bytyçi dhe Time Kadrijaj

Lista Srpska: Slavko Simiç, Igor Simiç, Lilana Stefanoviç, Milan Kostiç, Nemanja Bishevac, Zlatan Elek, Milana Nikoliç, Srxhan Popoviç dhe Verica Çernaniç.

Partia për Liri, Drejtësi dhe Mbijetesë: Nenad Rashiç

Komunitetet tjera joserbe: Ergyl Mazrek, Fatma Taçi, Rasim Demiri, Emilja Rexhepi, Elbert Krasniqi, Duda Balje, Veton Berisha, Artan Asllani, Adem Hoxha dhe Erxhan Galushi.

Ndryshe, KQZ shpalli sot rezultatet pasi përfundimit të rinumërimit të votave për kandidatë mbrëmjen e së premtes.

Kreu i KQZ-së, Kreshnik Radoniqi tha se palët kanë të drejtë ankese ndaj rezultatit për 48 orë në Panelin Zgjedhor për Ankesa dhe Parashtresa, PZAP, ndërsa sqaroi se nuk po bëhet shkelje e ligjit me shpalljen e rezultateve para përfundimit të këtij afati 48-orësh për administrimin e procedurave të rinumërimit në QNR.