Presidenti Trump shkarkon Richard Grenellin nga drejtuesi i Qendrës Kennedy

Presidenti i Shteteve të Bashkuara, Donald Trump, ka vendosur të largojë Richard Grenellin nga drejtimi i Qendrës Kennedy duke e zëvendësuar atë me Zv/Presidentin aktual të operacioneve të ambienteve të qendrës së arteve, Matt Floca.

Këtë Vendim, Presidenti amerikan Trump e bëri përmes rrjetit social Truth ndërsa paralajmëroi rindërtimin e plotë të kësaj Qendre pas festimit të 4 Korrikut.

“Kam kënaqësinë të njoftoj se Matt Floca, me miratimin e Bordit të Drejtorëve, do të emërohet Drejtor i Përgjithshëm Operacional dhe Drejtor Ekzekutiv i QENDRËS TRUMP KENNEDY, ku, si Zëvendëspresident i Operacioneve, Matt na ka ndihmuar të arrijmë një përparim të jashtëzakonshëm në sjelljen e Qendrës në nivelin më të lartë të Ekselencës! Një Rindërtim i Plotë i QENDRËS TRUMP KENNEDY do të fillojë pas Festimit të 4 Korrikut, me një Rihapje të Madhe të planifikuar përafërsisht dy vjet,” shprehet Presidenti amerikan Donald Trump në reagimin e tij përmes rrjetit social Truth ndërsa Grenellin e falënderon për punën e bërë:

“Ric Grenell ka bërë një punë të shkëlqyer duke ndihmuar në koordinimin e elementëve të ndryshëm të Qendrës gjatë periudhës së tranzicionit, dhe dua ta falënderoj atë për punën e jashtëzakonshme që ka bërë. QENDRA TRUMP KENNEDY, në përfundim të saj, do të jetë objekti më i mirë i këtij lloji kudo në Botë! Presidenti DONALD J. TRUMP.”

Ndryshe, puna e Richard Grenell si president i përkohshëm i Qendrës Kendedy është shoqëruar me tensione dhe debate me të marr detyrën ku u anuluan shfaqje, iniciativa të diversitetit dhe barazisë, rënie në shitjen e biletave, shqetësime për gjendjen financiare të institucionit si dhe largime të anëtarëve të bordit.

Mediat amerikane kanë raportuar, duke cituar burime nga Shtëpia e Bardhë, se Presidenti Donald Trump kishte kritika në punën e Richard Grenellit në menaxhimin e publicitetit të Qendrës Kennedy ndërsa ditëve të fundit acarimi ishte serioz.

Pavarësisht ngrohtësisë së mëparshme midis Trump dhe Grenell, një besnik i hershëm që ka shërbyer në role të ndryshme gjatë dy mandateve të presidentit në detyrë, burime për CNN thanë se Presidenti Trump ishte frustruar nga një mori titujsh negativë në lidhje me riorganizimin e tij të institucionit të arteve.

Në Ballkanin Perëndimor dhe ndër shqiptarë, Richard Grenell njihet si mik i Serbisë dhe Presidentit të saj Aleksandar Vuçiç, si dhe njeriu i cili përgatiti Marrëveshjen historike Kosovë-Serbi e cila nuk u la të firmoset nga BE pasi u lëshua fletëarresti nga Gjykata Speciale. Ajo që u firmos nga Vuçiç dhe Kryeministri i kohës Abdullah Hoti mbeti e pavlerë pasi pak çaste para firmosjes, u hoq pika e njohjes së ndërsjelltë në mes shteteve Kosovë-Serbi.

Ndërsa në politikën amerikane ai është i njohur që nga Administrata e George W. Bush kur shërbeu tetë vjet në Departamentin e Shtetit, përfshirë dhe periudhën si zëdhënës i Kombeve të Bashkuara. Gjatë viteve të Obamës ishte në Californi dhe më pas u rikthye në politikë me Presidentin Trump me një marrëdhënie veçanërisht të ngushtë me Zonjën e parë Melania Trump.
Në mandatin e parë të Presidentit Trump shërbeu si ambasador i SHBA-së në Gjermani dhe i dërguar special për Serbinë dhe Kosovën, dhe në vitin 2020, Presidenti e zgjodhi atë të jetë drejtori në detyrë i inteligjencës kombëtare, DNI, ku pati një marrëdhënie të ashpër me mbikëqyrësit në Kongres dhe deklasifikimin e dokumenteve nga administrata Obama që nxitën teorinë e konspiracionit “Obamagate”. Në fund, President Trump e vërejti dhe u shpreh:

“Mendoj se do të mbahesh mend si ‘aktruesi’ më i madh i të gjitha kohërave, në çdo pozicion”.

Në vitin 2024, President Trump e emëroi Të Dërguar për misione speciale, post të cilin ai e mbajti edhe kur ishte në krye të Qendrës Kennedy.