Pas votimit në parlament, Berisha: Kryegjykatës dhe Kryeprokuror do të jetë vetëm Edi Rama! Gonzato Ambasador i tij!

Pas votimit në parlament për mosdorëzimin e imunitetit të pandehurës Belinda Balluku, sot Kryetari i Partisë Demokratike, Sali Berisha, tha se tani Kryegjykatës dhe Kryeprokuror do të jetë vetëm Edi Rama, ndërsa akuzoi Ambasadorin e BE në Tiranë, Silvio Gonzato për keqinformimet që bënë në Brukselin zyrtar duke u sjell si Ambasador i Ramës!

“Çfarëdo që të bëjmë ne, ambasadori i BE në Tiranë, në Bruksel sillet në mënyrë absolute sikur të jetë ambasadori i Edi Ramës në Bruksel.
Dhe unë, duke shprehur keqardhjen time më të thellë, u bëj thirrje vendeve anëtare të informohen direkt nga përfaqësitë e tyre, parlamenteve të vendeve anëtare të dërgojnë misione faktmbledhëse, sepse të shpallësh AKSHI-n problem kulturor të shqiptarëve në Bruksel, siç ka bërë zoti Gonzato, ky është shërbimi më i keq që u bën shqiptarëve dhe unë i them atij zotërie se pengmarrje nuk është kulturë e shqiptarëve.
Dhe është një fyerje e rëndë që u bëhet shqiptarëve,” tha Sali Berisha para Kryesisë së PD dhe gënjeshtra e dytë e madhe e Ambasadorit Gonzato në komunitetin ndërkombëtar për PD-në është se axhenda e saj është MAGA.
“Axhenda jonë, në qoftë se kishim vendosur të ishte MAGA, ne nuk fshihnim asgjë, axhenda jonë është integrimi i Shqipërisë në BE. Kjo histori e turpshme mashtrimi filloi me një trillim të padëgjuar ndonjëherë se Donald Trump kur erdhi LaCivita ka ardhur me një cek 9 miliardë dollarë për të bllokuar integrimin e Shqipërisë në BE dhe ljo është qarkulluar në nivelet më të larta. Turp i madh!
Por ne pavarësisht nga kjo, kemi treguar durim, kemi bërë sqarime, kemi qenë të ndershëm në qëndrimet tona, kemi deklaruar se Shqipëria nuk plotëson asnjë kusht përveç pozicionit gjeostrategjik të saj dhe u faktua kjo. Nuk plotëson sepse ne e dinim se ç’po bën Edi Rama,” tha Kryetari i PD duke shtuar se Partia Demokratike sigurisht që ka marrëdhënie pa diskutim me SHBA dhe disa specifika, pa të cilën Kosova nuk do ishte e lirë.
“Dhe tani për të ndihmuar Edi Rama, shtron prapë çështjen se disa kanë axhendë MAGA-n, nuk kanë axhendë integrimin evropian. Unë mendoj se i shërben Edi Ramës me këto zotëria juaj dhe unë nuk kam dëshirë në mënyrë absolute as të të përgjigjem, por unë jam skandalizuar kur kam mësuar këto,” tha Berisha duke theksuar në fund para Kryesisë së PD se 22 Marsi do të jetë dita e kryengritjes që duhet t’i japë përgjigjen më të merituar akteve antikombëtare, antikushtetuese, antiligjore të Edi Ramës

“Protesta e datës 22 është frymëzim për çdo shqiptar dhe secili nga ne duhet të japë kryengritjen më maksimal në një kryengritje të fuqishme më 22 mars, kryengritje që duhet t’u japë përgjigjen më të merituar akteve antikombëtare, antikushtetuese, antiligjore të Edi Ramës, që përpiqet me çdo kusht të mbrojë veten dhe sojin e tij hajdut nga ligji dhe Kushtetuta,” tha Kryetari i Partisë Demokratike, Sali Berisha, ndërkohë që përgëzoj të gjithë kryetarët e rinj të zgjedhur në degët e PD nga Shkodra në Vlorë, Berat, Sarandë, Himarë dhe qytete të tjera, përfundoi:

“Të vazhdojmë të finalizojmë sipas përcaktimeve zgjedhjet në degë, ta mbyllim këtë proces, ta finalizojmë me Kuvendin në fillim të qershorit dhe rikthehemi krahas kryengritjes paqësore, rikthehemi tek përgatitjet për zgjedhjet vendore, për të cilat duhet të angazhohemi me gjithë forcën.”

Fjala e plotë:

Të nderuar anëtare dhe anëtarë të kryesisë së PD, kjo mbledhje thirret në një moment jashtëzakonisht të veçantë për vendin.

Në një moment në të cilin Edi Rama pas një përpjekje të jashtëzakonshme të opozitës, por e vërteta është edhe të partnerëve ndërkombëtare dhe institucioneve ndërkombëtare për zbatimin, funksionimin e shtetit ligjor, zbatimin e ligjit dhe Kushtetutës, Edi Rama haptas hoqi çdo maskë, hodhi poshtë një përpjekje të madhe për të ndihmuar Shqipërinë dhe votoi në parlament murin, mburojën e korrupsionit të tij, të vjedhjeve të tij dhe përfshiu, ose nën pretekst, zëvendëskryeministren Lubi Balluku.

Ky akt i shëmtuar dhe i pashembullt ndonjëherë në historinë e Europës pas rënies së Perdes së Hekurt, është dëshmi flagrante e inkriminimit të tij direkt në mega-afera korruptive.

Është dëshmi flagrante se Edi Rama nuk ka pranon të hetohet, të gjykohet për vjedhjet e tij monstruoze.

Sot në Shqipëri, por dhe jashtë vendit, fatmirësisht nuk ka njeri që nuk e di më se Lubia është thjesht sekretarja, noterja e Edi Ramës dhe se çdo gjë, apo se në thelb të gjithçkaje qëndron vetë veprimtaria e tij kriminale.

Në këtë përplasje të fuqishme të paprecedent tremujore, viktima absolute ishte pa diskutim institucioni i akuzës, ishte prokuroria speciale dhe gjykata, për të cilat kryegjykatës dhe kryeprokuror pas votimit në parlament do jetë vetëm Edi Rama.

Me vendimin e parlamentit për të mbyllur mundësitë e hetimit pa imunitet, institucioni i akuzës apo tentativat e tij për të funksionuar mbi bazën e ligjit, jashtë kontrollit ekzekutiv, marrin një goditje fatale, asgjësuese, përfundimtare.

Pra, në vend që Lubi Balluku dhe bashkëpunëtorët e saj, se në fakt nuk është ajo që ka ngrënë dardha pas shpinës së Ramës, por është Rama që ka ngrënë dardha, pra me votimin në parlament, mesazhi është shumë i qartë se ju nuk do mund të ushtroni kërkesa të ligjshme ndaj asnjë personi të lidhur me Edi Ramën, pa aprovimin paraprak nga Edi Rama.

Që ju për të funksionuar, detyrimisht do të merrni aprovimin, përndryshe u presin 83 mandatet e krimit, të gatshëm për të rrëzuar çdo kërkesë të tyre.

Edi Rama ndërmori këtë veprim, një akt in ekstremis për të shpëtuar lëkurën e tij.

Por viktimë tjetër madhore, në qoftë se SPAK ishte viktimë direkte, viktimë tjetër madhore e këtij akti është çdo qytetar shqiptar, i cili ka për aspiratë integrimin e tij në BE.

Në të vërtetë, vendimet u morën në parlament me gjithë paralajmërimin më serioz të jo një, por disa vendeve anëtare të BE, se ato nuk mund të pajtohen kurrë me një vendim të tillë.

Dhe se procesi i integrimit të Shqipërisë në BE, jo vetëm që ndalon, por edhe mund të shpërbëhet nga alfa gjer në alfën ku ka filluar.

Kur themi këtë shpërbërje, do të thotë anulim i të gjitha marrëveshjeve të firmosura me BE-në, që nga viti 1992 që është marrëveshja e parë tregtare.

Megjithatë, midis fatit të bardhë të shqiptarëve, integrimi në BE, sepse të themi atë që është, kjo fjala fat merr interpretime të ndryshme, por po të jetë për një popull si populli ynë, me problematikat që ka përjetuar, integrimi evropian, integrimi në NATO ishte fati i tij më i madh.

Kështu që Edi Rama, pavarësisht nga paralajmërimet që mori, pavarësisht nga reagimet që mori, vendosi që para procesit të integrimit të zgjedhë mburojën e tij ligjore për vjedhjet që ka bërë, të mos dorëzohet para ligjit ai dhe as dhe rrethi i tij i ngushtë familjar.

Por një gjë është prapë e qartë, se e gjithë kjo përplasje e madhe me opozitën, me partnerët ndërkombëtarë, bëhet vetëm për Edi Ramën dhe rrethin e tij të ngushtë familjar.

Pra, çdo shqiptar paguan për vjedhjet e Ramës, njerëzve me të cilët ka vjedhur, familjarëve të tij, Lindës së tij, baxhanakut dhe të tjerëve me radhë.

Si rrugëdalje, ai ka zgjedhur shkelmimin haptas të interesit të çdo shqiptari, integrimin mbi bazë merite në BE, bllokimin e tij dhe kërkesën që bëri me Aleksandër Vuçiç për një integrim tregtar. Një marrëveshje tregtare me BE-në, por jo paketë politika dhe ligjet komunitare, thjesht një partneritet në tregti.

Me çiftimin e Shqipërisë me Serbinë, Edi Rama kreu një akt ndër më të egrit armiqësorë ndaj Shqipërisë dhe shqiptarëve.

Cilado që të jenë problemet e Shqipërisë, Shqipëria nuk ka asnjë problem madhor në rrafshin strategjik, gjeostrategjik dhe politik me BE-në, që ka Serbia.

Serbia, jo nga Shqipëria, por nga qëndrimet dhe historia e saj, është konsideruar dhe konsiderohet Rusia e vogël në Ballkan. Shqipëria nuk është konsideruar kurrë zonë influence ruse.

Rusët bëjnë çdo përpjekje që TAP-i të dështonte, të mos kalonte nga Shqipëria, vetëm e vetëm se e dinin se gazi i tyre nuk mund të kalonte nga Shqipëria.

Serbia ka probleme të mëdha politike për të zgjidhur, marrëdhëniet me fqinjët, me Kosovën dhe Bosnjen, me Republikën Srapska që e ka përdorur si një koloni, me kërcënime të mëdha për bashkim, etj, etj.

Shqipëria nuk ka asnjë problem gjeopolitik me asnjë nga fqinjët tanë. Ka vetëm marrëdhëniet me të mira, më normale në të gjitha aspektet.

Serbia nuk njeh gjenocidin serb në Srebrenicë, i shpallur gjenocid nga gjykatat ndërkombëtare dhe të gjitha institucionet dhe një kusht i vendeve demokratike për të afruar Serbinë.

Shqipëria, falë ndërhyrjes së fuqishme të opozitës, votoi më së fundmi rezolutën për dënimin e gjenocidit serb në Srebrenicë.

Pra, imagjinoni ju, përpjekjen e Edi Ramës për t’i zbardhur faqen Vuçiçit, në një kohë kur ai akuzohet si një nga pjesëmarrësit në safarin njerëzor në Sarajevë.

Tani, argati i del në krah dhe shkruan letër të hapur me të për fatin e përbashkët të shqiptarëve dhe serbëve, në një marrëveshje tregtare me BE, që nuk është gjë tjetër vetëm Ballkani i Hapur.

Një akt më antikombëtar se ky nuk mund të bëhet.

Një akt i mirëfilltë antikombëtar.

Në këto kushte, zgjidhja dhe alternativa e vetme e kësaj krize ekzistenciale për shqiptarët është opozita.

Bashkimi Europian, Komisioni Europian, sigurisht nuk mund dhe nuk do të pajtohet me asgjësimin e sistemit të drejtësisë, por duhet të jemi realistë, nisma Rama-Vuçiç, nuk është se nuk ka mbështetje të pjesshme.

Ka mbështetje të pjesshme sepse ka anëtarë të BE që mendojnë se Shqipëria kurrë nuk mund të jetë anëtare e BE.

Prandaj, Edi Rama dhe Aleksandër Vuçiç na dhanë një zgjidhje, nuk duam vetë dhe nuk merremi me ta.

Ka edhe lobistë, ka edhe ekstremistë të majtë që janë të pandreqshëm në rrafshin ideologjik, ata bëjnë avokatinë e Ramës në çdo tryezë ku ndodhen.

Çfarëdo që të bëjmë ne, ambasadori i BE në Tiranë, në Bruksel sillet në mënyrë absolute sikur të jetë ambasadori i Edi Ramës në Bruksel.

Dhe unë, duke shprehur keqardhjen time më të thellë, u bëj thirrje vendeve anëtare të informohen direkt nga përfaqësitë e tyre, parlamenteve të vendeve anëtare të dërgojnë misione faktmbledhëse, sepse të shpallësh AKSHI-n problem kulturor të shqiptarëve në Bruksel, siç ka bërë zoti Gonzato, ky është shërbimi më i keq që u bën shqiptarëve dhe unë i them atij zotërie se pengmarrje nuk është kulturë e shqiptarëve.

Dhe është një fyerje e rëndë që u bëhet shqiptarëve.

Se ky vend dhe ky komb edhe kur nuk kanë pasur shtet, kanë pasur një ligj për kontratat civile dhe kontratat e tjera, që e kanë respektuar pa pengmarrje.

Dhe se AKSHI nuk është problem kulturor i shqiptarëve.

AKSHI, shkëlqësia juaj, është problemi i baxhanakut të Edi Ramës, i bashkëshortes së Edi Ramës dhe vetë Edi Ramës.

Sepse, shkëlqësi ambasador, Shqipëria ka me dhjetëra ndërmarrje të tjera, agjenci të tjera shtetërore dhe joshtetërore, problemi është se Rama nuk ka një kunat tjetër që të merret në fushën dixhitale përveç Armand Frangut.

Dhe pikërisht se është Armando aty, kunati i Lindës, aty merren njerëzit peng dhe janë marrë peng.

Dhe pengmarrja është kryekëput politike.

Dhe unë e konsideroj një fyerje të rëndë që u bëni shqiptarëve ju me deklaratën tuaj jo vetëm dezinformim, por edhe fyerje, se qenka kulturë shqiptarë pengmarrja.

Së dyti, ky zotëri përpiqet të mjegullojë qëndrimet e PD-së në procesin e integrimit.

E ka bërë dhe vazhdon ta bëjë ai këtë.

Tani unë do t’i them po këtu, forca jonë politike është forca që ka firmosur të gjitha marrëveshjet në procesin e integrimit, ka marrë rekomandimin e statusit të kandidatit që e ka bllokuar Edi Rama me tre ligjet, dhe përveç hapjes së negociatave, çdo marrëveshje tjetër.

Është forcë politike që ka qenë dhe mbetet lokomotivë e procesit të integrimit.

Është forcë politike e cila ka shpallur si interesin më madhor kombëtar të shqiptarëve integrimin në BE.

Por, është forca politike e cila ka qenë shumë e sinqertë me partnerët dhe nuk ka pranuar kurrë të mashtrojë partnerët dhe të mashtrojë shqiptarët.

Forca jonë politike ka qenë dhe mbetet e vendosur për një integrim të bazuar në meritë.

Për të bërë gjithçka që Shqipëria të meritojë, dhe të garantoj se nuk është kurrë pengmarrja kulturë e shqiptarëve siç paraqisni ju AKSHI-n.

Dhe e bën këtë në kohën e komunikimeve me shpejtësi drite.

Gënjeshtra e dytë e madhe e tij në komunitetin ndërkombëtar për PD-në është se axhenda jonë është MAGA.

Axhenda jonë, në qoftë se kishim vendosur të ishte MAGA, ne nuk fshihnim asgjë, axhenda jonë është integrimi i Shqipërisë në BE.

Kjo histori e turpshme mashtrimi filloi me një trillim të padëgjuar ndonjëherë se Donald Trump kur erdhi LaCivita ka ardhur me një çek 9 miliardë dollarë për të bllokuar integrimin e Shqipërisë në BE dhe kjo është qarkulluar në nivelet më të larta.

Turp më i madh…

Por ne pavarësisht nga kjo, kemi treguar durim, kemi bërë sqarime, kemi qenë të ndershëm në qëndrimet tona, kemi deklaruar se Shqipëria nuk plotëson asnjë kusht përveç pozicionit gjeostrategjik të saj dhe u faktua kjo.

Nuk plotëson sepse ne e dinim se ç’po bën Edi Rama.

Edi Rama po ndërton narkoshtetin këtu.

Sigurisht ne kemi marrëdhënie pa diskutim me SHBA dhe ne kemi disa specifika, nuk e mohojmë atë. Kosova nuk do ishte e lirë pa SHBA, askush të mos mendojë se ne e harrojmë këtë. Jo.

Dhe tani për të ndihmuar Edi Rama, shtron prapë çështjen se disa kanë axhendë MAGA-n, nuk kanë axhendë integrimin evropian.

Unë mendoj se i shërben Edi Ramës me këto zotëria juaj dhe unë nuk kam dëshirë në mënyrë absolute as të të përgjigjem, por unë jam skandalizuar kur kam mësuar këto.

Pse ndalem këtu?

Ndalem këtu që ne duhet të vazhdojmë betejën tonë.

Ne kemi një objektiv më kryesor të programit tonë, integrimin në BE.

Por ka përsëri… mos harroni faktorin Mogherini.

Faktori supertoksik Mogherini, e cila aferën e ka pesë herë më të madhe në Tiranë se sa në Bryzh.

Në Bryzh është 3 milionë, në Tiranë është 20 milionë.

Dhe ne do insistojmë që kjo aferë të vijë dhe të hetohet edhe në Shqipëri.

Nuk tërhiqemi ne.

Kështu jemi ne.

Çfarë besojmë se është e vërtetë, do e themi dhe do i qëndrojmë asaj.

Por nuk duhet të jenë lobingjet, të shkohet gjer aty sa të thuhet se AKSHI është çështje kulturore në Shqipëri.

U ndala në këtë moment për të theksuar se shpresa e vetme është opozita, është PD.

Në vitin 1990, pas kryengritjes së fuqishme të 2 korrikut, Ramiz Alia i përcolli me shoqërim ushtarak dhe me OKB-në, nxori policinë në të katër anët e Shqipërisë dhe rrihte njerëzit nëpër stacione autobusi, për t’u thënë shqiptarëve se unë e rivendosa Perden e Hekurt.

Ka një ngjashmëri me aktin e Edi Ramës. Me votimin që bëri, mendoi se shpëtoi.

Por i them se në mënyrë absolute dhe gjer në varr mbrapa do të ndjekin aferat korruptive.

Edhe aty do kesh tabelë kryehajdut i kombit dhe nuk do shpëtosh kurrë nga ligji dhe drejtësia me këto që ke bërë.

Nuk do ketë forcë në botë që të mbron, hiqe nga mendja.

Zemërimi i shqiptarëve është i jashtëzakonshëm.

Urrejtja e tyre ndaj kësaj qeverie që u shkatërron jetën çdo ditë është e jashtëzakonshme.

Ndaj dhe ne vazhdojmë kryengritjen tonë paqësore.

Ai me mandatet e krimit, ne me idealet, parimet dhe interesat më fisnike të shqiptarëve duke i mbrojtur ato.

Kjo është gjendja, situata.

Protesta e datës 22 është frymëzim për çdo shqiptar dhe secili nga ne duhet të japë kontributin më maksimal në një kryengritje të fuqishme më 22 mars, kryengritje që duhet t’u japë përgjigjen më të merituar akteve antikombëtare, antikushtetuese, antiligjore të Edi Ramës, që përpiqet me çdo kusht të mbrojë veten dhe sojin e tij hajdut nga ligji dhe Kushtetuta.

Ndërkohë, duhet të përgëzoj të gjithë kryetarët e rinj të zgjedhur në degët e PD nga Shkodra në Vlorë, Berat, Sarandë, Himarë dhe qytete të tjera.

Procesi zgjedhor është zhvilluar bazuar në primaret dhe unë mund t’u them se ka qenë një proces për të cilin falënderoj shumë pjesëmarrësit, të gjithë anëtarësinë, anëtarët që votuan, falënderoj organizatorët, drejtuesit, udhëheqësit politikë, koordinatorët dhe uroj nga zemra fituesit.

Ky proces dëshmoi dhe njëherë se ne nuk duhet në asnjë rrethanë të heqim dorë nga primaret.

Nuk mund të zëvendësojmë ne me asgjë vullnetin, të drejtën për vendimmarrje të anëtarëve tanë.

Janë zgjedhur, janë ndarë me mirëkuptim dhe sa më shumë konsolidohet kjo traditë, aq më e fuqishme bëhet PD.

Tani, siç e kemi detyrim që të kemi veprimtari shumëplanëshe njëkohësisht, duhet të vazhdojmë me finalizimin e zgjedhjeve në të gjitha degët e tjera.

Zgjedhjet e kryesive të PD në përpjekje të madhe për hapjen e kësaj partie për zgjedhje në drejtimin e saj të demokratëve me më shumë reputacion.

Për t’u përshëndetur si hap pozitiv është gjithashtu zgjedhja në Lezhë, në Vlorë, Sarandë dhe Himarë me votën e lirë të demokratëve i katër zonjave të nderuara. Edhe në Dimal, pesë.

U tejkalua një mentalitet i prapambetur, paternalist, absolutisht i pabazë.

Dhe unë them që edhe ky dimension kësaj here është një dimension vërtet emancipues dhe i përgëzoj ato zonja për guximin e tyre, për përkushtimin e tyre, për suksesin e tyre.

Kështu që të vazhdojmë në këtë drejtim, të finalizojmë sipas përcaktimeve që u lexuan këtu zgjedhjet në degë, ta mbyllim këtë proces, ta finalizojmë me Kuvendin në fillim të qershorit dhe rikthehemi krahas kryengritjes paqësore, rikthehemi tek përgatitjet për zgjedhjet vendore, për të cilat duhet të angazhohemi me gjithë forcën