Aksident në kantier ndërtimi në Vjenë, konfirmohet viktima e tretë nga Kosova

Tragjedia në aksidentin tragjik në një kantier ndërtimi në Vjenë është thelluar.

Ambasada e Kosovës në Austri ka njoftuar se, sipas konfirmimeve të fundit, edhe viktima e tretë nga katër personat që humbën jetën është shtetas i Kosovës. Bëhet fjalë për Istref Zekajn.

Ky informacion vjen pas konfirmimit paraprak për dy viktima të tjera kosovare në këtë aksident, Pajtim Bajrami 36 vjeç dhe Asllan Musliu 49 vjeç, i cili ndodhi në distriktin Alsergrund, ku një pjesë e konstruksionit u shemb gjatë punimeve ndërtimore, duke zënë punëtorët nën rrënoja.

Ambasada thekson se është në kontakt të vazhdueshëm me autoritetet austriake dhe me familjarët e viktimave, me qëllim të ofrimit të mbështetjes së nevojshme dhe koordinimit të procedurave të mëtejshme.

Në të njëjtën kohë, Ambasada e Kosovës në Austri ka shprehur edhe njëherë ngushëllimet më të sinqerta për familjet e viktimave, ndërsa ka premtuar informim të vazhdueshëm për çdo zhvillim të ri lidhur me rastin.

Njoftim:

Ambasada e Republikës së Kosovës në Austri ju informon se sipas konfirmimeve të fundit edhe viktima e tretë nga katër viktimat e këtij aksidenti tragjik është shtetas i Republikës së Kosovës.

Bëhet fjalë për qytetarin: Istref Zekaj

Ambasada e Republikës së Kosovës në Austri është në kontakt të vazhdueshëm me autoritetet austriake, si dhe me familjarët e viktimave, me qëllim të ofrimit të mbështetjes së nevojshme dhe koordinimit të mëtejmë për të gjitha procedurat përkatëse.

Në këto momente të rënda, shprehim edhe njëherë ngushëllimet tona më të sinqerta për familjet e viktimave.

Do të vazhdojme të ju mbajmë të informuar për çdo zhvillim të mëtejshëm lidhur me këtë rast.