Qendra Nacionale e Xhudos, Kurti: Mbi 5.7 mln € investime në xhudo, përgjigje ndaj sukseseve

Në lagjen e kampionëve të botës nuk po vendosim vetëm gurthemel, por sot po vazhdojmë suksesin e xhudos së Kosovës përmes fillimit të punimeve për zgjerimin e Qendrës Nacionale të Xhudos, tha Kryeministri Albin Kurti, në ceremoninë e vendosjes së gurthemelit të Qendrës Nacionale të Xhudos në Pejë.

“Kjo qendër ku ndodhemi tani është përuruar në shtator të vitit 2021, një pjesë e rrugës drejt medaljeve olimpike në Paris 2024 është shtruar pikërisht këtu. Pjesa tjetër është bërë në kushte më të vështira por me punë dhe përkushtim kjo ekip e jashtëzakonshme e xhudos ka sjellë medalje të arta olimpike nga Rio dhe  Tokio, me angazhimin e pandalshëm të Federatës së Xhudos për ta ngritur Kosovën edhe më lart në kuadër të programit Kosova shtet i xhudos, sot po nisim këtë investim të ri,” tha Kryeministri Kurti duke saktësuar se ky projekt përfshin palestër të re të xhudos me standarde ndërkombëtare dhe objekt multifunksional, që përfshin akomodim, pishinë, sallë fitnesi dhe restorant.

“Projekti do të krijojë kushtet që xhudoja e Kosovës të vazhdojë punën përpara, të forcojë rolin e saj si qendër stërvitore në Evropë dhe njëkohësisht të kontribuojë në zgjerimin dhe ngritjen e sportit, turizmit dhe ekonomisë në vendin tonë.”

Në fund, Kryeministri i Kosovës, Albin Kurti , bëri të ditur se në hapësirat e palestrës së re të xhudos do të zhvillohen edhe garat e sporteve luftarake në kuadër të Lojërave Mesdhetare 2030.

“Investimet në kuadër të programit ‘Kosova shtet i xhudos’ përfshirë edhe këtë projekt në vlerë mbi 5.7 milionë euro janë përgjigje ndaj suksesit dhe rezultateve që xhudoja i ka sjellë Kosovës.”

President i Federatës së Xhudos së Kosovës: Mundësi të reja për sportin dhe shtetin

Për Presidentin e Federatës së Xhudos së Kosovës, Agron Kuka, kjo qendër hap mundësi më të mëdha për zhvillimin e sportit si dhe promovon shtetin e Kosovës.

“Gurthemeli gjithmonë e ka simbolikën e fillimit të diçkajeje, që në mes e ka shpresën. Shpresën për një jetë më të mirë, shpresën për një mundësi më të madhe, e në disa raste shpresën e mbijetesës. Para plot 30 vitesh, pak metra nga këtu, ka qenë babai im që ka vendosur një gurthemel. E ai ka qenë gurthemeli i mbijetesës. Po, ka qenë mbijetesa e sportit fisnik të xhudos pas uzurpimit të palestrave publike nga okupuesi serb.

Dhe pas çlirimit, në po atë vend, vazhdoi puna e madhe e sakrifica për përfaqësimin e shtetit tonë, gjithandej botës deri në arritjet kulminante që deri tani numërojnë 5 medalje olimpike, dhjetëra evropiane e botërore, e qindra të tjera ndërkombëtare,” tha kreu i Federatës së Xhudos duke shtuar se pas suksesit të xhudos së Kosovës përveç që i gjithë komuniteti ndërkombëtar i sportit u njoftua me potencialin e një shteti të ri, po ashtu u ngrit edhe kureshtja se çka qëndron pas kësaj ndërsa përfundoi:

“Dhe kjo kureshtje u shua në vitin 2021, ku shkëlqeu emri i Driton Toni Kukës, si trajneri më i mirë në Evropë dhe botë, i shpallur nga federata evropiane dhe ajo botërore. E ky gurthemel po vendoset për mundësi më të mëdha, si në zhvillimin e sportit po ashtu edhe në promovimin e vendit tonë, përmes organizimit të aktiviteteve trajnuese e garuese ndërkombëtare. Njëra nga to do të jetë dhe organizimi i garës prestigjioze të Lojërave Mesdhetare në sportin e xhudos dhe sportin e karatesë.”

Driton Kuka: Investimet rrisin përgjegjësinë për më shumë suksese

Ndërsa njeriu më meritor për sukseset e xhudos në Kosovë, trajneri Driton Kuka, tha se fjalët e tij më shumë flasin në arenat e garave se sa para foltoreve, në raste të tilla si kjo e ceremonisë së vënies së gurthemelit.

“Kjo është një ditë me shi, por edhe herën e kaluar kur e kemi ndërtuar këtë palestër ka qenë me shi, por duket se është një ditë me bereqet. Kjo qendër që do të ndërtohet do t’ i shërbejë gjeneratave të reja për t’u ngritur, e sidomos trajnerëve të ri sepse e kemi filluar me një palestër të vogël që është ndërtuar nga familja jonë. Por aty janë ndërtuar tri të arta olimpike, teksa kemi vazhduar në këtë palestër edhe me dy medalje olimpike e shumë medalje tjera,” tha Toni Kuka duke shtuar se komuniteti i xhudos mundohet që çdo investim t’ia kthejnë shtetit shumëfish më shumë me suksese ndërsa përfundoi

“Kjo që po investohet në xhudo krijon përgjegjësi, krijon përkushtim më të madh të të gjithë sportistëve dhe gjithë trajnerëve”, nënvizoi ai.