Protesta e 22 marsit, Berisha: Edi Rama nuk do e vëjë kurrë nën kontroll vullnetin dhe dinjitetin e shqiptarëve

Protesta e zhvilluar më 22 mars ka pasur jehonë të gjerë ndërkombëtare, tha sot Kryetari i Partisë Demokratike, Sali Berisha, ndërsa paralajmëroi vijimin e aksionit opozitar me forma të reja proteste.

Kryetari i Partisë Demokratike, kishte një mesazh mbështetjeje për të burgosurit që ai i cilësoi si të burgosur politikë.

“Në protestë shndriti zëri i qytetarëve shqiptarë që mbrojnë me dinjitet interesat e tyre nga një grusht hajdutësh të papërgjegjshëm dhe nxiu, nxiu si me zift figurat e urryera të shqiptarëve, Edi Rama dhe Lubi Balluku.

Unë garantoj qytetarët se PD është e vendosur që stinën e kryengritjes paqësore ta vazhdojë me vendosmërinë më të madhe dhe se nuk do të tolerojë kurrë, që një dyshe hajdutësh të vazhdojnë të vjedhin, të pangopur duke përdorur mandatet e tyre si thika krimi, mburojë për vjedhjet e tyre,” tha Sali Berisha duke theksuar se Edi Rama mund ta vënë nën kontroll SPAK-u por kurrë vendosmërinë e qytetarëve për tu ndarë me këtë të keqe të madhe ndërsa përfundoi:

“Edi Rama vërtetë në një betejë me një prokuror guximtar, duhet ta them këtu, përdori gjithë pushtetin ekzekutiv për të mposhtur dhe për ta vënë, tani siç del në pah, në kontroll total SPAK-un, por nuk do të verë kurrë nën kontroll, vullnetin e qytetarëve shqiptarë, dinjitetin e tyre, vendosmërinë e tyre për tu ndarë me këtë të keqe të madhe.

Fjala e plotë:

Ju jeni dëshmitar të jehonës së jashtëzakonshme europiane dhe botërore të protestës së 22 Marsit. Mediat më të mëdha të botës, agjencitë më të mëdha, rrjetet televizive, gazetat më të mëdha paraqitën gjerësisht revoltën e qytetarëve të Tiranës dhe Shqipërisë, ndaj dyshes së korruptuar Rama-Balluku.

Pra, në protestë shndriti zëri i qytetarëve shqiptarë që mbrojnë me dinjitet interesat e tyre nga një grusht hajdutësh të papërgjegjshëm dhe nxiu, nxiu si me zift figurat e urryera të shqiptarëve, Edi Rama dhe Lubi Balluku.

Unë garantoj qytetarët se PD është e vendosur që stinën e kryengritjes paqësore ta vazhdojë me vendosmërinë më të madhe dhe se nuk do të tolerojë kurrë, që një dyshe hajdutësh të vazhdojnë të vjedhin, të pangopur duke përdorur mandatet e tyre si thika krimi, mburojë për vjedhjet e tyre.

Edi Rama vërtetë në një betejë me një prokuror guximtar, duhet ta them këtu, përdori gjithë pushtetin ekzekutiv për të mposhtur dhe për ta vënë, tani siç del në pah, në kontroll total SPAK-un, por nuk do të verë kurrë nën kontroll, vullnetin e qytetarëve shqiptarë, dinjitetin e tyre, vendosmërinë e tyre për tu ndarë me këtë të keqe të madhe.

Ndaj dhe njëherë ftoj shqiptarët, në datën dhe orën e caktuar që do të jetë shumë e shpejtë, të dalim në shesh në kryengritjen më të fuqishme që të çojmë Shqipërinë drejt fitores, drejt përmbysjes së këtij regjimi armik të shqiptarëve.

U dërgoj një përshëndetje të përzemërt, të burgosurve politikë në qelitë e komisariateve dhe ti uroj nga zemra ditëlindjen, ish-presidentit dhe ish-kryeministrit Ilir Meta, i burgosur kryesor politik në Shqipëri që po bën një betejë të jashtëzakonshme edhe nga qelia e burgut kundër narkoshtetit.

Dënon me neverinë më të madhe, aktet e turpshme të intimidimit që ata i bëjnë, duke dërguar kriminelë për ti shpuar shishet e ujit. Dhe akte të tilla që tregojnë fytyrën e poshtë të Edi Ramës.

Që të gjitha janë me urdhër të Edi Ramës.

Dhe kur një nga eksponentët kryesorë socialistë, me kërkesën e Tedi Blushit, deputetit, merret me këtë problem, rezultonte se operacionin e kryente Ergys Agasi me urdhër të Edi Ramës.

Shikoni ku shkon Edi Rama. Shiko çfarë shpirt, se s’po i vë epitete, se meriton çdo epitet ka ky njeri.

Çon kriminelë për të shpuar shishet e ujit, që ta lejë pa ujë. Mund të shkojë gjer këtu njeriu? As sigurimi i shtetit nuk i bënte këto.