Ekspozita “Masakrat në Kosovë 1998–1999”, veteranët e UÇK-së protestuan para Kuvendit
Veteranët e Ushtrisë Çlirimtare të Kosovës kanë protestuar para ndërtesës së Kuvendit të Kosovës pas ekspozitës “Masakrat në Kosovë 1998–1999”, që sipas tyre paraqiste të dhëna të pasakta për masakrat e kryera gjatë luftës. Pakënaqësia e tyre u intensifikua kur nuk u lejuan të hynin në oborrin e Kuvendit, duke u detyruar të futen me forcë përmes hyrjes kryesore.
Përfaqësuesi i Shoqatës së Familjeve të Dëshmorëve të UÇK-së, Xhavit Jashari, deklaroi se ka dyshime se informacionet për ekspozitën janë marrë nga shërbimet sekrete serbe. Ai shtoi se do ta mbrojnë luftën e drejtë të Ushtrisë Çlirimtare të Kosovës.
Xhavit Jashari nga OVL–UÇK tha se protestojnë në oborrin e institucioneve të vendit, të cilat, sipas tij, kanë degraduar pafundësisht.
“Organizatat e dala nga lufta kanë thirrur protestë pikërisht në oborrin e institucioneve të Kosovës, të cilat kanë degraduar pafundësisht. E them këtë sepse qeveria e Republikës së Kosovës dhe kryeministri i saj flisnin shumë për bashkimin kombëtar, mbajnë simbolin dhe flamurin kombëtar në xhaketë, kurse në anën tjetër kishin një këshilltar që vazhdimisht përpiqej të degradojë luftën e pastër dhe të drejtë të Ushtrisë Çlirimtare të Kosovës. Ky person është Shkëlzen Gashi,” tha Xhavit Jashari duke konstatuar se brenda qeverisë ka ministra që janë anti-UÇK.
“Degradimi kaq i rëndë dhe i paskajshëm i kësaj qeverie vjen nga fakti se brenda saj ka ministra anti-UÇK. Ministri i Ekonomisë dhe Financave, Hekuran Murati, publikisht ka deklaruar se më mirë dhe më lirë do të na kushtonte liria e këtij vendi po t’i kishim paguar mercenarët, gjë që është fyerje e rëndë për veteranët.”
Veteranët kanë falënderuar të gjithë pjesëmarrësit në protestën simbolike e organizuar nga kategoritë e dala nga lufta e UÇK-së. Njëherit, këto kategori kanë theksuar se nëse nuk do të ketë reflektim nga ana e institucioneve ndaj kërkesave të tyre, aktiviteti kundër tendencave për shtrembërimin e historisë do të vazhdojë edhe në ditët në vijim.
Ndryshe, Ekspozita “Masakrat në Kosovë 1998–1999” është larguar sot me vendim të Komunës Prishtinë nga sheshin qendror “Nënë Tereza”. Ky veprim vjen pas vendimit të Kryetarit të Komunës Prishtinë, Përparim Rama, për pezullimin e lejes së ekspozimit, për shkak të pasaktësive të evidentuara në përmbajtjen e ekspozitës.
Kjo ekspozitë me autor Shkëlzen Gashin ka nxitur reagime publike pasi u identifikuan gabime të shumta për të dhënat e shkruara në të. Vetë autori i ekspozitës, Shkëlzen Gashi, ka deklaruar se organizatorët janë mbështetur në përpilimin e listës së të vrarëve nga “Libër Kujtimi i Kosovës” i Humanitarian Law Center, HLC, organizatë e udhëhequr nga Natasha Kandiç, të vetmin burim të plotë ekzistues dhe se verifikimi individual i çdo rasti nuk ka qenë përgjegjësi e tyre.
Por, këtë e ka mohuar HLC dhe Natasha Kandiç, madje Kandiç e ka akuzuar Gashin se nuk ka ditur ti lexoj të dhënat nga raporti!
