Botërori 2026, sonte finalja e madhe e play offit Kosovë-Turqi

Përfaqësuesja e Kosovës në futboll sonte në Prishtinë me fillim në ora 20:45 zhvillon ndeshjen më të rëndësishme në historinë e saj, përballë Turqisë, në finalen e madhe të play offit për kualifikim në Kupën e Botës 2026.

“Dardanët” zbresin në stadiumin ikonik “Fadil Vokrri” me një mision të qartë: fitoren që i dërgon për herë të parë në një Botëror.

Vetëm 90 minuta e ndajnë Kosovën nga një arritje historike në garën më të madhe të futbollit, e cila këtë verë do të zhvillohet në SHBA, Meksikë dhe Kanada.

Brenda kampit të Kombëtares sonë mbizotëron optimizëm i madh.

Futbollistët janë maksimalisht të përgatitur dhe të motivuar për të dhënë gjithçka në fushë, me synimin për të siguruar biletën historike për Botëror.

Trajneri i përfaqësueses së Kosovës, Franco Foda, para ndeshjes vlerësoi kundërshtarin, por theksoi besimin te skuadra e tij.

“Turqia është një ekip shumë i fortë, me cilësi të lartë individuale si Yildiz, Güler dhe Çalhanoğlu. Por edhe ne kemi treguar vlerat tona. Jemi këtu me meritë dhe besoj se gjasat janë 50 me 50. Do të japim maksimumin për të fituar,” u shpreh Franco Foda

Atmosfera në vend, në prag të kësaj sfide, është mjaft entuziaste. Nga kryeqyteti ku luhet ndeshja e deri në çdo qytet tjetër shqiptar, në rrugë e ambiente publike, vëmendja është përqendruar te kjo përballje vendimtare, Kosovë-Turqi.