Pa ndëshkimin e Ramës dhe Ballukut, Berisha: Nuk mund të ketë asnjë hap drejt BE-së!

Kryetari i Partisë Demokratike, Sali Berisha, tha sot se pa ndëshkimin e Edi Ramës dhe Belinda Ballukut nuk ka dhe nuk mund të ketë asnjë hap drejt Bashkimit Evropian, BE.

“Shqipëria, ëndrra evropiane e saj, procesi më thelbësor për të ardhmen e vendit, vazhdon të mbahen peng nga Edi Rama dhe Lubi Balluku.
Përpjekjet për ta arkivuar dosjen Balluku, de facto dosjen Rama, janë përpjekjet më kriminale, përpjekje të cilat shkelmojnë interesat personale, shoqërore dhe kombëtare të çdo shqiptari.
Edhe njëherë, është goditja më e rëndë që i bëhet interesave të shqiptarëve në dy aspekte.

Së pari, lufta kundër korrupsionit merr fund. Pa dënimin, pa heqjen e imunitetit të Lubi Ballukut, nuk ka dhe nuk mund të ketë luftë kundër korrupsionit.
Pa thirrjen e Edi Ramës për të gjithë ato që mban dosja Balluku, nuk ka dhe nuk mund të ketë luftë kundër korrupsionit.
Pa ndëshkimin e korrupsionit dhe përgjegjësinë e Edi Ramës dhe Lubi Ballukut, nuk ka dhe nuk mund të ketë asnjë hap drejt BE,” tha Sali Berisha duke rikujtuar edhe njëherë, raporti IBAR është shtyrë tre herë gjatë muajit mars.
“Po bëhet gjithnjë më i madh numri i vendeve që kundërshtojnë në mënyrë të prerë të votojnë IBAR-in.
IBAR-i është raporti i vlerësimit të standardeve dhe luftës kundër korrupsionit.
Votimi i këtij raporti është kusht që kapitujt e tjerë të mund të mbyllen dhe ky votim është i ndërmjetëm, nuk është përfundimtar për dy kapitujt, 23 dhe 24, kapitujt për shtetin ligjor dhe luftën kundër korrupsionit dhe të drejtat e njeriut.”

Lideri i opozitës, në konferencë e përjavshme foli edhe për nismën Vuçiç-Rama duke vlerësuar se ajo ngjalli përçmim të madh në Europë, dhe përfundoi aty ku e ka vendin.

“Mund të them se ka ngjallur përçmim të madh nisma Vuçiç-Rama në Europë.
Është kuptuar si një përpjekje e dy pengmarrësve të vendeve të tyre, që nuk kanë interesa të tjera përveç interesave të pushtetit të tyre.
Edhe vende të cilat kanë një skepticizëm të qartë në procesin e zgjerimit të BE, dëshmojnë mospajtim të plotë me këtë nismë të ndërmarrë nga dy diktatorë autoritarë, nga dy individë të lidhur këmbë e kokë me krimin, me bandat dhe trafiqet,” tha kryedemokrati duke vlerësuar:
“Pra, nisma Vuçiç-Rama po përfundon aty ku e ka vendin.
Ka ngjallur përçmim dhe ka dëshmuar se këta dy zyrtarë nuk kanë interesa të tjera përveç interesave të tyre kriminale dhe të xhepit.”

Sot zuri vend edhe incidenti me Ergys Agasin të cilin, Kryetari i Partisë Demokratike tha se e kanë rrahur shumë keq para dy javësh ndërsa bëri të ditur se ai mbrohet nga shteti, dhe për të nuk ka mandat ndërkombëtar arresti

“Por, po kaq është dosja e AKSHI-t. Dy javë më parë, Ergys Agasi e kanë rrahur shumë keq. E kanë shtruar në dru. Po, po.
Sipas qytetarit dixhital, është dërguar në një spital privat, por duhet të dini një gjë, Ergys Agasi mbrohet nga shteti.
Nuk ekziston mandat ndërkombëtar arresti për Ergys Agasin. Nuk ekziston,” tha Kryetari i Partisë Demokratike, Sali Berisha, duke përfunduar:
“Mandati në Shqipëri është i pavlerë sepse atë policia nuk e arreston, ai ka hequr ministra, por këto janë zhvillimet për këtë prestanome të Edi Ramës, sepse në fakt Ergysi është vetë Rama, të kuptohemi.”