Zgjedhja e Presidentit/ Pas takimit me Abdixhikun, Kurti: Duam t`i shmangim zgjedhjet!

Kryetari i Vetëvendosje dhe Kryeministri i Kosovës, Albin Kurti, pas takimit me Kryetarin e LDK-së, Lumir Abdixhiku, tha se nuk ka lëvizje të reja por është i bindur se me takime të tilla mund të arrihet deri te marrëveshja, ndërsa paralajmëroi se tri javët e mbetura do të shfrytëzohen për përpjekje drejt gjetjes së një zgjidhjeje për zgjedhjen e presidentit të ri.

“Çështja kryesore që u diskutua, por jo edhe e vetmja, ishte fakti që na kanë mbetur edhe tri javë deri te zgjedhja e presidentit dhe për këtë duhet t’i maksimizojmë përpjekjet. Takimi shkoi në një atmosferë konstruktive dhe dashamirëse. Jemi të përcaktuar që t’i shmangim zgjedhjet e reja sepse nuk do të ishin zgjidhje për numrin prej 80 deputetësh.  

Atmosfera konstrkutive dhe dashmirësia që t’i shmangim zgjedhjet e reja më bën optimist për këto tri javët e mbetura. Uroj që të mos i shrytëzojmë deri në ditën apo orën e fundit, siç është bërë zakon,” Albin Kurti pas takimit me Lumir Abdixhikun duke shtuar se zgjedhjet e reja nuk do të ishin zgjidhje për numrin prej 80 deputetësh për zgjedhjen e presidentit të ri.

“Është e vështirë të paramendojmë një fushatë zgjedhore ku ne i risjellim platformat dhe programet tona me po të njëjtat zotime, të kërkojmë votën e qytetarëve për një rezultat që e dimë se nuk mund të jetë shumë ndryshe.”

Duke e vlerësuar si sfidë tejet gjigante që një parti të ketë 80 deputetë dhe ta zgjedhë e vetme presidentin, Kurti ashtu sikurse Abdixhiku nuk ka dhënë detaje nga takimi.

“Ne jemi udhëheqës të subjekteve demokratike dhe jemi transparent sa i përket procesit, por ne duhet ta ruajmë konfidencialitetin e bisedimeve. Në momentin kur bisedimet sjellin rezultat konkret mund të përgjigjemi për të arriturat. Por përderisa ky nuk është rasti nuk mund të flasim për emra të përveçëm,” kryetari i Lëvizjes Vetëvendosje i cili vazhdon ta ketë qëndrimin e njëjtë se për një emër të përveçëm duhet një shumicë prej 84 apo 85 deputetë, e jo të synohet 80 apo 81 deputetë.

“Vetëm një shumicë prej 84 e 85 deputetëve do të na bënte komod. Edhe më tutje besoj se numri 80 apo 81 nuk është caku ynë për të ecur përpara, është më shumë se aq. Duhet të synojmë deri në ditën e fundit jo 81 por 84 apo 85 deputetë,” tha Albin Kurti duke bërë të ditur se do të përpiqet të takohet edhe me kryetarin e PDK-së, Bedri Hamza, pasi sipas tij presidenti nuk do të jetë i një apo dy partie.

Abdixhiku: Po bëjmë përpjekje të gjejmë zgjidhje

Kryetari i Lidhjes Demokratike të Kosovës, Lumir Abdixhiku pas takimit me Kryetarin e Lëvizjes Vetëvendosje dhe Kryeministrin, Albin Kurti, tha se janë duke bërë përpjekje për të gjetur zgjidhje.

“Jo nuk kemi diskutuar ende emra konkret. Procesi është nisur, janë dy emra të LVV-së në proces, derisa LDK e ka pozicionin e qartë se një partie politike nuk mund t’i takojnë të gjitha postet. Po provojmë të gjejmë zgjidhje të përbashkët, konsensuale, me takime dhe do ta ndjekim këtë rrugë sa herë që mundemi për të shmangur zgjedhjet,” tha Lumir Abdixhiku duke përsëritur se fillimisht duhet të mirren vesh rreth parimeve të procesit ndërsa përfundoi:

“Po përpiqemi të bëjmë zgjidhje. Përderisa jemi në takime po bëjmë përpjekje. Nëse nuk bëjmë asgjë në tri javët e ardhshme, zgjedhjet janë të pashmangshme.”